2 Samuel 9:1-13
-
David kinextilia Mefibóset ke kitasojta (1-13)
9 David kijtoj: “¿Xa nankimatij ox mokauaok se ichankauj Saúl? Komo mokauaok aksa* nikneki niknextilis ke niktasojta porin nikiluij Jonatán ke ijkon nikchiuaskia”.
2 Moajsia se takat akin kintekitilijka ichankauan Saúl. Nejon takat monotsaya Zibá. Yejua ika, David tanauatij maj kinotsatij uan kitajtanij:* “¿Tejua tiZibá?”. Zibá kinankilij: “Kemaj noteko”.
3 Tekiuaj no kiluij: “¿Tikmati ox mokauaok se ichankauj Saúl akin uelis niknextilis ke niktasojta ijkon kemej Dios tetasojta?”. Zibá kiluij David: “Yetokok se iokichpil Jonatán akin amo ueli nejnemi”.*
4 Tekiuaj David kitajtanij: “¿Kani yetok?”. Zibá kinankilij: “Nemi ichan Makir iokichpil Amiel ompa Lo-Debar”.
5 Tekiuaj David kintitanik seki takamej maj kinotsatij. Yejua ika takamej yajkej Lo-Debar, kampa yetoya ichan Makir iokichpil Amiel.
6 Mefibóset, akin katka iokichpil Jonatán uan iixuiuj Saúl ajsik kampa yetoya David. Keman ajsik, motankuaketsak uan moixpiloj hasta talpan. David kiluij: “¡Mefibóset!”, uan yejua kinankilij: “Xinechilui noteko”.
7 David kiluij: “Amo ximoui, porin nimitsnextilis ke nimitstasojta ijkon kemej nikiluijka Jonatán ke nikchiuaskia. Nimitsmakas nochi in talmej tein katka iaxka moueyitat Saúl uan nochipa nouan titakuas”.*
8 Satepan Mefibóset oksepa moixpiloj hasta talpan uan kiluij David: “Noteko, nejua amo teyi nichiujkej ta sayoj kemej se itskuinmiket, ¿keyej tikneki tinechpaleuis?”.
9 Tekiuaj David tanauatij maj kinotsatij Zibá akin kitekitilijka Saúl. David kiluij: “Nochi tein katka iaxka Saúl uan ichankauan, nikmaka iixuiuj Saúl akin katka moteko.
10 Tejua, mokoneuan uan motakeualuan nankitekitiliskej Mefibóset. Nankitatokiskej uan nankitekiskej tein mochiuas para maj ichankauan kipiakan tein kikuaskej. Sayoj ke Mefibóset, iixuiuj Saúl, nochipa nouan takuas”.
Zibá kipiaya 15 ikoneuan uan 20 itakeualuan.
11 Zibá kinankilij tekiuaj David: “Noteko, nikchiuas nochi tein tinechnauatis”. Desde ijkuak, Mefibóset peuak youi takuati iuan tekiuaj David,* kemej yeskia semej ikoneuan.
12 Mefibóset kipiaya se okichpiltsin akin monotsaya Micá. Nochin akin nemiaj ichan Zibá peujkej kitekitiliaj Mefibóset.
13 Uan Mefibóset akin amo uelia nejnemia, nemia Jerusalén porin nochipa yaya takuati iuan tekiuaj.
Tajtolmelaualismej
^ Oso “akin”, “akaj”.
^ Oso “kitajtoltij”.
^ Oso “akin koxoj”.
^ Itech hebreo, “tikuas pantsin”.
^ Oso xa “kampa nitakua”.
