Gálatas 4:1-31
4 Namechiluia ke keman piliok akin kikauiliskej nochi, yejua kemej yeskia se takeual, maski yeski iaxka nochi tein kipia itat,
2 porin moajsij akin kiyekpiaj yejua uan tajpiaj ichan hasta keman ejkos tonal tein itat kiixtalij.
3 No ijkon tejuan, keman katkaj tipilimejok, no tikatkaj titakeualmej porin titanemiliayaj uan tikchiuayaj kemej oksekin.
4 Sayoj ke keman ajsik tonal tein ixyetoya, Dios kiualtitanik iKoneuj, akin se siuat kiyolitij uan monekik kitakamatis tanauatil,
5 para maj kinkouani uan maj kinmakixtiani akin monekia kitakamatiskej tanauatil, uan ijkon Dios ueliskia techselis kemej tiikoneuan.
6 Kemej namejuan nanikoneuan, Dios kiualtitanik itech toyolo ichikaualis iKoneuj, tein kichiua maj chikauak tikijtokan: “¡Abba,* noTajtsin!”.
7 Yejua ika amo titakeualok, ta tiikoneuj Dios. Uan komo tiikoneuj Dios, no tikselis tein yejua kineki techmakas.
8 Sayoj ke, keman namejuan amo nankiixmatiaj Dios, namoajsiaj ininmako akin amo yekmelauj dioses.
9 Sayoj ke axkan ke nankiixmatij Dios, oso okachi kuali maj nikijto, axkan ke Dios namechixmati namejuan, ¿keyej oksepa nantanemiliaj uan nankichiuaj kemej oksekin uan nankinekij oksepa namoajsiskej ininmako? Nochi nejon nenkaj uan amo tapaleuia.
10 Namejuan nankinemiliaj ke onkakej seki tonalmej, seki metsti, seki tapoualmej uan xiujmej tein okachi tayekantokej uan naniluitij.
11 Nechtekipachoua maj nenkaj nimochikauani namechpaleuis.
12 Nokniuan, namechtataujtia ximochiuakan kemej nejua, porin nejua no nikatka kemej namejuan. Namejuan amo nanechchiuilijkej tein amo kuali.
13 Sayoj ke nankimatij ke nikokolispeuak, uan nejon tapaleuij maj ueli namechixmatilti kuali tanauatilmej,* porin ayamo nankiixmatiaj.
14 Uan maski namechtekimakak keman nikokolispeuak, amo nanechixtopeujkej nion nanechijiyakej,* ta nanechselijkej kemej se iángel Dios, kemej Cristo Jesús.
15 ¿Keyej amo nanyolpakijok kemej achto? Porin uelis nikyekijtos ke komo ueliskia, namokixtiliskiaj namoixtololouan uan nanechmakaskiaj.
16 ¿Uan axkan nankinemiliaj ke namechtauelita porin namechiluia tein melauak?
17 Yejuan kitelnekij namechtanejnektiskej, sayoj ke amo porin kinekij namechpaleuiskej, ta kinekij xinechkauakan uan ijkon xiknekikan nankintojtokaskej.
18 Kuali yetok maj semi namechtemokan komo kinekij namechpaleuiskej, sayoj ke moneki nochipa ijkon yeski uan amo sayoj keman nejua nietos namouan.
19 Nokoneuantsitsin, oksepa nitajyouia namoka kemej ijkuak se temomaj kipiati ikonetsin. Uan ijkon niksentokas hasta keman namejuan nantamatiskej kemej Cristo.
20 Nikuelitaskia nietos namouan yekintsin uan amo namechnojnotsas kemej namechnojnotstok, porin amo nikajsikamati toni namechpanotok.
21 Xinechiluikan, namejuan akin nankinekij nankitakamatiskej tanauatil, ¿amo nankimatij tein kijtoua iTanauatil Moisés?
22 Ijkuiliujtok ke Abrahán kinpiak ome ikoneuan: se iuan se siuat akin katka takeual uan okse iuan se siuat akin amo katka takeual.
23 Ikoneuj takeual yolik kemej tinochin tiyolij, uan ikoneuj akin amo takeual yolik porin Dios ijkon motenkauak.
24 Nejin kiixnextia tein mochiuaskia satepan, porin nejin ome siuamej kiixnextiaj ome taman tein Dios motenkauak. Se mochiuak itech tepet Sinaí uan tamati kemej Agar, uan nochin akin kitojtokaj, temako yetokej.
25 Agar kijtosneki Sinaí, se tepet tein yetok Arabia, uan kiixnextia Jerusalén tein moajsi axkan, porin yejua moajsi temako iuan ikoneuan.
26 Sayoj ke Jerusalén tein yetok ne ajko, amo yetok temako uan yejua tomomaj.
27 Porin ijkuiliujtok: “Xiyolpaki, siuat akin amo tikinpia konemej. Xitsajtsi porin tiyolpaki, maski amo keman tikmachilij keniuj tekokoj keman se tayolitia. Porin siuat akin kikaujkej kipia okachi konemej ke siuat akin kipia itakauj”.
28 Nokniuan, namejuan nanyolkej porin Dios ijkon motenkauak, ijkon kemej Isaac.
29 Sayoj ke, ijkon kemej ne uejkauj akin yolik kemej tinochin tiyolij, kitajyouiltij akin Dios ika ichikaualis kichiuak maj yoli, no ijkon panoua axkan.
30 Sayoj ke, ¿toni kijtoua Tajkuilolamatsin? “Xiktoka takeual uan iokichpil. Ikoneuj takeual amo kiselis tein kikauiliskej ikoneuj siuat akin amo takeual”.
31 Yejua ika nokniuan, amo tiikoneuan se takeual, ta tiikoneuan siuat akin amo takeual.
Tajtolmelaualismej
^ Se tajtol hebreo oso arameo tein kikuiaj konemej keman kinotsayaj inintat, tein axkan miakkan mokui kemej papi.
^ Oso “tajtolmej”.
^ Oso “nion nanechchijchakej”.
