Gálatas 6:1-18
6 Nokniuan, takan se aksa* chikoyajtok uan amo kimati, namejuan akin namechixyekana ichikaualis Dios xiktemokan nankipaleuiskej maj moyektali uan amo xikajuakan. Sayoj ke nansejsemej ximotachilikan, amokan no nankichiujkej tein amo kuali.
2 Xiksentokakan ximosenpaleuijtokan keman nankipiaskej ouijkayomej, uan ijkon nankitakamatiskej itanauatil Cristo.
3 Porin komo aksa kinemilia ke ueyichiujkej maski tein melauj amo teyi chiujkej, mokajkayaujtok.
4 Sayoj ke sejse maj kiyekita tein kichiua, uan ijkon yolpakis keman kiitas tein yejua kichiuak, uan amo sayoj kiitstos tein okse ueli kichiua.
5 Porin sejse moneki kichiuas tekit tein kimakatokej.
6 Uan no, akin kimachtijtokej itajtol Dios maj kimaka nochi tein kuali akin kimachtia.
7 Amo ximokajkayauakan: amo akin uelis kikajkayauas Dios. Porin tein se kitoktos yejua tein se kisentilis.
8 Akin moyekana ika tein kinejneki inakayo, ixpoliuis, sayoj ke akin moyekana ika ichikaualis Dios, nemis nochipaya.
9 Yejua ika maj tiksentokakan tikchiujtokan tein kuali, porin keman ajsis tonal tikseliskej tein kuali komo amo tisiouij.*
10 Yejua ika, nochipa keman uelis timosenpaleuiskej, maj tikinpaleuikan nochin, sayoj ke okachiok tokniuan akin touan taneltokaj.
11 Xikitakan keniuj namechtajkuilouilijtok ika uejueyi letra.
12 Akin semi namechiluijtokej ke moneki ximotekikan* kitemouaj maj oksekin kuali kinitakan, porin amo kinekij maj kintajyouiltikan kemej akin kiteixmatiltiaj Cristo, akin kikoujpampilojkej.
13 Porin akin motekij* amo kitakamatij iTanauatil Moisés, sayoj ke kinekij ximotekikan uan ijkon moueyimatiskej* porin kichiujkej ximokauakan maj namechtekikan.
14 Sayoj ke nejua amo keman niknekiskia nimoueyitalis, ta sayoj porin nitakuaujtamati iuan toTekotsin Jesucristo akin momikilij itech se kouit.* Itechkopa, nejua nikinita ke akin nechixnamikij kemej yeskia mikkejya* uan yejuan nechitaj kemej yeskia nimikikya.
15 Porin amo tayekantok ox se moteki* oso amo, ta okachi tayekantok maj Dios techchiua tiyankuikej.
16 Maj yolseujtokan uan maj Dios kinikneli akin ijkon tanemiliaj, kemaj, akin pouij itech Israel tein iaxka Dios.
17 Desde axkan maj amo akin nechkuejmolkalaki, porin notech nikuika tein kinextia ke niitakeual Jesús.
18 Nokniuan, maj toTekotsin Jesucristo namechmaka itatiochiualis tein amo technamiki porin nankinextiaj se kuali tanemilil. Maj ijkon mochiua.*
Tajtolmelaualismej
^ Oso “akin”, “akaj”.
^ Oso “amo timosenkauaj”.
^ Oso “ximochiuilikan circuncisión”. Xikonita circuncisión.
^ Oso “mochiuiliaj circuncisión”.
^ Oso “moueyinekiskej”.
^ Xikonita kouit kampa tetajyouiltiaj.
^ Oso “kinmiktijkejya itech kouit”.
^ Oso “se mochiuilia circuncisión”.
^ Oso “Amén”.
