Génesis 1:1-31
-
“Dios kichijchiuak iluikak uan taltikpak” (1, 2)
-
Dios tachijchiua itech chikuasen tonal (3-31)
-
Yekinika tonal: tatanesi uan tayoua (3-5)
-
Ojpatika tonal: Dios kichiua maj takaujto (6-8)
-
Expatika tonal: nesi in tal uan taxiujyoua (9-13)
-
Naujpatika tonal: tonaltsin, metsti uan sitalimej (14-19)
-
Makuiltika tonal: pescados uan totomej (20-23)
-
Chikuasentika tonal: tapialmej tein nemij talixko, uan takat uan siuat (24-31)
-
1 Keman peuak nochi, Dios kichijchiuak iluikak uan taltikpak.
2 Sayoj ke itech taltikpak amo akaj nemia uan amo teyi onkaya. Tel tayouayan katka uan kampa yeski onkaya at uan tel uejkatan katka. Uan Dios kikuitoya ichikaualis aixko, nikan uan nepa.
3 Uan Dios kijtoj: “Maj tatanesi”. Uan tatanesik.
4 Satepan, Dios kiitak ke kuali katka maj tatanesto, uan kiixtalij kemanian tatanestos uan kemanian tayouayan yeski.
5 Keman tatanestoya, Dios kitokaytij Tonayan, uan keman tayouayan katka, kitokaytij Youak. Uan tiotakik uan tanesik. Nejon panok itech yekinika tonal.
6 Uan Dios kijtoj: “Maj takaujto* tatajko den at, uan maj at ojkan moxelo”.*
7 Uan Dios peuak kichiua maj takaujto uan kixeloj at tein yetoya tani* uan tein yetoya ajko. Uan ijkon mochiuak.
8 Kampa takaujtoya, Dios kitokaytij Iluikak. Uan tiotakik uan tanesik. Nejon panok itech ojpatika tonal.
9 Uan Dios kijtoj: “At tein yetok taltikpak maj sekosan mosentili uan maj nesi in tal”. Uan ijkon mochiuak.
10 Kampa tauaktoya, Dios kitokaytij Tal, uan at tein mosentilij kitokaytij Mar. Uan Dios kiitak ke nejin kuali katka.
11 Uan Dios kijtoj: “Maj itech tal taxiujyoua, maj moskalti okseki taman tein kipia iteyo uan nochi tataman kouit tein itakilo kipia iteyo”. Uan ijkon mochiuak.
12 Uan peuak taxiujyoua uan moskaltia tataman xiuit tein kipia iteyo uan nochi tataman kouit tein itakilo kipia iteyo. Uan Dios kiitak ke nejin kuali katka.
13 Uan tiotakik uan tanesik. Nejon panok itech expatika tonal.
14 Uan Dios kijtoj: “Maj pantauikan tonaltsin, metsti uan sitalimej para maj tanesi uan tayoua. Nejin kinextiskej tonalmej, xiujmej uan okseki tonalmej itech xiuit.*
15 Tauiskej iluikak para tatanestos itech taltikpak”. Uan ijkon mochiuak.
16 Dios peuak kichijchiua tonaltsin uan metsti: tonaltsin para maj okachi taui tonayan uan metsti para maj okachi taui de youak. No kinchijchiuak sitalimej.
17 Uan Dios kintalij ne iluikak para maj pantauikan itech taltikpak,
18 para maj okachi tauikan tonayan uan de youak uan para kiixtalis kemanian tatanestos uan kemanian tayouayan yeski. Uan Dios kiitak ke nejin kuali katka.
19 Uan tiotakik uan tanesik. Nejon panok itech naujpatika tonal.
20 Uan Dios kijtoj: “Maj itech at pexonikan* okuilimej uan maj ejekaixko patanikan okuiltsitsin”.
21 Uan Dios kinchijchiuak nochi tataman uejueyi tapialmej tein nemij itech at uan nochi tataman okuilimej tein mosenkuitinemij itech at, uan nochi tataman okuiltsitsin tein patanij. Uan Dios kiitak ke nejin kuali katka.
22 Uan Dios kintiochiuak ijkuin: “Xikinpiakan namopiluan, ximomiakilikan uan xitapexontikan itech mar. Uan maj okuiltsitsin tein patanij momiakilikan itech taltikpak”.
23 Uan tiotakik uan tanesik. Nejon panok itech makuiltika tonal.
24 Uan Dios kijtoj: “Maj onkakan nochi tataman tapialmej: tapialmej tein momatij kalijtik, tein moxoxolatsaj uan nochi tataman koujtajtapialmej”. Uan ijkon mochiuak.
25 Dios kinchijchiuak nochi tataman koujtajtapialmej, nochi tataman tapialmej tein momatij kalijtik uan nochi tataman tapialmej tein moxoxolatsaj. Uan Dios kiitak ke nejin kuali katka.
26 Uan Dios kijtoj: “Maj tikchijchiuakan takat kemej tejuan titamatij, uan maj kinyekpia* pescados* tein nemij itech mar, okuiltsitsin tein patanij ejekaixko, tapialmej tein momatij kalijtik uan tapialmej tein moxoxolatsaj, uan maj kiyekpia nochi taltikpak”.
27 Uan Dios kichijchiuak takat kemej yejua tamati. Kinchijchiuak takat uan siuat.
28 Uan no, Dios kintiochiuak uan kiniluij: “Xikinpiakan miakej namokoneuan, ximomiakilikan, ximomoyauakan* itech nochi taltikpak uan xikyekpiakan.* No xikinyekpiakan pescados tein nemij itech mar, okuiltsitsin tein patanij ejekaixko uan nochin tapialmej tein nemij itech taltikpak”.
29 Uan Dios kijtoj: “Namechmaka nochi tataman xiuit tein kipia iteyo uan nochi tataman kouit tein itakilo kipia iteyo. Yejua nejon tein nankikuaskej.
30 Uan nochin koujtajtapialmej, nochin okuiltsitsin tein patanij ejekaixko uan nochin tapialmej tein yoltokej itech taltikpak nikinmaka nochi tataman xiuit para maj kikuakan”. Uan ijkon mochiuak.
31 Satepan, Dios kiitak ke nochi tein kichijchiujka tel kuali katka. Uan tiotakik uan tanesik. Nejon panok itech chikuasentika tonal.
Tajtolmelaualismej
^ Oso “tatapoto”.
^ Nejin kijtosneki ke seki at mokauak ajko uan seki tani (atauj, tauakal).
^ Oso “atauj”, “tauakal”.
^ Nejin kijtosneki tonalmej kemej ijkuak se tatoka, se kiteki tatok, keman taxiujtata oso taseseya.
^ Oso “temikan”.
^ Oso “kinixyekana”.
^ Oso “amichimej”.
^ Oso “ximoxinikan”.
^ Oso “xikixyekanakan”.
