Génesis 12:1-20
12 Uan Jehová kiluij Abrán: “Xikisa de moaltepeuj, xikinkaua moparientes uan mochankauan uan xiouj itech altepet kampa nejua nimitstanextilis.
2 Nikchiuas maj mokoneuan motelmiakilikan,* nimitstatiochiuis uan nikchiuas maj mitstelixmatikan. Uan kemej tikchiuak tein kuali, no nikintatiochiuis oksekin.
3 Nikintatiochiuis akin mitsnejnekiliskej tein kuali uan niktatsakuiltis akin mitsnejnekilis tein amo kuali, uan motechkopa nikintatiochiuis* nochin* akin nemiskej itech taltikpak”.
4 Yejua ika Abrán kichiuak tein Jehová kiluijka uan yajki, uan Lot iuan yajki. Abrán kipiaya 75 xiujmej keman kisak de Harán.
5 Kisak para yas Canaán uan kiuikak isiuatsin, Sarái, uan Lot akin katka isobrino. No kiuikak nochi tein kisentilijkaj uan nochin takeualmej tein kinpiakej ompa Harán. Keman ajsikej itech tal tein poui Canaán,
6 Abrán kipanauij nejon altepet hasta ajsik ueyi xolal Siquem. Nejin ueyi xolal amo uejka yetok de kampa motanotsa Moré, kampa onkak uejueyi koujmej. Ijkuak, ichankauan Canaán nemiaj itech nejon altepet.
7 Ompa Jehová monextij iixpan Abrán uan kiluij: “Nejin tal nikmakati mokoneuj”.* Uan Abrán kichijchiuak se altar ompa kampa Jehová monextijka iixpan.
8 Satepan kisak de ompa uan yajki itech tepemej tein moajsij tanakastankopa de Betel uan kiketsak ikaltsin* tatajko de Betel uan Hai. Betel yetoya kampa ika pankalaki tonaltsin uan Hai yetoya kampa ika ualkisa tonaltsin. Ompa no kichijchiuilij Jehová se altar uan peuak kiteneua itokay Jehová.
9 Satepan, Abrán miakkan mokaltalijtinemik uan kisentokak yajki para ajsis kampa moixmati kemej Négueb.
10 Ompa Canaán peuak tatasojti uan amo onkaya toni kikuaskej. Kemej tel amo teyi onkaya, Abrán temok Egipto para ompa mokauas seki tonalmej.
11 Keman yaya ajsitiya Egipto, kiluij isiuatsin: “Sarái, nikneki nimitsiluis teisa. Tejua titelkuakualtsin.
12 Keman mitsitaskej akin nemij Egipto kimatiskej ke tinosiuatsin. Yejua ika nechmiktiskej uan tejua mitskuiskej.*
13 Nimitstataujtia xikinilui ke tinokniuj para maj amo teyi nechchiuilikan uan para maj amo nechmiktikan”.*
14 Keman Abrán ajsik Egipto, akin ompa nemiaj kiitakej ke siuatsin akin iuan yaya tel kuakualtsin katka.
15 Uejueyi chiuanimej akin kitekitiliayaj tekiuaj ompa Egipto no kiitakej, uan peuak kiluiaj tekiuaj ke tel kuakualtsin katka nejon siuatsin. Yejua ika kiuikakej ichan tekiuaj.
16 Kemej tekiuaj kitelueuelitaya Sarái amo teyi kichiuilij Abrán uan kimakak ichkamej,* kuakuejmej, burros uan camellos. No kimakak takamej uan siuamej para maj kitekitilikan.
17 Sayoj ke Jehová semi kintajyouiltij tekiuaj uan akin nemiaj ichan porin kiuikaka Sarái, isiuatsin Abrán.
18 Yejua ika tekiuaj kinotsak Abrán uan kiluij: “¡Xikita toni tinechchiuilij! ¿Keyej amo tinechiluij ke mosiuatsin?
19 ¿Keyej tinechiluij ke mokniuj? Yaya iuan nimonamiktitiya. Nikan yetok mosiuatsin. ¡Xikuika uan xioujya!”.
20 Uan tekiuaj kinnauatij itakeualuan maj kinuikakan Abrán uan isiuatsin hasta maj kisakan de Egipto. Abrán no kiuikak nochi tein kipiayaj.
Tajtolmelaualismej
^ Oso “ueyichiuanimej”.
^ Oso “motaniliskej se tatiochiualis”.
^ Oso “nochin kalyetonij”.
^ Oso “nikinmakati mokoneuan”.
^ Nejin kaltsin chijchiujtoya ika tasal (tilmaj).
^ Oso “amo mitsmiktiskej”.
^ Oso “para maj niksentoka niyolto”.
^ Oso “borregos”.
