Génesis 14:1-24
14 Itech nejon tonalmej, Amrafel taixyekantoya ompa Sinar, Arioc ompa Elasar, Kedorlaomer ompa Elam uan Tidal ompa Goyim.
2 Nejin tekiuanij peuak moteuiaj iuan Bera akin taixyekantoya Sodoma, iuan Birsá akin taixyekantoya Gomorra, iuan Sinab akin taixyekantoya Admá, iuan Seméber akin taixyekantoya Zeboyim uan iuan akin taixyekantoya Bela, ueyi xolal tein no monotsa Zóar.
3 Nochin nejin tekiuanij kinsentilijkej ininsoldados itech se tal tamanis* tein monotsa Sidim, tein no moixmati kemej mar Salado.*
4 Kedorlaomer kinixyekanak 12 xiujmej nejon makuil tekiuanij, sayoj ke se xiuit satepan kiixnamikkej.
5 Okse xiuit satepan, Kedorlaomer uan tekiuanij akin iuan yetoyaj kinteuitoj akin kinixmatij kemej refaím ompa Asterot-Carnaim uan kintankej. No kintankej akin kinixmatij kemej zuzim ompa Cam uan akin kinixmatij kemej emim ompa Savé-Quiryataim.
6 No kintankej akin kinixmatij kemej horeos desde tepemej ompa Seír hasta El-Parán, tein yetok tatenoj den taluakyan.
7 Satepan mokepkej uan ajsikej En-Mispat, tein no monotsa Cadés. Mokuilijkej nochi in tal tein ininaxka katka akin kinixmatij kemej amalequitas. Uan no kintankej akin kinixmatij kemej amorreos akin nemiaj ompa Hazazón-Tamar.
8 Mosenkuikej makuil tekiuanij akin taixyekanayaj Sodoma, Gomorra, Admá, Zeboyim uan Bela, tein no monotsa Zóar. Yejuan yajkej itech se tal tamanis* tein monotsa Sidim uan ompa mosentilijkej para moteuiskej.
9 Iniuan moteuijkej nejin naui tekiuanij: Kedorlaomer akin taixyekanaya Elam, Tidal akin taixyekanaya Goyim, Amrafel akin taixyekanaya Sinar uan Arioc akin taixyekanaya Elasar.
10 Ompa Sidim onkayaj miak uejueyi talkoyokmej* tein kipiayaj chapopote. Uan keman akin taixyekanayaj Sodoma uan Gomorra cholojtoyaj, panuetskej itech nejon talkoyokmej uan sekin cholojkej uan yajkej itech tepemej.
11 Naui tekiuanij mokuilijkej nochi tein kipiayaj akin nemiaj Sodoma uan Gomorra uan nochi in takual tein ompa onkaya uan yajkej.
12 Kemej Lot, isobrino Abrán nemia Sodoma, no kikitskijkej uan kikuilijkej tein kipiaya, uan yajkej.
13 Satepan, se takat akin cholojka kiitato Abrán* uan kitapouij nochi. Ijkuak, Abrán nemia kampa onkayaj uejueyi koujmej tein iaxka Mamré. Mamré katka amorreo uan iikniuan monotsayaj Escol uan Aner. Yejuan uan Abrán mosenpaleuijkej.
14 Niman keman Abrán kimatik ke isobrino* kikitskijkaj, kinsentilij itakeualuan akin kuali tateuiayaj. Katkaj 318 itakeualuan akin yolkaj ichan. Nochin yejuan kintemotoj akin kiuikakaj Lot hasta ajsikej Dan.
15 Keman youakya katka, Abrán kinxejxeloj itakeualuan uan kinteuitoj uan kintankej. Kintokatiajkej hasta Hobá, tein yetok parajkokopa de Damasco.
16 Ijkon Abrán kinkuilij nochi tein kiuikakaj. No kimakixtij Lot,* siuamej uan nochin akin kinuikakaj uan kinkuilij tein kiichtekilijkaj Lot.
17 Abrán mokepak satepan ke kitanik Kedorlaomer uan tekiuanij akin iuan yetoyaj. Uan akin taixyekanaya Sodoma kinamikito Abrán itech tal tamanis* tein moixmati kemej Savé, oso Rey.
18 Uan Melquisedec akin tekiuajtia Salem kimakak Abrán pantsin uan vino. Yejua katka tiopixkat uan kiueyichiuaya Dios akin okachi ueyichiujkej.
19 Yejua kitiochiuak Abrán uan kiluij:
“¡Maj mitstatiochiui Dios akin okachi ueyichiujkej,akin kichijchiuak iluikak uan taltikpak!
20 ¡Maj kiueyitalikan Dios akin okachi ueyichiujkej,akin kichiuak xikintani akin mitstauelitayaj!”.
Uan Abrán kimakak se parte* de nochi tein mokuilito.
21 Satepan, akin taixyekanaya Sodoma kiluij Abrán: “Xinechinmaka akin kinuikakaj uan ximokauili tein timokuilito”.
22 Sayoj ke Abrán kinankilij: “Nimomaajokui uan nimitsyekiluia iixpan Jehová, Dios akin okachi ueyichiujkej uan akin kichijchiuak iluikak uan taltikpak
23 ke amo nimitskuilis nion teyi, nion se hilo nion icorrea se tekak, para amo tikijtos ‘Nejua nikchiuak maj Abrán tominpia’.
24 Sayoj nimitskuilij tein kikuajkejya notakeualuan. Sayoj ke Aner, Escol uan Mamré akin nouan yajkaj maj mokuilikan tein motanilijkej”.
Tajtolmelaualismej
^ Oso “takomol”.
^ Nejin no moixmati kemej mar Muerto.
^ Oso “takomol”.
^ Oso “taltekochmej”.
^ Itech hebreo, “Abrán in hebreo”.
^ Itech hebreo, “iikniuj”.
^ Itech hebreo, “iikniuj”.
^ Oso “takomol”.
