Génesis 16:1-16
-
Agar uan Ismael (1-16)
16 Sarái, isiuatsin Abrán amo kinpiaya konemej. Sayoj ke kipiaya se itakeual akin monotsaya Agar uan katka de Egipto.
2 Yejua ika Sarái kiluij itakatsin: “Abrán, nikneki nimitsiluis teisa. Jehová amo nechkaujtok maj nikinpia konemej. ¿Uelis iuan timotekas notakeual Agar? Porin komo kipia se konetsin, nikitas kemej nokonetsin”. Uan Abrán kichiuak tein Sarái kiluij.
3 Uan Sarái kimakak Abrán itakeual, Agar, para maj iuan monamikti. Nejon panok keman Abrán kiuikayaya majtakti xiuit ompa Canaán.
4 Uan Abrán motekak iuan Agar, uan yejua mokokoxkatalij. Sayoj ke keman Agar kimatik ke kokoxkayetoya, peuak kitauelita Sarái.
5 Yejua ika Sarái kiluij Abrán: “Tejua motajtakol maj notakeual Agar nechtajyouiltijto. Nejua nimitsmakak, sayoj ke keman kimatik ke kokoxkayetoya, peuak nechtauelita. Maj Jehová kijto akoni mopolojtok, tejua oso nejua”.
6 Uan Abrán kiluij Sarái: “Kemej motakeual, uelis tikchiuilis tein tikitas ke okachi kuali”. Yejua ika Sarái kipijpinaujtij Agar, uan yejua choloj.
7 Satepan, iángel Jehová kiitak ke Agar yetoya itech taluakyan, inakastan se ameyal.* Nejin ameyal yetok itech ojti tein teajxitia kampa motanotsa Sur.
8 Yejua kiluij: “Agar, tiitakeual Sarái, ¿kani tiualeua uan kani tiouj?”. Agar kinankilij: “Nikcholuijtok* noteko Sarái”.
9 Iángel Jehová kiluij: “Iuan ximokepa moteko. Amo ximoueyimati* uan xikchiua nochi tein mitsiluis”.
10 Uan iángel Jehová kiluij: “Nikchiuas maj motelmiakilikan mokoneuan. Kemej tel miakej yeskij, amo uelis se kinpouas”.
11 Iángel Jehová no kiluij: “Tikpiati se okichpiltsin. Moneki tiktokaytis Ismael,* porin Jehová kikakik ke titayokolchokatoya.
12 Yejua yeski kemej se burro tein teteuia.* Moteuis iniuan nochin uan nochin kiteuiskej. Nemis taixpan de kampa nemiskej* nochin iikniuan”.
13 Uan Agar kiueyitalij* itokay Jehová, akin iuan tajtojtoya, uan kiluij: “Tejua se Dios akin titachia”. Yejua kijtoj nejon porin kinemilij: “¡Nikitak Dios akin nechita!”.
14 Yejua ika nejon atekoch moixmatik kemej Beer-Lahái-Roí,* tein yetok tatajko de Cadés uan Bered.
15 Satepan, Agar kipiak se iokichpil Abrán, uan Abrán kitokaytij Ismael.
16 Abrán kipiaya 86 xiujmej keman Agar kipiak Ismael.
Tajtolmelaualismej
^ Oso “amel”.
^ Oso “Nikcholouilijtok”.
^ Oso “Amo ximoueyineki”.
^ Tokayit tein kijtosneki ‘Dios tekaki’.
^ Nejin xa no kijtosneki se burro tein iselti nentinemi.
^ Oso xa “Moteuijtos iniuan”.
^ Itech hebreo, “kiteneuak”.
^ Tokayit tein xa kijtosneki “iatekoch akin yoltok uan nechita”.
