Génesis 17:1-27
17 Keman Abrán kipiaya 99 xiujmej, Jehová monextij iixpan uan kiluij: “Nejua niDios akin nikpia nochi chikaualis. Nochipa xinechtakamati uan xiyolchipauak.
2 Nikchiuati tein nimotenkauak mouan uan nikchiuas xikinpia miakej, tel miakej mokoneuan”.
3 Uan Abrán motankuaketsak uan moixpiloj hasta talpan, uan Dios kisentokak kinojnotsak uan kiluij:
4 “Nejua nimotenkauak mouan se taman, uan xikyekmati ke tiyeski ininuejkaujtat akin nemiskej itech miak altepemej.
5 Amo timonotsasok Abrán,* ta axkan timonotsati Abrahán,* porin tiyeski ininuejkaujtat akin nemiskej itech miak altepemej.
6 Nikchiuas xikinpia miakej, tel miakej mokoneuan uan de ompa kisaskej tataman altepemej. Uan seki mokoneuan yeskij tekiuanij.
7 ”Nejua nikchiuas tein nimotenkauak mouan uan iniuan mokoneuan akin yoltiaskej. Tein nimotenkaua uejkauas nochipaya. Niyeski nimoDios uan iDios mokoneuj.*
8 Uan nimitsmakas tejua uan mokoneuan nochi in tal tein poui Canaán, kampa tinemi maski amo moaltepeuj. Uan nochipa yeski namoaxka, uan nejua niyeski ininDios mokoneuan”.
9 Uan no, Dios kiluij Abrahán: “Moneki tikchiuas tein nimotenkauati mouan, tejua uan mokoneuan akin yoltiaskej.
10 Yejua nejin tein nimotenkauati namouan, tein moneki nankichiuaskej tejua uan mokoneuan: moneki nankintekiskej* nochin takamej akin nemiskej namouan.
11 Moneki namotekiskej, uan nejon kinextis tein timotenkaujtokej namejuan uan nejua.
12 Moneki nankintekiskej nochin okichpipiltsitsin chikueyi tonal satepan ke yoliskej. Ijkon moneki nankinchiuiliskej okichpipiltsitsin akin nemiskej namochan uan okichpiltsin oso takat akin nankikouiliskej se analtekoj, maski amo yeski namochankauj. Desde axkan moneki nankichiuaskej nejin.
13 Nochin takamej akin yoliskej mochan uan nochin akin tikinkouas moneki kintekiskej. Kampa namechtekiskej itech namonakayo kinextis tein nimotenkaujtok namouan desde axkan.
14 Komo se takat amo kineki motekis,* moneki kimiktiskej porin amo kinekik kichiuas nejin tein timotenkaujtokej”.
15 Satepan, Dios kiluij Abrahán: “Uan mosiuatsin Sarái* amo xiknotsaok Sarái, porin monotsati Sara.*
16 Nejua niktatiochiuis uan nikchiuas maj no kipia se mokonetsin. Niktatiochiuis uan de ikoneuan kisaskej tataman altepemej. Uan seki ikoneuan yeskij tekiuanij”.
17 Keman kikakik nejon, Abrahán motankuaketsak uan moixpiloj hasta talpan. Uan peuak uetska uan moyoliluia: “Nikpia 100 xiujmej, ¿keniuj nikpiati se konetsin? Uan Sara kipia 90 xiujmej, ¿keniuj uelis kipias se konetsin?”.
18 Yejua ika Abrahán kiluij toTajtsin Dios: “¡Nimitstataujtia xiktatiochiui Ismael!”.
19 Sayoj ke Dios kiluij: “Mosiuatsin Sara kipias se mookichpil uan moneki tiktokaytis Isaac.* Uan no nimotenkauas iuan tein nimotenkaujkaya mouan. Uan nejin kipaleuis nochipaya yejua uan ikoneuan.
20 Uan Ismael no niktatiochiuis kemej tinechtataujtij. Nikchiuas maj kinpia ikoneuan uan maj motelmiakilikan. Yejua yeski inintat 12 taixyekananij uan de ikoneuan nikchiuas maj kisa se ueyi altepet.
21 Maski ijkon, tein ipa nimotenkaujkaya no nimotenkauas iuan Isaac, okichpiltsin tein tikpias iuan Sara okse xiuit. Yejua yolis kemej itech nejin tonalmej”.
22 Satepan ke Dios iuan tajtoj Abrahán, yajki.
23 Uan Abrahán kinsentilij nochin takamej akin nemiaj ichan: Ismael, nochin takamej akin yolkaj ichan uan nochin takamej akin kinkoujka. Uan kintekik* nejon tonal, ijkon kemej Dios kinauatijka.
24 Abrahán kipiaya 99 xiujmej keman kitekkej.
25 Uan Ismael kipiaya 13 xiujmej keman kitekkej.
26 Nejon tonal kitekkej Abrahán uan iokichpil, Ismael.
27 Uan nochin takamej akin nemiaj ichan, akin ompa yolkaj uan akin kinkouilijka se analtekoj, no kintekkej nejon tonal.
Tajtolmelaualismej
^ Tokayit tein kijtosneki ‘tetat akin ueyichiujkej’.
^ Tokayit tein kijtosneki ‘inintat miakej’.
^ Oso “ininDios mokoneuan”.
^ Oso “nankinchiuiliskej circuncisión”. Xikonita circuncisión.
^ Oso “mochiuilis circuncisión”.
^ Tokayit tein xa kijtosneki ‘tanajnankilia’.
^ Tokayit tein kijtosneki ‘isiuapil tekiuaj’.
^ Tokayit tein kijtosneki ‘ueuetska’.
^ Oso “kinchiuilij circuncisión”.
