Génesis 18:1-33
18 Satepan, Jehová monextij iixpan Abrahán kampa yetoyaj uejueyi koujmej ompa Mamré. Katka nepantaj, keman okachi takauania uan Abrahán tokotsyetoya ikaltenoj.*
2 Keman moixajokuik, kiitak ke nepakatsin ijkatoyaj eyi takamej. Keman kinitak, niman kisteuak kinnamikito uan motankuaketsak uan moixpiloj hasta talpan.
3 Uan kijtoj: “Jehová, komo nimitsyolpaktia, nimitstataujtia xipano nokalijtik.
4 Nitanauatiti maj kiualkuikan tepitsin at para namechmetspajpakaskej. Uan satepan uelis namoseuiskej ne koujtampa.
5 Kemej nanechitakoj, maj namechkuiliti tepitsin pantsin para ximoyolkuikan. Satepan uelis nanyaskej”. Yejuan kinankilijkej: “Kemaj, kuali yetok”.
6 Yejua ika Abrahán niman kalakito kalijtik kitemoto Sara uan kiluij: “¡Ximoijsiuili! Xikui 12 kilos* de harina tein okachi kuali, xikatili uan xikchijchiua seki pantsitsin”.
7 Uan Abrahán motaloj kampa yetoyaj itapialuan, kikuito se kuali kuakouej, tein yekin moskaltijtoya, uan kimakak se itakeual uan yejua niman kichijchiuato.
8 Satepan kikuik mantequilla,* leche uan kuakuejnakat tein chijchiujtoyaya uan kintamakak. Keman yejuan takuajtoyaj koujtampa, Abrahán ompa ijkatoya para kinmakas tein monekiskia.
9 Uan yejuan kitajtanijkej* Abrahán: “¿Kani yetok mosiuatsin Sara?”. Uan yejua kinnankilij: “Yetok ne kalijtik”.
10 Semej nejon takamej kiluij: “Xikyekmati ke okse xiuit oksepa niualas kemej itech nejin tonalmej uan mosiuatsin Sara kipias se okichpiltsin”. Uan Sara ualtakaktoya kaltenoj, tein yetoya taikankopa den takat.
11 Ijkuak, Abrahán uan Sara semi xiuejkejya katkaj. Uan panokaya xiujmej keman Sara ueliskia kinpias konemej.
12 Yejua ika Sara peuak yoluetska uan moluiaya: “Axkan ke ninanajtsinya uan noteko tatajtsinya, ¿xe uelisok nikpias nejin tatiochiualis?”.
13 Uan Jehová kiluij Abrahán: “¿Keyej uetskak Sara? ¿Keyej kinemilia ke amo uelisok kipias se konetsin?
14 Jehová nochi ueli kichiua ¿oso timoluia ke amo? Okse xiuit oksepa niualas kemej itech nejin tonalmej uan Sara kipias se okichpiltsin”.
15 Sayoj ke, kemej Sara momoujtij kijtoj: “¡Amo melauj! ¡Amo niuetskak!”. Uan Dios kiluij: “Kemaj, kemaj tiuetskak”.
16 Uan takamej moketskej para yaskej. Abrahán tepitsin kinnalkauato uan yejuan pantachiakej Sodoma.
17 Uan Jehová kijtoj: “Okachi kuali maj nikilui Abrahán tein nikchiuati.
18 De ikoneuan Abrahán kisas se ueyi altepet uan amo akin kintanis, uan itechkopa nikintatiochiuis* akin nemij itech nochin altepemej.
19 Nejua Jehová kuali nikixmati Abrahán uan nikyekmati ke kinnauatis ikoneuan uan nochin ichankauan akin yoliskej satepan maj nemikan kemej nikneki, uan maj kichiuakan tein kuali yetok. Ijkon nejua Jehová, nikchiuas tein nimotenkauak iuan”.
20 Yejua ika Jehová kijtoj: “Nikakini keniuj miakej semi chikauak motsajtsiliaj porin akin nemij Sodoma uan Gomorra fiero tajtakolchiuaj.
21 Nikitati para nikmatis ox melauj tein nikakini uan ox melauj kichiujtokej tein tel amo kuali. Nikneki nikmatis”.
22 Uan takamej kiskej de ompa uan yajkej Sodoma, sayoj ke Jehová mokauak iuan Abrahán.
23 Uan Abrahán motokij uan kiluij: “¿Yekmelauj tikinixpoloti akin yolkualmej* iniuan akin amo yolkualmej?
24 Maj tikijtokan ke itech ueyi xolal yetokej 50 akin yolkualmej. Maski ijkon, ¿tikinixpolos nochin? ¿Amo tikintapojpoluis akin ompa nemij komo onkaskiaj 50 akin yolkualmej?
25 ¡Tejua amo keman tikmiktiskia akin yolkuali iuan akin amo yolkuali! ¡Tejua amo tikauaskia maj nochin sekosan tamitij! Amo keman tikchiuaskia nejon. Tejua tiJuez akin okachi ueyichiujkej itech nochi taltikpak, ¿xe tikchiuati tein amo kuali yetok?”.
26 Uan Jehová kiluij: “Komo itech ueyi xolal Sodoma nikinajsi 50 akin yolkualmej, nikintapojpoluis nochin akin ompa nemij”.
27 Maski ijkon, Abrahán kinankilij: “Jehová, maski nikmati ke amo teyi nichiujkej, ta sayoj nitakat,* niknekiok nimitsiluis teisa.
28 Maj tikijtokan ke sayoj yetokej 45 akin yolkualmej. ¿Tikinixpolos nochin akin nemij itech ueyi xolal sayoj porin poliuij makuilimej?”. Uan Dios kinankilij: “Amo nikinixpolos komo nikinajsi 45”.
29 Uan Abrahán oksepa kitajtanij: “¿Uan komo yetokej 40?”. Dios kinankilij: “Komo yetokej 40 amo nikinixpolos”.
30 Abrahán oksepa kiluij: “Jehová, amo xikualani, sayoj ke nimitsiluitiok teisa. ¿Uan komo tikinajsi sayoj 30?”. Dios kinankilij: “Komo nikinajsi 30 amo nikinixpolos”.
31 Uan Abrahán oksepa kiluij: “Jehová, niknekiok nimitstajtanis teisa. ¿Uan komo sayoj yetokej 20 akin yolkualmej?”. Dios kinankilij: “Komo yetokej 20 amo nikinixpolos”.
32 Uan Abrahán oksepa kiluij: “Jehová, amo xikualani, maj nimitsilui sayoj se taman uan amo nitajtosok. ¿Uan komo tikinajsi sayoj majtak?”. Dios kinankilij: “Komo nikinajsi majtak amo nikinixpolos”.
33 Satepan ke Jehová iuan tajtoj Abrahán, yajki. Uan Abrahán mokepak ichan.
Tajtolmelaualismej
^ Nejin kaltsin chijchiujtoya ika tasal (tilmaj).
^ Itech hebreo, “eyi sea”. Xikonita B14.
^ Nejin katka leche tein tetsauak.
^ Oso “kitajtoltijkej”.
^ Oso “motaniliskej se tatiochiualis”.
^ Oso “kichiuaj tein kuali yetok”.
^ Itech hebreo, “nitalnex uan nikoujnex”.
