Génesis 21:1-34
21 Jehová kitatiochiuij Sara ijkon kemej kijtojka, uan Jehová kichiuak tein motenkaujka.
2 Yejua ika Sara mokokoxkatalij uan kipiak se iokichpil Abrahán, keman yejua tatajtsinya katka. Konetsin yolik itech tonalmej keman Dios kiluij Abrahán ke yoliskia.
3 Abrahán kitokaytij Isaac konetsin tein Sara kipiak.
4 Uan Abrahán kitekik* Isaac chikueyi tonal satepan ke yolik, ijkon kemej Dios kinauatijka.
5 Abrahán kipiaya 100 xiujmej keman yolik Isaac.
6 Uan Sara kijtoj: “Dios kichiuak maj niyolpaki uan maj niuetska, uan akin kitekakilis ke nikpiak se konetsin, uetskas nouan”.*
7 Uan no kijtoj: “Amo akin kinemiliskia kiluis Abrahán ke nejua nikchichitiskia se konetsin. Sayoj ke nikpiak se iokichpil maski yejua tatajtsinya”.
8 Uan okichpiltsin moskaltij uan inan amo kichichitijok. Itech tonal keman Isaac amo kichichitijkejok, Abrahán kichiuak se ueyi tatakualis.
9 Sayoj ke Sara kiitaya ke iokichpil Agar kikejkelouaya Isaac. Nejin okichpil yejua tein Abrahán kipiak iuan Agar, akin kayot Egipto.
10 Yejua ika Sara kiluij Abrahán: “¡Xiktoka* nejon takeual uan iokichpil! Tein moaxka sayoj yeski iaxka nookichpil Isaac, amo para iokichpil nejon takeual”.
11 Sayoj ke Abrahán semi kiyolkokoj tein Sara kiluij de Ismael.
12 Uan Dios kiluij Abrahán: “Amo ximoyolkoko. Xikaki tein Sara kijtoua de mookichpil uan de Agar, porin mokoneuan ualaskej itechkopa Isaac.
13 Sayoj ke nikchiuas maj ikoneuj Agar no kinpia miakej ikoneuan uan de ompa kisas se altepet, porin yejua no mookichpil”.
14 Yejua ika Abrahán semi kualkan meuak, kikuik takual uan se kuetaxbolsa ika at uan kimamaltij Agar. Abrahán monauatij iuan Agar uan iokichpil. Uan Agar yajki uan nentinemik itech taluakyan tein yetok Beer-Seba porin amo kimatia kani yas.
15 Satepan, at tein kiuikaya tamik uan kikauak iokichpil koujtampa.
16 Kisentokak nejnemik uan motalito tepitsin nepaka, porin moluiaya: “Amo nikneki nikitas keniuj momikilia nokonetsin”. Uan peuak tayokolchoka.
17 Uan Dios kikakik ke in okichpil chokatoya uan desde ne iluikak iángel Dios kiluij Agar: “¿Keyej tichokatok Agar? Amo teyi ximolui, porin Dios kikakik mookichpil.
18 Ximoketsa uan xikpaleui mookichpil maj moketsa uan maj nejnemi, porin de ikoneuan nikchiuas maj kisa se ueyi altepet”.
19 Uan Dios kichiuak maj kiita se atekoch. Yejua ika ompa kipexontito* ikuetaxbolsa uan kimakak iokichpil maj tayi in at.
20 Uan Dios kiyekpiak Ismael ijkon kemej moskaltijtiaya. Yejua nemik taluakyan uan satepan momachtij kuali kitamotas flechas.
21 Ismael nemito taluakyan tein monotsa Parán. Uan imomaj kitemolij se siuat de Egipto para maj iuan monamikti.
22 Itech nejon tonalmej, Abimélec uan Ficol, akin kinixyekanaya isoldados, kinojnotsatoj Abrahán. Abimélec kiluij: “Dios mitspaleuia itech nochi tein tikchiua.
23 Yejua ika axkan xinechyekilui itokaykopa Dios ke amo teyi tinechchiuilis nejua, nion nokoneuan nion noixuiuan. No xinechyekilui ke tiknextis ke tinechtasojta nejua uan akin nemij kampa tejua tinentok, ijkon kemej nejua niknextiani ke nimitstasojta”.
24 Uan Abrahán kiluij: “Kemaj, nimitsyekiluia ke ijkon nikchiuas”.
25 Sayoj ke Abrahán kiluij Abimélec ke itakeualuan kikuilijkaj se atekoch.
26 Uan Abimélec kinankilij: “Amo nikmati akoni kichiuak nejon. Amo teyi tinechiluijtoya, hasta yekintsin nikmati”.
27 Uan Abrahán kikuik seki ichkamej* uan kuakuejmej uan kimakak Abimélec. Uan omen motenkaujkej se taman.
28 Keman Abrahán kinxeloj chikome ichkatsitsin,
29 Abimélec kitajtanij:* “¿Keyej tikinxeloj nejin chikome ichkatsitsin?”.
30 Abrahán kinankilij: “Nikneki xikinkui nejin ichkatsitsin. Nejin kinextis ke nejua nikchijchiuak nejin atekoch”.
31 Yejua ika, kampa yetoyaj tatokaytij Beer-Seba,* porin ompa motenkaujkej se taman.
32 Uan satepan ke motenkaujkej ompa Beer-Seba, Abimélec uan Ficol mokepkej itech inintal akin kinixmatij kemej filisteos.
33 Satepan, Abrahán kitokak ompa Beer-Seba se kouit tein monotsa tamarisco. Ompa kiteneuak itokay Jehová, Dios akin nochipa nemi.
34 Uan Abrahán nemik miak xiujmej itech inintal filisteos.
Tajtolmelaualismej
^ Oso “kichiuilij circuncisión”. Xikonita circuncisión.
^ Oso xa “nechuetskilis”.
^ Oso “Xikeualti”.
^ Oso “kitemitito”.
^ Oso “borregos”.
^ Oso “kitajtoltij”.
^ Tokayit tein xa kijtosneki ‘atekoch kampa motenkaujkej’ oso ‘atekoch den chikome ichkamej’.
