Génesis 24:1-67
24 Abrahán tel tatajtsinya katka uan Jehová semi kitatiochiuijka.
2 Se tonal, Abrahán tajtoj iuan itakeual akin okachi xiuejya katka uan kiitaya nochi tein kipiaya. Abrahán kiluij: “¿Uelis timotenkauas se taman nouan?*
3 Nikneki xinechyekilui itokaykopa Jehová, Dios akin taixyekana ne iluikak uan taltikpak ke amo tiktemolis nookichpil se siuat de nikan Canaán kampa ninentok.
4 Nikneki xiouj kampa nikayot uan ompa xiktemo se nopariente para maj iuan monamikti nookichpil Isaac”.
5 Sayoj ke itakeual kiluij: “¿Uan toni nikchiua komo siuat amo kineki nouan ualas? ¿Tikneki maj ompa nikuika mookichpil?”.
6 Abrahán kinankilij: “Nion xiknemili tikuikas nookichpil ompa.
7 Jehová, Dios akin taixyekana ne iluikak, nechnauatij maj nikisa de ichan nopaj uan kampa nemij noparientes. Uan no nechyekiluij: ‘Nejin tal nikinmakas mokoneuan’. Yejua kititanis iángel para maj mitsyekantiuj, uan xikyekmati ke ompa tikajxilis nookichpil se siuatsin.
8 Sayoj ke, komo siuatsin amo kineki mouan ualas, amo monekisok tikchiuas nion teyi. Sayoj ke amo xikuika nookichpil ompa”.
9 Uan takeual motenkauak iuan Abrahán uan kiyekiluij ke kichiuaskia nochi tein kiluijka.
10 Yejua ika itakeual kinkuik majtakti camellos uan iteko kimakak miak taman tein kuajkuali uan yajki ueyi xolal Nacor, ompa Mesopotamia.
11 Keman ajsik, moketsak itech se atekoch tein yetoya ueyi xolaltenoj para maj icamellos moseuianij. Tiotakya katka uan kemej nejon hora siuamej yayaj atakuitij.
12 Uan takeual kiluij Dios: “Jehová, iDios noteko Abrahán, nimitstataujtia xikchiua maj kuali kisa nochi tein nikchiuas axkan. Xiknextili noteko Abrahán ke semi tiktasojta.
13 Nietok itech nejin ameyal,* uan ichpochmej akin nikan nemij atakuikij.
14 Nikiluiti semej ichpochmej ‘¿Uelis tiktemouis motsotsokol para maj nitayi at?’, uan komo yejua kijtoua ‘Kemaj xitayi, uan no nikinualkuiliti at mocamellos’, nejon nechmatiltis ke yejua akin tikijitak* para motekitikauj Isaac. Uan ijkon tinechmatiltis ke semi tiktasojta noteko”.
15 Achto ke tamitajtoskia, Rebeca kisak den ueyi xolal uan kiualkuia se tsotsokol iajkolko. Yejua katka isiuapil Betuel, uan Betuel katka iokichpil Milcá, isiuatsin Nacor. Nacor katka iikniuj Abrahán.
16 Rebeca tel kuakualtsin katka uan ayamo motekaya iuan se takat. Yejua temok kampa yetoya ameyal,* kipexontij* itsotsokol uan oksepa pankisak.
17 Uan itakeual Abrahán motaloj, kiajsito uan kiluij: “¿Uelis tinechmakas tepitsin at tein tikuika itech motsotsokol?”.
18 Uan yejua kinankilij: “Kemaj tejuatsin”. Yejua niman kitemouij itsotsokol uan peuak kimaka at.
19 Satepan ke kimakak at, Rebeca kiluij: “No nikixtiti at para maj mocamellos tayikan nochi tein monekis”.
20 Nimantsin kitekak at tein kipiaya itsotsokol kampa atayiaj tapialmej uan tsitsikuinik kikikixtito at. Kisentokak kikikixtij para nochin camellos.
21 Keman Rebeca asakatoya, nejon takat kisenitstoya uan motajtaniaya ox Jehová kipaleuijtoya maj kuali kisa tein ika yajka.
22 Keman camellos tamiatikej, in takat kimakak Rebeca se anillo de oro para iyekatsol uan ome pulseras de oro. Anillo kipiaya kemej chikuasen gramo,* uan pulseras 114 gramos.*
23 Uan kiluij: “¿Uelis tinechiluis akoni mopaj? ¿Takaujtos namochan para ompa timokauaskej nejin youak?”.
24 Rebeca kinankilij: “Nopaj Betuel, noueyinan Milcá uan noueyitat Nacor”.
25 Uan no kiluij: “Kemaj tikpiaj kani namokauaskej nejin youak. No tikpiaj sakat tein uakik uan miak takual para motapialuan”.
26 Uan takat motankuaketsak uan moixpiloj hasta talpan uan kitasojkamatilij Jehová.
27 Uan kijtoj: “Maj kiueyitalikan Jehová, iDios noteko Abrahán, porin kinextiani ke semi kitasojta noteko, uan nochipa kichiuani tein kiluiani. Jehová nechualkuik hasta kampa nemij iparientes noteko”.
28 Uan Rebeca niman kisteuak kitapouito imomaj uan ichankauan nochi tein panoka.
29 Rebeca kipiaya se iikniuj akin monotsaya Labán. Yejua niman kisteuak kiitato in takat akin yetoya itech ameyal.*
30 Labán kiitak ke iikniuj kipiaya se anillo iyekatsolko uan ome pulseras imako, uan no kikakik ke kijtoj “Yejua nejon tein nechiluij in takat”. Yejua ika niman kiitato nejon takat akin yetoyaok itech ameyal iuan icamellos.
31 Uan niman kiluij: “Xiuiki nochan. Jehová mitstatiochiuijtok. ¿Keyej tiksentoka ampon uan amo tikalaki? Nitanauatijya maj tayektalikan kampa timokauas tejua uan kampa mokauaskej mocamellos”.
32 Yejua ika in takat kalakik kalijtik uan Labán kintatemouilij camellos, kinmakak sakat tein uakik uan okseki taman para maj takuakan. No kiuikilij at in takat uan takamej akin iuan yayaj para maj mometspajpakakan.
33 Keman kitakualtekijkej, in takat kijtoj: “Nitakuas hasta maj namechilui keyej niualaj”. Yejua ika Labán kiluij: “Xitechilui”.
34 Uan takat kiniluij: “Nejua niitakeual Abrahán.
35 Jehová semi kitatiochiuiani noteko. Kichiuak maj tel tominpia porin kimakak ichkamej,* kuakuejmej, camellos, burros, plata, oro uan miakej takeualmej.
36 Uan Sara, isiuatsin noteko kipiak se okichpil keman semi nanajtsinya katka, uan noteko kikauilis iokichpil nochi tein kipia.
37 Yejua nechiluij maj nimotenkaua se taman iuan. Uan nechiluij: ‘Amo xiktemoli nookichpil se siuat de nikan Canaán kampa ninentok,
38 ta xiouj kampa nemij ichankauan nopaj uan ompa xiktemoli se’.
39 Sayoj ke nejua nikiluij noteko: ‘¿Uan toni nikchiua komo siuat amo kineki nouan ualas?’.
40 Uan yejua nechiluij: ‘Nejua niktekitiliani Jehová, uan yejua kititanis iángel mouan para maj mitspaleui. Moneki tias kampa nemij noparientes uan tiktemos se ichankauj nopaj para maj iuan monamikti nookichpil.
41 Komo tiouj ompa uan yejuan amo kinekij mitsmakaskej in siuat, amo monekisok tikchiuas nion teyi’.
42 ”Yejua ika, keman yeua niejkok ne ameyal, nikiluij Dios: ‘Jehová, iDios noteko Abrahán, komo tinechpaleuiti maj kuali kisa tein nikchiuako,
43 xikchiua maj pano tein nimitstajtaniti. Nikan nietok itech se ameyal. Keman se ichpoch atakuikiuj, nejua nikiluis: “¿Uelis tinechmakas tepitsin at tein tikuika itech motsotsokol?”.
44 Komo yejua nechiluia “Kemaj, uan no nikixtiti at para maj tayikan mocamellos”, yejua yeski siuat akin tejua, Jehová, tikijitak* para iokichpil noteko’.
45 ”Uan achto ke nitamitajtoskia, Rebeca kistoyaya den ueyi xolal uan kiualkuia se tsotsokol iajkolko. Yejua temok kampa yetok ameyal uan peuak kikixtia at. Uan nejua nikiluij: ‘¿Uelis tinechuantis tepitsin at?’.
46 Uan yejua niman kitemouij itsotsokol uan nechiluij: ‘Xitayi, uan no nikinualkuiliti at mocamellos’. Yejua ika nitayik, uan no kiualkuik at para camellos.
47 Satepan niktajtanij:* ‘¿Akoni mopaj?’. Rebeca nechnankilij: ‘Nopaj Betuel, noueyinan Milcá uan noueyitat Nacor’. Uan nikyekatsoltalilij anillo uan nikmakalakilij pulseras.
48 Satepan nimotankuaketsak uan nimoixpiloj hasta talpan, niktasojkamatilij Jehová uan nikueyitalij Jehová, iDios noteko Abrahán, akin nechixyekanak hasta kampa nemi iixuiuj* Nacor, iikniuj noteko para nikuikilis iokichpil Abrahán nejon siuat.
49 Uan axkan xinechiluikan ox nankinekij nankinextiskej ke nankitasojtaj noteko uan ox nankichiuaskej tein kineki. Komo amo nankinekij, no xinechiluikan para nikmatis toni nikchiuas”.
50 Labán uan Betuel kinankilijkej: “Jehová kichiuak maj pano nochi nejin. Yejua ika tejuan amo uelis tikijtoskej kemaj oso amo.
51 Nikan yetok Rebeca. Xikuika uan maj iuan monamikti iokichpil moteko, ijkon kemej Jehová kijtoj”.
52 Keman itakeual Abrahán kikakik nejon niman motankuaketsak uan moixpiloj hasta talpan uan kitasojkamatilij Jehová.
53 Uan takeual peuak kimaka Rebeca seki taman tein chijchiujtoya ika oro, plata uan tasal.* No kitayokolij Labán uan imomaj seki taman tein kuajkuali.
54 Satepan, yejua uan takamej akin iuan yetoyaj takuajkej uan tatayikej uan ompa mokaujkej nejon youak.
Mostika kualkan keman meuak kijtoj: “Xinechkauakan maj nimokepa iuan noteko”.
55 Sayoj ke Labán uan imomaj kiluijkej: “Xikaua maj Rebeca touan yetook maski sayoj majtakti tonal. Satepan uelis yas”.
56 Sayoj ke yejua kinnankilij: “Amo xinechtsakuilikan porin Jehová nechpaleuij maj kuali kisa tein ika niualaj. Xinechkauakan maj nimokepa iuan noteko”.
57 Uan yejuan kijtojkej: “Maj tiknotsakan Rebeca uan maj tiktajtanikan toni kinemilia”.
58 Yejua ika kinotskej uan kitajtanijkej: “¿Tikneki tias iuan nejin takat?”. Yejua kijtoj: “Kemaj, nikneki nias”.
59 Yejua ika kikaujkej maj Rebeca* yani iuan itakeual Abrahán uan takamej akin iuan yayaj. No iniuan yajki siuat akin kiiskaltijka* Rebeca.
60 Uan kitiochiujkej uan kiluijkej: “Rebeca, xikinpia tel miak millones mokoneuan uan maj yejuan kinkuilikan ininxolaluan akin kintauelitaj”.
61 Satepan, Rebeca uan itakeualuan siuamej mokuijkuikej, moajkotalijkej itech camellos uan kitojtokakej* in takat. Ijkon takat kiuikak Rebeca.
62 Isaac mokepkaya den ojti tein teuika hasta Beer-Lahái-Roí, porin nemia itech tal kampa moixmati kemej Négueb.
63 Uan keman tapoyaujtoyaya, Isaac nentinemia kalampa para tanemilis. Keman moixajokuik, kiitak ke nepaka ualayaj seki camellos.
64 Rebeca no moixajokuik uan kiitak Isaac. Nimantsin temok den camello.
65 Uan kitajtanij in takeual: “¿Akoni ne takat akin technamikiki?”. Takeual kinankilij: “Ne takat noteko”. Yejua ika Rebeca kikuik ichal uan motalilij.
66 Uan takeual kitapouij Isaac nochi tein kichiujka.
67 Satepan Isaac kiuikak Rebeca itech kaltsin* kampa nemia Sara. Ijkon kikuik Rebeca kemej isiuatsin. Isaac kitasojtak Rebeca uan nejon kipaleuij maj amo motayokoltijtook porin momikilijka imomaj.
Tajtolmelaualismej
^ Itech hebreo, “tiktalis momay nokestampa”. Ijkon kinextiayaj ke yekmelauj kichiuaskiaj tein motenkauayaj.
^ Oso “amel”.
^ Oso “tikixpejpenak”.
^ Oso “amel”.
^ Oso “kitemitij”.
^ Itech hebreo, “se beka”. Xikonita B14.
^ Itech hebreo, “majtakti siclo”. Xikonita B14.
^ Oso “amel”.
^ Oso “borregos”.
^ Oso “tikixpejpenak”.
^ Oso “niktajtoltij”.
^ Itech hebreo, “isiuapil”.
^ Oso “tilmaj”.
^ Itech hebreo, “ininikniuj Rebeca”.
^ Oso “kichichitijka”. Nejin siuat kichichitijka Rebeca uan axkan katka itakeual.
^ Oso “kitoktilijkej”.
^ Nejin kaltsin chijchiujtoya ika tasal (tilmaj).
