Génesis 30:1-43
30 Keman Raquel kiitak ke amo uelia kinpiaya konemej uan Lea kemaj, peuak kualani uan kiluia Jacob: “Xikchiua maj nikinpia konemej. Komo amo nimikiti”.
2 Jacob tel kualanik iuan Raquel uan kiluij: “Nejua amo niDios. Yejua kichiujtok amo ueli xikinpia konemej”.
3 Yejua ika Raquel kiluij: “Nikan yetok notakeual Bilhá. Iuan ximoteka, uan xikinpia konemej iuan. Porin komo kinpia, nikinitas kemej nokoneuan”.
4 Yejua ika kimakak itakeual akin monotsaya Bilhá, uan Jacob iuan motekak.
5 Bilhá mokokoxkatalij uan kipiak se iokichpil Jacob.
6 Uan Raquel kijtoj: “Dios mochiuak kemej nojuez uan no nechkakik. Yejua ika nechmakak se okichpiltsin”. Uan kitokaytij Dan.*
7 Uan Bilhá oksepa mokokoxkatalij uan kipiak okse iokichpil Jacob.
8 Uan Raquel kijtoj: “Semi nimochikauani para nimotatanis iuan nokniuj. ¡Uan nitatanik!”. Yejua ika kitokaytij Neftalí.*
9 Keman Lea kiitak ke amo kinpiayaok konemej, kimakak Jacob itakeual akin monotsaya Zilpá.
10 Uan Zilpá kipiak se iokichpil Jacob.
11 Uan Lea kijtoj: “¡Semi nitatiochiual!”. Yejua ika kitokaytij Gad.*
12 Satepan, Zilpá kipiak okse iokichpil Jacob.
13 Uan Lea kijtoj: “¡Nitelyolpaki! Axkan siuamej kijtoskej ke niyolpaki”. Yejua ika kitokaytij Aser.*
14 Se tonal, Rubén nentinemia koujtaj uan kiajsik seki takilot tein monotsa mandrágora uan kiuikilij inan. Nejon panok itech tonalmej keman kitekiaj trigo. Uan Raquel kiluij Lea: “¿Uelis tinechmakas takilot tein kiajsik mookichpil?”.
15 Sayoj ke Lea kinankilij: “¿Toniok tikneki? Ipa tinechkuilijya notakatsin, ¿uan axkan no tikneki tinechkuilis takilot tein kiajsik nookichpil?”. Uan Raquel kinankilij: “Maj tikchiuakan nejin. Komo tinechmaka takilot tein kiajsik mookichpil, Jacob mouan kochis nejin youak”.
16 Keman tapoyauik, Jacob mokepak den ixtauat uan Lea kinamikito uan kiluij: “Nejin youak nouan timotekati, porin niktaxtauij Raquel ika takilot tein kiajsik nookichpil para uelis nouan timotekas”. Yejua ika nejon youak iuan motekak Lea.
17 Uan Dios kikakik tein Lea kitajtanij. Yejua mokokoxkatalij uan kipiak okse iokichpil Jacob. Ika nejin katkaj makuilimejya.
18 Uan Lea kijtoj: “Dios nechtaxtauij porin nikmakak notakatsin notakeual Zilpá”. Yejua ika kitokaytij Isacar.*
19 Satepan, Lea oksepa mokokoxkatalij uan kipiak okse iokichpil Jacob. Katkaj chikuasemejya.
20 Lea kijtoj: “Dios nechtayokolij se taman tein tel kuali. Axkan kemaj notakatsin nechxikosya,* porin nikinpiakya chikuasen iokichpipiluan”. Yejua ika kitokaytij Zabulón.*
21 Uan satepan kipiak se siuapil uan kitokaytij Dina.
22 Sayoj ke Dios amo ijkon kikauak* Raquel. Kikakik tein kitajtanij uan kichiuak maj mokokoxkatali.
23 Yejua ika mokokoxkatalij, kipiak se okichpiltsin uan kijtoj: “Dios kichiuak maj amo nechpinaujtikanok”.
24 Yejua ika kitokaytij José,* uan kijtoj: “Jehová nechmakak okse okichpil”.
25 Niman keman Raquel kipiak José, Jacob kiluij Labán: “Xinechkaua maj nimokepa nochan itech altepet kampa ninemia.
26 Maj nikinuika nosiuauan uan nokoneuan. Nimointanilij porin niteltekitik. Tejua kuali tikmati keniuj nimitstekitiliani”.
27 Uan Labán kiluij: “Nimitstataujtia, ximokaua. Nikitani miak taman tein nechmatiltia ke Jehová nechtatiochiuijtok por tejua”.
28 Uan no kijtoj: “Xinechilui kanachi tikneki maj nimitstaxtaui uan nimitsmakas”.
29 Jacob kinankilij: “Tejua tikmattok keniuj nimitstekitiliani uan keniuj nikinyekpiani motapialuan.
30 Achto ke niejkoskia, semi tepitsin tikpiaya, sayoj ke axkan semi momiakilijkejya motapialuan. Desde ke niejkok Jehová mitstatiochiuiani. Uan axkan nikuelitaskia nikinpaleuisya nochankauan”.
31 Uan Labán kitajtanij:* “¿Toni tikneki maj nimitsmaka?”. Jacob kinankilij: “¡Amo teyi xinechmaka! Komo tinechpaleuia kemej nimitsiluiti, niksentokas nikinuikatinemis motapialuan uan nikinyekpias.
32 Axkan nipanos kampa yetokej nochin motapialuan, uan tejua tikinxelos ichkamej* tein pintojtikej uan ichkaueuetkej tein kafentikej uan yekin moskaltijtokej. Uan no tikinxelos sejse chivojlamat tein pintojtik. Uan desde axkan, ika tinechtaxtauis nochin tapialmej tein ijkon yoltiaskej.
33 Uan satepan, keman tikinitakiuj notapialuan tikitas ke nikchiujtok tein nimitsiluij. Komo tikita ke nikpia se chivojlamat tein amo pintojtik oso se ichkaueuet tein amo kafentik, uelis tikijtos ke nimitstachtekij”.
34 Yejua ika Labán kiluij: “¡Kemaj! Kuali yetok”.
35 Uan nejon tonal, Labán kinxeloj sejse chivojueuet tein kuikuiltik uan pintojtik uan sejse chivojlamat tein pintojtik. Kinxeloj nochin tapialmej tein amo tamitiltikej katkaj uan nochin ichkaueuetkej tein kafentikej uan yekin moskaltijtoyaj. Uan kinnauatij ikoneuan maj kinyekpiakan nejin tapialmej.
36 Satepan, Labán kinuikak itapialuan uejka uan nejnemik eyi tonal, uan Jacob mokauak para kinyekpias okseki itapialuan Labán.
37 Uan Jacob kikuik seki kouit tein xoxouikok uan kixijxipeuak* tepitsin para maj nesi kuikuiltik. Kouit tein kikuik monotsa estoraque, almendro uan plátano oriental.*
38 Satepan, kitalij kouit tein kixijxipeujka* kampa kiojtiayaj at uan kampa tapialmej atiaj. Ijkon, keman atiskiaj motemoliskiaj tapialueuet ompa taixpan.
39 Uan tapialmej motemoliayaj tapialueuet taixpan den kouit tein Jacob kitalijka, uan tapialmej tein yoliaj katkaj kuikuiltikej uan pintojtikej.
40 Uan Jacob kinxelouaya ichkaueuetkej tein yekin moskaltijtoyaj uan kichiuaya maj tapialmej kinitanij itapialuan Labán tein kuikuiltikej uan kafentikej. Uan kinxelojtiaya itapialuan para maj amo momanelouanij iuan itapialuan Labán.
41 Uan nochipa keman tapialmej tein okachi chikaujkej motemoliayaj tapialueuet, Jacob kitaliaya kouit tein kixijxipeujka* kampa kiojtiayaj at para maj kiitanij.
42 Sayoj ke komo tapialmej amo chikaujkej katkaj amo kitaliaya kouit ompa. Yejua ika, tapialmej tein amo chikaujkej nochipa katkaj para Labán, uan tein chikaujkej para Jacob.
43 Yejua ika Jacob tel tominpiak. Kinpiak tel miak ichkamej uan chivos, camellos uan burros. Uan no kitekitiliayaj miakej takamej uan siuamej.
Tajtolmelaualismej
^ Tokayit tein kijtosneki ‘juez’.
^ Tokayit tein kijtosneki ‘nimotatanini’, ‘nimochikauani’.
^ Tokayit tein kijtosneki ‘ueyi tatiochiualis’.
^ Tokayit tein kijtosneki ‘yolpaki’.
^ Tokayit tein kijtosneki ‘yejua se taxtauil’.
^ Oso “nechijyouisya”.
^ Tokayit tein kijtosneki ‘texikoua’.
^ Itech hebreo, “Dios kielnamikik”.
^ Tokayit ajsitok moijtoua Josifías, tein kijtosneki ‘maj Jah temaka okachi’.
^ Oso “kitajtoltij”.
^ Oso “borregos”.
^ Oso “kixijximak”.
^ Nejin amo yejua tein tikixmatij kemej pajpata oso xochijkual.
^ Oso “kixijxinka”.
^ Oso “kixijxinka”.
