Génesis 31:1-55
31 Satepan, Jacob kimatik ke ikoneuan Labán kijtojtinemiaj nejin: “Jacob kikuilij topaj nochi tein katka iaxka, uan yejua ika axkan tominpia”.
2 Uan keman Jacob kiixitaya Labán, kiitaya ke amo kiyekitayaok kemej achto.
3 Satepan, Jehová kiluij Jacob: “Ximokepa kampa nemia moueyitat uan kampa nemij mopaj uan moparientes. Nejua niksentokas nimitspaleuis”.
4 Yejua ika Jacob tanauatij maj kiniluitij Raquel uan Lea maj kiajsitij ixtauat kampa yetoya iniuan itapialuan.
5 Uan kiniluij:
“Nikitani ke namopaj amo nechyekitaok kemej achto. Sayoj ke Dios akin nopaj kitekitilia nechpaleuiani.
6 Namejuan kuali nankimatij ke niktekitiliani namopaj hasta kampa niuelini.
7 Uan maski yejua kitemouani nechkajkayauas uan majtakpa nechpatilij notaxtauil, Dios amo kikauani maj teisa nechchiuili.
8 Komo yejua nechiluiaya ‘Nimitstaxtauis ika tapialmej tein pintojtikej’, nochin tapialmej yoliaj pintojtikej. Sayoj ke komo nechiluiaya ‘Nimitstaxtauis ika tapialmej tein kuikuiltikej’, nochin tapialmej yoliaj kuikuiltikej.
9 Yejua ika Dios kinkuiliani itapialuan uan nechinmakani nejua.
10 Se tonal, keman tapialmej motemolijtoyaj tapialueuet, nikochitak* ke sejse chivojueuet tein kipiluajtiaya chivojlamat, katka kuikuiltik uan pintojtik.
11 Uan iángel toTajtsin Dios nechiluij keman nitakochitstoya:* ‘¡Jacob!’. Nejua niknankilij: ‘Nikan nietok’.
12 Uan yejua nechiluij: ‘¿Uelis timoixajokuis? Tikitas ke sejse chivojueuet tein kipiluajtia chivojlamat, kuikuiltik uan pintojtik. Ijkon mochiua porin nikitani nochi tein Labán mitschiuilijtok.
13 Nejua niDios uan nimonextij moixpan ompa Betel, kampa tiketsak se tet uan tiktekilij aceite uan kampa tinechiluij ke tiksentokaskia tinechtekitiliskia. Axkan xikisa de nejin altepet uan ximokepa kampa tiyolik’”.
14 Raquel uan Lea kiluijkej: “Amo tikchiajok maj topaj techkauili teisa.
15 Yejua amo techita kemej tiikoneuan. Hasta technamakak uan kikuitok tomin tein tikmakak.
16 Nochi tein Dios kikuilij topaj, toaxka uan de tokoneuan. Yejua ika xikchiua nochi tein Dios mitsiluij”.
17 Uan Jacob kintejkoltij ikoneuan uan isiuauan itech camellos
18 para yaskej Canaán kampa yetoya itat, Isaac. Kinkuiteuak nochin itapialuan uan nochi tein kisentilijka ompa Padán-Aram.
19 Labán kinpanximato iichkauan* uan Raquel kiichtekilij itatadiosuan.*
20 Uan no, Jacob okachi kuali tanemilij ke Labán uan ichtakakisteuak. Labán katka arameo.
21 Uan Jacob choloj uan kiuikak nochi tein kipiaya. Kipanauij ueyiat Éufrates uan nejnentiajki hasta kampa yetokej tepemej ompa Galaad.
22 Sayoj ke ome tonal satepan kiluijkej Labán ke Jacob cholojka.
23 Yejua ika Labán kinsentilij ichankauan uan kitemojtiajki Jacob chikome tonal. Keman tekit kiajsik, yetoya itech tepemej ompa Galaad.
24 Sayoj ke se youak, Dios kinojnotsak Labán keman takochitstoya* uan kiluij: “Kuali xiknemili tein tikiluiti Jacob, maski tikiluis tein kuali oso tein amo kuali”.
25 Jacob kiketska ikaltsin* itech tepemej ompa Galaad, uan Labán uan ichankauan no ompaka mokaujkej. Yejua ika Labán kiajsito Jacob
26 uan kiluij: “¿Keyej tikchiuak nejin? ¿Keyej tinechkajkayauak uan tikinkuiteuak nosiuapipiluan kemej yeskia tikintsakuati?
27 ¿Keyej tinechkajkayauak uan tiichtakakisteuak? Komo tinechnauatiskia, nimitschiuiliskia se iluit, kampa tatsotsonaskiaj ika tambortsitsin* uan arpas.
28 Nion tinechkauak maj nikinmaka se beso* noixuiuan uan nosiuapipiluan. Majya amo tikuatamati.
29 Ueliskia teisa namechchiuilis, sayoj ke Dios akin namopaj kitekitilia, tayouak nechiluij: ‘Kuali xiknemili tein tikiluiti Jacob, maski tikiluis tein kuali oso tein amo kuali’.
30 Nikmati ke tiktelneki timokepas kampa nemi mopaj. ¿Sayoj ke keyej tinechinichtekilij notatadiosuan?”.*
31 Uan Jacob kiluij Labán: “Niichtakakisteuak porin nimouia xinechinkuili mosiuapipiluan.
32 Uan komo tikneki, xikintemo motatadiosuan* uan akin kinpias moneki mikis. Xinechtatemoli ininixpan akin nikan yetokej uan xikui tein moaxka”. Sayoj ke Jacob amo kimatia ke Raquel kinichtekka.
33 Yejua ika Labán kintemoj itech ikaltsin Jacob, ikaltsin Lea uan ininkaltsin Bilhá uan Zilpá, sayoj ke amo kinajsik itatadiosuan. Keman kisak de ikaltsin Lea, kintemoto itech ikaltsin Raquel.
34 Sayoj ke Raquel kinnalkalakijkaya itech ipejpech* camello uan ompa motalij. Uan Labán tamitatemoj itech nochin kaltsin, sayoj ke amo kinajsik.
35 Uan Raquel kiluij itat: “Amo xikualani tejuatsin, sayoj ke amo ueli nimoketsa porin nechpanotok tein ipa techpanoua tisiuamej”. Uan Labán kisentokak tel tatemojtinemik, sayoj ke ipa amo kinajsik.
36 Uan Jacob kualanik iuan Labán uan peuak kiixiluia: “¿Toni nikchiuak? ¿Toni tajtakol nikchiuak para tinechteltemojtiualas?
37 Axkan ke tinechtatemolijya, ¿tikajsik teisa tein moaxka? Xikualkui para maj kiitakan tochankauan, uan maj yejuan kijtokan akoni takajkayaujtok.
38 Nochi nejin 20 xiujmej tein mouan nietoya, nochi moichkauan uan mochivos kuali taskaltijkej, uan nion sepa nimitskualij semej moichkauan.
39 Amo keman nimitsuikilij se tapial tein kikokototskej koujtajtapialmej, ta nejua nimitskepiliaya. Uan komo mitsichtekiliayaj se tapial, tonayan oso youak, tinechixtaualtiaya.
40 Tonayan fiero nitonaltataya uan de youak fiero nisekmikia. Hasta amo uelia nikochia.
41 Nimitstekitilij 20 xiujmej: 14 xiujmej por mosiuapipiluan uan chikuasen xiujmej para nikinpias nejin tapialmej. Uan majtakpa tinechpatilij notaxtauil.
42 Komo amo nechpaleuiskia iDios Abrahán uan akin nopaj Isaac no kiueyichiua, axkan ke nimokepaya, amo teyi tinechmakaskia. Sayoj ke Dios kiitak ke nitajyouijtoya uan niteltekitia. Yejua ika tayouak mitsnejmachtij”.
43 Uan Labán kinankilij Jacob: “Nejin siuamej nosiuapipiluan, nejin konemej no nokoneuan, uan nejin tapialmej no notapialuan. Nochi tein tikitstok noaxka uan de nosiuapipiluan. Amo niknemiliskia nikinchiuilis teisa nosiuapipiluan oso noixuiuan.
44 Maj timotenkauakan se taman tejua uan nejua, uan maj nochipa tikelnamikikan”.
45 Yejua ika Jacob kikuik se tet uan kiketsak.
46 Uan Jacob kiniluij akin ompa yetoyaj:* “Xiksentilikan tet”. Uan yejuan kisentilijkej uan sekosan kinepanojkej. Satepan ompa takuajkej.
47 Labán kitokaytij Jegar-Sahadutá,* sayoj ke Jacob kitokaytij Galeed.*
48 Uan Labán kiluij Jacob: “Nejin tet tein nepaniujtok kinextia tein axkan timotenkauatij”. Yejua ika motokaytij Galeed
49 uan no Mizpá* porin Labán kijtoj: “Maj Jehová kiita tein tikchiujtoskej keman tejua uan nejua amo tisenyetoskej.
50 Komo tikineliuisuia nosiuapipiluan oso timonamiktia iniuan okseki siuamej, maski amo akin mitsitstos, xikelnamiki ke Dios tachixtok uan yejua kiitas nejon”.
51 Labán no kiluij Jacob: “Nikan yetok tet tein nepaniujtok uan tet tein niketsak para kinextis tein timotenkaujkej.
52 Nejin temej uan tet tein niketsak kinextia ke amo nipanos nepaka para teisa nimitschiuilis, uan ke tejua amo no tiualpanos para teisa tinechchiuilis.
53 Maj iDios Abrahán, iDios Nacor, iDios Taré techtatsakuilti komo amo tikchiuaj tein timotenkaujkej”. Uan Jacob kiyekijtoj itokaykopa Dios akin Isaac kiueyichiuaya ke ijkon kichiuaskia.
54 Satepan, Jacob kimaktilij Dios se tapialtsin itech nejon tepet uan kinyoleuak ichankauan maj takuakan. Yejuan takuajkej uan ompa mokaujkej nejon youak.
55 Uan Labán kualkantsin meuak, kinmakak se beso* iixuiuan uan isiuapipiluan uan kintiochiuak. Satepan mokepak ichan.
Tajtolmelaualismej
^ Oso “niktejtemik”.
^ Oso “nitatejtemiktoya”.
^ Oso “iborregos”.
^ Oso “itiotsitsin”. Itech hebreo, “terafim”.
^ Oso “tatejtemiktoya”.
^ Nejin kaltsin chijchiujtoya ika tasal (tilmaj).
^ Oso “panderetas”.
^ Oso “nikinpitso”, “nikintenamiki”.
^ Oso “notiotsitsin”.
^ Oso “motiotsitsin”.
^ Oso “itech silla tein kikuiaj siuamej para yaskej itech”.
^ Oso “iikniuan”.
^ Itech tajtol arameo nejin tajtol kijtosneki ‘tet tein nepaniujtok uan kinextia teisa’.
^ Itech tajtol hebreo nejin tajtol kijtosneki ‘tet tein nepaniujtok uan kinextia teisa’.
^ Itech tajtol hebreo nejin tajtol kijtosneki ‘kampa se pantachia’.
^ Oso “kinpitsoj”, “kintenamik”.
