Génesis 34:1-31
34 Dina, siuapil akin Lea kipiak iuan Jacob tel yaya kinkalpanoti siuapipil akin ompa nemiaj.
2 Se tonal, Siquem kiitak Dina uan satepan kiuikak uan ika mauiltij. Siquem katka iokichpil Hamor, akin kiixmatiaj kemej heveo uan katka se taixyekankej.
3 Uan Siquem kitelnekia yetos iuan Dina, kitasojtak uan kualtsin kinojnotsaya para maj yejua no kitasojta.
4 Satepan, Siquem kiluij itat: “Xinechijtaniliti nejin ichpoch”.
5 Keman Jacob kimatik ke Siquem ika mauiltijka Dina, iokichpipiluan yetoyaj ixtauat kintamakatoyaj tapialmej. Yejua ika Jacob kinemilij amo teyi kiniluis hasta maj mokepanij.
6 Satepan, Hamor, itat Siquem kinojnotsato Jacob.
7 Sayoj ke keman kiniluijkej iokichpipiluan Jacob tein mochiujka, niman mokepkej. Yejuan fiero kimatkej uan semi kualankej porin Siquem kichiuak maj amo kuali ika tajtokan Israel porin ika mauiltijka isiuapil Jacob. Tein kichiuak Siquem tel amo kuali katka.
8 Hamor tajtoj iniuan uan kijtoj: “Nookichpil Siquem kitasojta mosiuapil. ¿Uelis nankimakaskej para maj iuan monamikti?
9 Maj tokoneuan monamiktikan iniuan namokoneuan. Xitechinmakakan namosiuapipiluan uan tejuan no tamechinmakaskej tosiuapipiluan.
10 Uelis nanemiskej touan uan nankichiuaskej tein nankinekiskej nikan. Nikan xitakouakan uan xitanamakakan uan nikanya ximokaltalikan”.
11 Uan Siquem kiluij itat uan iikniuan Dina: “Komo nankijtouaj ke kemaj, uelis nanechtajtaniskej tein nankinekiskej.
12 Uelis nantajtaniskej tel miak tomin uan tel miak taman. Namechmakas tein nankinekiskej. Sayoj ke namechtataujtia, xinechmakakan Dina para maj iuan nimonamikti”.
13 Sayoj ke iokichpipiluan Jacob kinemilijkej kikajkayauaskej Siquem uan Hamor, porin Siquem ika mauiltijka ininikniuj.
14 Yejua ika kiniluijkej: “Amo uelis tikchiuaskej nejon. Amo uelis tikmakaskej tokniuj se takat akin amo kitekinij,* porin nejon techpinaujtiskia.
15 Sayoj uelis komo namochiuaj kemej tejuan uan nochin takamej akin namouan pouij motekij.*
16 Uan ijkuak, tamechinmakaskej tosiuapipiluan uan tejuan no tikinkuiskej namosiuapipiluan. Tinemiskej namouan, kualtsin timouikaskej uan timosenpaleuiskej.
17 Sayoj ke komo amo namotekij,* tikuiteuaskej tokniuj Dina uan tiaskej”.
18 Hamor uan Siquem kiitakej ke kuali yetoya tein tajtaniaj.
19 Uan Siquem niman kichiuak tein kinekiaj, porin yekmelauj kiueuelitaya isiuapil Jacob. Uan no, de nochin ichankauan, yejua akin okachi kitakachiuayaj.*
20 Yejua ika, Hamor uan Siquem yajkej ikalakyan ueyi xolal uan kiniluijkej nochin takamej akin ompa nemiaj:
21 “Nejin takamej kinekij maj tiksentokakan kuali timouikakan iniuan. Maj tikinkauakan maj nemikan nikan, maj takouakan uan maj tanamakakan porin tikpiaj miak tal uan kinajsi. Uelis timonamiktiskej iniuan ininsiuapipiluan uan tejuan no tikinmakaskej tosiuapipiluan.
22 Sayoj techtajtaniaj se taman: maj tinochin titakamej timotekikan* ijkon kemej yejuan. Sayoj ijkon kinekiskej touan nemiskej uan timosenpaleuiskej.
23 Uan nochi tein kipiaj uan inintapialuan no yeski toaxka. Maj tikchiuakan tein techtajtaniaj para maj touan nemikan”.
24 Uan nochin akin nemiaj itech ueyi xolal kiitakej ke kuali yetoya tein Hamor uan Siquem kiniluijkej. Uan nochin takamej akin ompa nemiaj motekkej.*
25 Sayoj ke ome tonal satepan, keman takamej kinkokojtoyaok kampa kintekkaj, Simeón uan Leví ome iokichpipiluan Jacob akin katkaj iikniuan Dina, kikuiteujkej ininmachete tein ojkan tenej* uan yajkej ueyi xolal. Uan keman ompa yetoyajya kinmiktijkej nochin takamej. Amo akin kichiaya maj kichiuakan nejon.
26 Kimiktijkej Hamor uan Siquem uan kikixtijkej Dina de ichan Siquem uan yajkej.
27 Okseki iokichpipiluan Jacob no ajsitoj kampa yetoyaj akin kinmiktijkaj. Kikuiteujkej nochi tein ompa onkaya porin ika mauiltijkaj ininikniuj.
28 Kinuikakej ichkamej,* chivos, kuakuejmej, burros uan nochi tein onkaya itech ueyi xolal uan ixtauat.
29 Uan no kalakkej ininchan, tamitakixtijkej uan no kinuikakej konemej uan siuamej. Amo teyi kikaujkej.
30 Keman Jacob kimatik tein kichiujkaj Simeón uan Leví, kiniluij: “Nanechkuejmolkalakijkej. Por namotajtakol, akin kinixmatij kemej cananeos uan perizitas semi nechtauelitaskej.* Tejuan amo timiakej. Yejuan mosenpaleuiskej para nechteuiskej uan nechmiktiskej nejua uan nochin nochankauan”.
31 Sayoj ke yejuan kinankilijkej: “Monekia teisa tikchiuaskej para maj amo kiitakan tokniuj kemej se siuat akin monamaka iniuan takamej”.
Tajtolmelaualismej
^ Oso “amo kichiuilijtokej circuncisión”. Xikonita circuncisión.
^ Oso “mochiuiliaj circuncisión”.
^ Oso “amo namochiuiliaj circuncisión”.
^ Oso “kipoujkaitayaj”.
^ Oso “timochiuilikan circuncisión”.
^ Oso “mochiuilijkej circuncisión”.
^ Oso “ininespada”.
^ Oso “borregos”.
^ Oso “nechijiyaskej”.
