Génesis 35:1-29
35 Satepan, Dios kiluij Jacob: “Xipankisa Betel uan ompa ximokaua. Uan ompa xinechchijchiuili se altar. Nejua niDios akin monextij moixpan keman tikcholuijtoya* mokniuj Esaú”.
2 Uan Jacob kiniluij ichankauan uan nochin akin iuan yetoyaj: “Xikixtikan nochi tatadiosmej* tein nankipiaskej, ximopakakan uan ximotapatilikan.
3 Maj tipankisakan Betel. Ompa nikchijchiuilis toTajtsin Dios se altar. Yejua nechnankilij keman semi nimotekipachojtoya uan desde ijkuak nochipa nechpaleuiani”.
4 Yejua ika, kimakakej Jacob nochi tatadiosmej* tein kipiayaj uan pipilolmej tein nakasaktoyaj. Uan Jacob kitalpachoj* nochi nejon itsintan ueyi kouit tein amo uejka yetoya de Siquem.
5 Keman peuak nejnemij, Dios kichiuak maj tel mouikan akin nemiaj itech uejueyi xolalmej tein ompaka yetoyaj. Yejua ika amo akin kinemilij kintokatias iokichpipiluan Jacob para kinteuis.
6 Satepan, Jacob uan nochin akin iuan yayaj ajsikej ueyi xolal Luz, tein no monotsa Betel, tein yetok itech tal tein poui Canaán.
7 Ompa kichijchiuak se altar uan kitokaytij El-Betel,* porin keman kicholuijtoya* iikniuj, toTajtsin Dios ompa monextij iixpan.
8 Satepan momikilij Débora, akin kiiskaltijka Rebeca. Uan kitokkej itsintan se auakouit, tein amo uejka yetoya de Betel. Yejua ika Jacob kitokaytij Alón-Bacut* nejon kouit.
9 Jacob kiska de Padán-Aram uan itech ojti, Dios oksepa monextij iixpan uan kitiochiuak.
10 Uan Dios kiluij: “Timonotsa Jacob. Sayoj ke amo ijkon timonotsasok, ta timonotsas Israel”. Yejua ika peuak kinotsa Israel.
11 Dios no kiluij: “Nejua niDios akin nikpia nochi chikaualis. Xikinpia miakej mokoneuan uan maj momiakilikan. Tiyeski inintat akin nemiskej itech miak altepemej. Uan seki mokoneuan yeskij tekiuanij.
12 Tal tein nikmakak Abrahán uan Isaac no nimitsmakas tejua uan mokoneuan”.
13 Uan satepan ke Dios tajtoj iuan Jacob, yajki.
14 Uan Jacob kiketsak se tet kampa Dios iuan tajtojka, uan kipantekilij vino uan aceite.
15 Jacob oksepa tatokaytij Betel kampa Dios iuan tajtojka.
16 Uan kiskej de Betel. Uan keman uejkaok kinpolouaya para ajsiskej Efrat, Raquel yaya kipiatiya ikonetsin uan tel tajyouijtoya.
17 Uan keman amo uelia kipiaya ikonetsin uan okachi fiero kimachiliaya, in partera kiluij: “Amo ximoui, porin no tikpiati nejin konetsin”.
18 Sayoj ke Raquel momikilijtoyaya, uan tepitsin achto ke ijyokotoniskia kitokaytij Ben-Oní.* Sayoj ke Jacob kitokaytij Benjamín.*
19 Ijkon momikilij Raquel uan kitokkej itech ojti tein yaya Efrat, tein no monotsa Belén.
20 Jacob kiketsak se tet kampa kitokak Raquel. Uan hasta axkan nejin tet kisentoka ompa yetok.
21 Satepan, Israel yajki de ompa uan kiketsak ikaltsin* nepaka de kampa yetoya kali tein uejkapantik tein monotsa Éder.
22 Keman Israel nemia itech nejon tal, se tonal Rubén motekak iuan Bilhá, uan Israel kimatik. Bilhá katka okse isiuatsin* itat.
Jacob kinpiak 12 iokichpipiluan.
23 Iuan Lea, kipiak Rubén akin tayekanaya uan no kipiak Simeón, Leví, Judá, Isacar uan Zabulón.
24 Iuan Raquel kipiak José uan Benjamín.
25 Iuan Bilhá, itakeual Raquel, kipiak Dan uan Neftalí.
26 Uan iuan Zilpá, itakeual Lea, kipiak Gad uan Aser. Yejuan nejin ikoneuan Jacob tein kinpiak ompa Padán-Aram.
27 Satepan, Jacob ajsik kampa yetoya itat, Isaac. Ajsik Mamré, tein yetoya ompa Quiryat-Arbá, tein no moixmati kemej Hebrón. Abrahán uan Isaac ompa nenkej maski amo ompa kayomej katkaj.
28 Isaac nemik 180 xiujmej.
29 Uan momikilij satepan ke kualtsin nemik miak xiujmej, uan kitokkej kemej iuejkaujtatuan. Iokichpipiluan, Esaú uan Jacob kitokkej.
Tajtolmelaualismej
^ Oso “tikcholouilijtoya”.
^ Oso “tiotsitsin”.
^ Oso “tiotsitsin”.
^ Oso “kitatij (kicholtij)”.
^ Tokayit tein kijtosneki ‘Dios yetok Betel’.
^ Oso “kicholouilijtoya”.
^ Tokayit tein kijtosneki ‘auakouit kampa chokaj’.
^ Tokayit tein kijtosneki ‘konetsin tein nikpiak ika tajyouilis’.
^ Tokayit tein kijtosneki ‘konetsin de noyekmakopa’.
^ Nejin kaltsin chijchiujtoya ika tasal (tilmaj).
^ Xikonita tajtol okse siuatsin.
