Génesis 37:1-36
37 Jacob kisentokak nemik itech tal tein poui Canaán, kampa itat nemik maski amo ompa kayot katka.
2 Nikan ika motajtoua Jacob.
Yejua kipiaya se iokichpil akin monotsaya José. Keman yejua kipiaya 17 xiujmej, kinnemiltijtoya ichkamej* uan chivos iniuan ininokichpipiluan Bilhá uan Zilpá, akin katkaj isiuauan Jacob. Uan se tonal José kinteluilij iikniuan iuan itat.
3 Israel okachi kitasojtaya José ke okseki ikoneuan porin kipiak keman tatajtsinya katka, uan kitechijchiualtilij se kualtsin tasal* tein ueyak.
4 Keman iikniuan José kiitakej ke inintat okachi kitasojtaya, peuak kitauelitaj. Hasta nion kiyeknojnotsayajok.
5 Se tonal, José kikochitak* se taman uan kintapouij iikniuan, uan yejua ika okachiok kitauelitakej.
6 Yejua kiniluij: “Maj namechilui tein nikochitak.
7 Tiktektoyaj trigo kampa titatokaj uan tikilpijtiayaj.* Tein nejua nikilpijka moketsak uan tein namejuan nankiilpijkaj kiyoualojkej tein nejua nikilpij uan moixpilojkej iixpan”.
8 Iikniuan kiluijkej: “¿Tikijtosneki ke tiyeski titotekiuaj uan titechixyekanas?”. Uan keman kikakkej tein kikochitak uan tein kiniluij okachiok kitauelitakej.
9 Satepan, José oksepa takochitak* uan kintapouij iikniuan. Kiniluij: “Nikochitak okse taman. Sayoj ke axkan moixpilouayaj noixpan tonaltsin, metsti, uan 11 sitalimej”.
10 Kitapouij itat uan iikniuan. Uan itat kichikaujkailuij: “¿Toni timoluia ke kijtosneki nejin tein tikochitak? ¿Timoluia ke ualas momaj, mokniuan uan nejua timoixpilokiuij hasta talpan moixpan?”.
11 Uan iikniuan peuak kinexikoluiaj José, sayoj ke itat amo kielkauak tein kijtojka.
12 Se tonal, iikniuan José kinuikakej tapialmej para maj takuatij amo uejka de Siquem.
13 Satepan Israel kiluij José: “Mokniuan kinnemiltijtokej tapialmej amo uejka de Siquem. Nikneki xikinitati”. Uan José kinankilij: “Kemaj paj”.
14 Uan itat kiluij: “¿Uelis tikitatiuj keniuj yetokej mokniuan? No xikitati keniuj yetokej tapialmej uan xinechiluiki”. Yejuan yetoyaj itech tal tamanis* ompa Hebrón keman kititanik maj youi Siquem.
15 Satepan, se takat kiitak ke José nenentoya kampa tatokaj uan kitajtanij:* “¿Toni tiktemojtinemi?”.
16 José kiluij: “Nikintemojtok nokniuan. ¿Tikmati kani kinnemiltijtokej tapialmej?”.
17 Uan takat kiluij: “Nikan yetoyaj, sayoj ke nikinkakilij ke kijtojkej: ‘Tiouij Dotán’”. Yejua ika José kintemojtiajki iikniuan uan kinajsito hasta Dotán.
18 Sayoj ke achto ke ajsiskia kampa yetoyaj iikniuan, yejuan kiuejkaitakej uan peuak kinenemiliaj keniuj kimiktiskej.
19 Uan peuak moiluiaj: “¡Xikitakan! Ne ualajtok ne akin tajtakochita.*
20 Maj tikmiktikan uan maj tikpankajkauakan itech se ueyi talkoyok* uan tikijtoskej ke se tekuani kimiktij uan kikuaj. Maj tikitakan komo melauj mochiua tein kikochitak”.
21 Sayoj ke keman Rubén kikakik nejon, kimakixtisnekik. Yejua ika kiniluij: “Maj amo tikmiktikan”.
22 Uan no kijtoj: “Maj amo teyi tikchiuilikan, sayoj maj tikpantamotakan itech nejin ueyi talkoyok nikan kampa tauaktok”. Kijtoj nejon porin kinekia kimakixtis para oksepa kiuikas iuan itat.
23 Keman José ajsik kampa yetoyaj iikniuan, yejuan niman kipankixtilijkej kualtsin tasal tein itat kitayokolijka,
24 kikitskijkej uan kipankajkaujkej itech talkoyok.* Ijkuak, nejon talkoyok amo kipiaya at.
25 Satepan, motalijkej uan peuak takuaj, uan kinuejkaitakej miakej akin ualajtoyaj. Katkaj akin kinixmatiaj kemej ismaelitas. Yejuan temotoyaj de Galaad para ajsiskej Egipto. Inincamellos kimamajtiayaj chokil tein ajuiyak tein monotsa ládano, bálsamo uan koujeuat tein chokiloj.
26 Uan Judá kiniluij iikniuan: “Amo teyi tiktanij komo tikmiktiaj uan amo teyi tikijtouaj.
27 Maj tikinnamakiltikan ismaelitas uan maj amo teyi tikchiuilikan, ta yejua tokniuj”.* Uan iikniuan kitajtolkakkej.
28 Uan keman tanamakanij ismaelitas* ompaka panokej, iikniuan José kipankixtijkej den talkoyok uan kinnamakiltijkej. Kinmakakej kemej se cuarto* plata. Uan nejon tanamakanij kiuikakej José hasta Egipto.
29 Satepan, Rubén mokepak uan pantachiato itech talkoyok,* uan keman kiitak ke José amo ompa yetoyaok, kitsayanak itasal.
30 Uan keman kinajsito iikniuan, kimojkaijtoj: “¡In okichpil amo nesi! ¿Uan toni nikchiuati?”.
31 Uan iikniuan kikuikej itasal José, kimiktijkej se chivo uan kiejesuijkej itasal.
32 Satepan kititanilijkej inintat itasal José uan kiluijkej: “Tikajsikej nejin. Xikita ox iaxka mokoneuj”.
33 Satepan ke kuali kiitak nejon tasal, chikauak kijtoj: “¡Nejin itasal nokonetsin! ¡Se tekuani kimiktij uan kikokototsak!”.
34 Uan Jacob kitsayanak itasal, motajkoyantalilij se tasal tein teajuayotia uan kichokilijtoya ikoneuj miak tonalmej.
35 Nochin iokichpipiluan uan isiuapipiluan kitemouayaj kiyolseuiskej, sayoj ke amo mokauaya, ta kiniluiaya: “¡Niksentokas nikchokilijtos nookichpil hasta maj nimiki!”.* Uan Jacob kisentokak kichokilij José.
36 Uan ismaelitas kinamakakej José ompa Egipto. Kinamakiltijkej Potifar, akin kipiaya se ueyi tekit ichan tekiuaj ompa Egipto, uan kinixyekanaya soldados akin kiyekpiayaj tekiuaj.
Tajtolmelaualismej
^ Oso “borregos”.
^ Oso “tilmaj”.
^ Oso “kitejtemik”.
^ Oso “tiktsikojtiayaj”.
^ Oso “tatejtemik”.
^ Oso “takomol”.
^ Oso “kitajtoltij”.
^ Oso “tatejtemiki”.
^ Oso “taltekoch”. Nejin talkoyok kichijchiuayaj para kisentiliskej at.
^ Oso “taltekoch”.
^ Itech hebreo, “tokniuj, toesyo”.
^ Oso “madianitas”.
^ Oso “Kinmakakej 20 siclos”. Xikonita B14.
^ Oso “taltekoch”.
^ Oso “hasta maj nitamiti itech Miketekoch (Seol)”. Seol kijtosneki kampa moseuijtokej mikemej. Xikonita miketekoch.
