Génesis 38:1-30
-
Judá uan Tamar (1-30)
38 Itech nejon tonalmej, Judá kinkauak iikniuan uan kiketsak ikaltsin* amo uejka de kampa nemia Hirá, se takat akin katka de Adulam.
2 Ompa, Judá kiitak se siuapil, iuan monamiktij uan iuan motekak. Katka isiuapil se takat akin monotsaya Súa, akin katka de Canaán.
3 Nejon siuatsin mokokoxkatalij uan kipiak se okichpiltsin, uan Judá kitokaytij Er.
4 Oksepa mokokoxkatalij uan kipiak okse okichpiltsin akin kitokaytij Onán.
5 Uan oksepa kipiak okse okichpiltsin akin kitokaytij Selá. Judá yetoya Aczib keman yolik Selá.
6 Satepan, Judá kinamiktij iokichpil Er akin tayekanaya iuan se siuatsin akin monotsaya Tamar.
7 Sayoj ke Jehová amo kiuelitaya tein kichiuaya Er, iokichpil Judá. Yejua ika Jehová kimiktij.
8 Yejua ika Judá kiluij Onán: “Ximonamikti iuan isiuauj mokniuj uan ijkon konemej tein nankinpiaskej kinitaskej kemej ikoneuan mokniuj”.
9 Sayoj ke Onán kimatia ke konemej tein kinpiaskia amo kinitaskiaj kemej ikoneuan. Yejua ika keman motekaya iuan icuñada, kitemouaya maj amo mokokoxkatali.
10 Sayoj ke Jehová kiitaya ke amo kuali yetoya tein kichiuaya. Yejua ika no kimiktij.
11 Uan Judá kiluij isiuamon: “Xinemiti ichan mopaj uan amo ximonamikti hasta maj nookichpil Selá moskalti”. Judá kijtoj nejin porin mouia maj Selá no miki kemej iikniuan. Yejua ika Tamar yajki uan nemito iuan itat.
12 Satepan, momikilij isiuatsin Judá, akin katka isiuapil Súa. Keman Judá amo motayokoltijtoyaok porin momikilij isiuatsin, yajki Timná kampa yetoyaj akin kipanximaj iichkauan.* Iuan yajki itasojikniuj, Hirá.
13 Uan Tamar kimatik ke imontat pankistoya Timná para kinpanximas iichkauan.
14 Yejua ika Tamar mopatilij itasal* tein kinextiaya ke momikilijkaya itakatsin, moixtsakuak ika se tasal, motalilij se chal uan motalito ikalakyan xolal Enaim, tein yetok itech ojti tein youi Timná. Kichiuak nejin porin kiitak ke Selá moskaltijkaya uan ayamo iuan kinamiktijtoyaj.
15 Keman Judá kiitak Tamar niman kinemilij ke katka se siuat akin monamakaya, porin moixtalilijka se tasal.
16 Yejua ika Judá kiajsito. Uan kemej amo kimatia ke katka isiuamon, kiluij: “¿Uelis nimotekas mouan?”. Tamar kinankilij: “¿Toni tinechmakas komo mouan nimoteka?”.
17 Judá kiluij: “Nimitstitanilis se chivojkonet”. Sayoj ke yejua kiluij: “¿Toni tinechkauilis para nikmatis ke yekmelauj tinechtitanilis?”.
18 Judá kitajtanij:* “¿Toni tikneki maj nimitskauili?”. Uan Tamar kiluij: “Moanillo tein ika tiktalia sello, hilo tein kipia uan motopil”. Uan yejua kimakak, iuan motekak uan Tamar mokokoxkatalij.
19 Satepan yajki, mokixtilij ichal uan oksepa motalilij itasal tein kinextiaya ke momikilijkaya itakatsin.
20 Judá kititanik itasojikniuj, Hirá, para maj kiuika chivojkonet uan maj Tamar kikepili tein kikauilijka, sayoj ke Hirá amo kiajsik.
21 Yejua ika kintajtanij akin ompa nemiaj: “¿Kani yetok nejon siuat akin monamaka* uan yetoya ojtenoj ompa Enaim?”.
22 Uan Hirá mokepak kampa yetoya Judá uan kiluij: “Amo nikajsik. Uan akin ompa nemij nechiluijkej: ‘Nikan amo keman yetoni se siuat akin monamaka’”.
23 Yejua ika Judá kiluij: “Maj mokauili tein nikmakak, para amo timopinaujtiskej. Nejua nimokixtijya porin niktitanilij chivojkonet maski amo tikajsik nejon siuat”.
24 Kemej eyi metsti satepan kiluijkej Judá: “Mosiuamon Tamar auilnentinemi. Yejua ika axkan kokoxkayetok”. Uan Judá kijtoj: “Xikalankixtikan, xikmiktikan uan xikchichinokan”.
25 Keman kikalankixtijtoyaj, Tamar tanauatij maj kiluitij imontat: “Itat konetsin tein nikpixtok iaxka nejin”. Uan no kijtoj: “Xikita akoni iaxka nejin anillo tein ika kitaliaj sello, nejin hilo uan nejin topil”.
26 Judá kiyekitak nejon uan kijtoj: “Nejin siuat kichiuak tein kuali yetok, uan nejua amo, porin amo niknamiktij iuan nookichpil Selá”. Uan Judá amo kemanok iuan motekak.
27 Keman Tamar yaya kipiatiya ikonetsin, takaj kinpixtoya omen.
28 Keman kistoyajya, se konetsin kikixtij imay. Uan partera niman kikuik se hilo chichiltik uan kimailpilij konetsin uan kijtoj: “Nejin konetsin kisak achto”.
29 Sayoj ke konetsin oksepa kikalakij imay uan kisak iikniuj. Yejua ika partera kimojkaijtoj: “¡Tiktelkokoj* momaj!”. Yejua ika kitokaytijkej Pérez.*
30 Uan satepan kisak iikniuj akin mailpitoya ika hilo chichiltik. Uan kitokaytijkej Zérah.
Tajtolmelaualismej
^ Nejin kaltsin chijchiujtoya ika tasal (tilmaj).
^ Oso “iborregos”.
^ Oso “itilmaj”.
^ Oso “kitajtoltij”.
^ Oso “siuat akin auilnemi itech templo”.
^ Itech hebreo, “Tiknakayojtsayanak”.
^ Tokayit tein kijtosneki ‘tsayani’.
