Génesis 39:1-23
39 Akin kinixmatiaj kemej ismaelitas kiuikakej José hasta Egipto. Ompa kinamakiltijkej se takat akin ompa nemia uan monotsaya Potifar. Yejua kipiaya se ueyi tekit ichan tekiuaj ompa Egipto uan kinixyekanaya soldados akin kiyekpiayaj tekiuaj.
2 Sayoj ke Jehová kipaleuiaya José. Yejua ika kuali kisaya nochi tein kichiuaya, uan iteko, Potifar, kiixtalij maj taixyekana* ichan.
3 Iteko kiitak ke Jehová kipaleuijtoya José uan ke Jehová kichiuaya maj kuali kisa nochi tein kichiuaya.
4 Tein José kichiuaya kiyolpaktiaya Potifar, yejua ika kuali kiitaya uan iuan takuaujtamatia. Yejua ika Potifar kiixtalij maj tachia ichan uan maj kiita nochi tein kipiaya.
5 Desde ijkuak, Jehová peuak kintatiochiuia akin nemiaj ichan Potifar porin José ompa nemia. Jehová kitiochiuak nochi tein Potifar kipiaya ichan uan italpan.
6 Satepan, Potifar kikauilij José maj kiyekpia nochi tein kipiaya. Yejua amo teyi kitekipachouaya, sayoj kiitaya toni kikuas. Uan no, José sachikaktik katka uan kuakualtsin.
7 Uan isiuauj Potifar peuak kiixuelita José uan kiluiaya: “Ximoteka nouan”.
8 Sayoj ke José amo kinekia uan kiluiaya: “Noteko amo kitekipachoua nion teyi tein panoua nikan kalijtik, porin nechkauilij maj nejua nochi nikita.
9 Amo akin okachi kimati ke nejua itech nejin kali. Yejua nechkauilij nochi, sayoj tejua amo porin tiisiuauj. Amo keman nikchiuaskia nejin tein tel amo kuali uan ika nikixnamikis Dios”.
10 Uan isiuauj Potifar mojmostaj kiteliluiaya José maj iuan moteka, sayoj ke yejua amo kinekia, uan nion kinekia iuan yetos.
11 Sayoj ke se tonal tekitito kalijtik, uan amo yetoya nion se takeual ompa.
12 Uan ijkuak, isiuauj Potifar kikitskij itasal,* kitilanak uan kiluij: “¡Ximoteka nouan!”. Sayoj ke José kikaujteuak itasal uan cholojteuak.*
13 Keman yejua kiitak ke José cholojteuak uan ke itasal imako mokauak,
14 peuak chikauak tsajtsi uan kinnotsa takeualmej akin tekitiaj kalijtik. Yejua kiniluij: “¡Xikitakan! Ne takat hebreo* akin notakauj techualkuilij techpinaujtisnekia. Kinekia nouan motekas, sayoj ke chikauak nitsajtsik.
15 Uan keman peuak nimotsajtsilia, cholojteuak uan kikaujteuak itasal”.
16 Satepan, isiuauj Potifar ompa kikauak itasal José, uan kichiak maj Potifar mokepa kalijtik.
17 Uan siuat no kiluij Potifar tein kijtojkaya. Kiluij: “Ne takeual hebreo akin titechualkuilij nechpinaujtisnekia.
18 Sayoj ke keman kikakik ke peuak niajkotsajtsi, niman cholojteuak uan kikaujteuak itasal”.
19 Keman Potifar kikakik tein isiuauj kiluij ke José kichiuilijka, fiero kualanik.
20 Yejua ika Potifar kikitskij José uan kitsakuato kampa tekiuaj kintsakuaya oksekin. Uan ompa kikaujkej maj tsakto.
21 Sayoj ke Jehová kisentokak kipaleuij José. Nochipa kitasojtak uan kichiuak maj akin taixyekanaya kampa tsaktoya kuali kiitani.
22 Yejua ika akin ompa taixyekanaya, kiixtalij José maj kinixyekana akin ompa tsaktoyaj. José kiitaya maj mochiua nochi tein monekia kichiuaskej.
23 Uan akin taixyekanaya kampa tsaktoyaj amo kitekipachouaya nion teyi tein kikauilijka José porin Jehová kipaleuijtoya José, uan Jehová kichiuaya maj kuali kisa nochi tein kichiuaya.
