Génesis 40:1-23
40 Satepan, akin kitayilmakaya* tekiuaj ompa Egipto uan akin kinixyekanaya panchiuanij kichiujkej teisa tein tekiuaj amo kiuelitak.
2 Uan tekiuaj kualanik iniuan nejin ome takeualmej.
3 Yejua ika kintsakuato ichan akin kinixyekanaya soldados, kampa no tsaktoya José.
4 Akin kinixyekanaya soldados kiixtalij José maj iniuan yeto uan maj kinmaka tein kinpoloskia. Uan yejuan tsaktoyaj miak tonalmej.
5 Keman tsaktoyaj akin kitayilmakaya tekiuaj uan akin panchiuaya, se youak takochitakej.* Uan tein kikochitakej kijtosnekia sejse taman.
6 Mostika kualkan, keman José kinajsito, kiitak ke motekipachojtoyaj.
7 Yejua ika kintajtanij:* “¿Keyej semi namotayokoltijtokej axkan?”.
8 Yejuan kinankilijkej: “Tiomen titakochitakej, sayoj ke amo akin ueli techiluia toni kijtosneki”. Yejua ika José kiniluij: “Sayoj Dios uelis namechiluis toni kijtosneki tein nankikochitakej. ¿Uelis nanechiluiskej toni nankiitakej?”.
9 Akin kitayilmakaya tekiuaj kitapouij José tein kikochitak.* Kiluij: “Nikochitak se uvajkouit tein yetoya noixpan
10 uan kipiaya eyi imakoujyo. Nejon uvajkouit seliak, xochiouak uan kipiak miak uvas tein yoksikej.
11 Nejua nimaaktoya icopa tekiuaj. Yejua ika nikuik uvas, nikpatskak itech copa uan nikmakak tekiuaj”.
12 Uan José kiluij: “Yejua nejin tein kijtosneki tein tikochitak. Eyi imakoujyo uvajkouit kijtosneki eyi tonal.
13 Eyi tonal satepan, tekiuaj mitskixtis uan oksepa mitsmakas tekit tein tikpiaya. Oksepa tiktayilmakas tekiuaj kemej achto.
14 Sayoj ke keman kuali tietosya, xinechelnamiki. Nimitstataujtia xinechikneli uan xikilui tekiuaj keniuj nimitspaleuij para maj nechkixtikan de nikan.
15 Nejua ninemia itech inintal akin kinixmatij kemej hebreos* uan de ompa nechichtekkej. Uan nikan nechtsakkej* maski amo teyi nikchiuak”.
16 Keman akin panchiuaya kiitak ke José kiluij akin kitayilmakaya tekiuaj ke kipanoskia tein kuali, kiluij: “Nejua no nikochitak* ke nokuako nikpiaya eyi chikiuit tein kipiaya pantsin tein istak.
17 Chikiuit tein yetoya hasta ajko kipiaya nochi tataman pantsin para tekiuaj, uan totomej kikuajtoyaj”.
18 Uan José kiluij: “Yejua nejin tein kijtosneki tein tikochitak. Eyi chikiuit kijtosneki eyi tonal.
19 Uipta, tekiuaj mitskechkotonas uan mitskoujpampilos. Uan totomej mitskuaskej”.
20 Ome tonal satepan, iluichiujtoyaj porin tekiuaj kiajxitij okse xiuit. Uan kinyoleuak nochin itakeualuan. Uan keman ompa yetoyajya, tanauatij maj kikuitij akin kitayilmakaya uan akin panchiuaya.
21 Tekiuaj oksepa kimakak tekit tein kipiaya akin kitayilmakaya.
22 Sayoj ke tanauatij maj kikoujpampilokan akin panchiuaya, ijkon kemej José kiniluijka ke kinpanoskia.
23 Sayoj ke akin kitayilmakaya tekiuaj kielkauak José, uan ipa amo kielnamikik.
Tajtolmelaualismej
^ Nejin takat kinixyekanaya akin kimakayaj vino uan okseki taman tein tayiskia tekiuaj.
^ Oso “tatejtemikkej”.
^ Oso “kintajtoltij”.
^ Oso “kitejtemik”.
^ Oso “nechtsakkej itech nejin talkoyok”.
^ Oso “niktejtemik”.
