Génesis 41:1-57
41 Panok ome xiuit uan akin tekiuajtia Egipto kikochitak* ke ijkatoya tatenoj den ueyiat Nilo.
2 Sepasan kiskej den ueyiat chikome kuakuejmej tojtomaujkej uan kualtsitsin tein peujkej takuaj tatenoj den ueyiat Nilo.
3 Satepan, kiskej den ueyiat chikome kuakuejmej omitikej tein fiero moitayaj uan moketskej atenoj ininnakastan kuakuejmej tein tojtomaujkej.
4 Uan kuakuejmej omitikej tein fiero moitayaj peuak kinkuaj chikome kuakuejmej tein tojtomaujkej uan kualtsitsin. Uan tekiuaj ijsak.*
5 Uan oksepa kochik uan oksepa takochitak. Axkan kiitak se koujtsin kampa kisayaj chikome imakoujyotsitsin tein kitelpiayaj trigo tein tel kuali.
6 Satepan no moskaltijkej chikome imakoujyotsitsin trigo tein pijpitsaujkej uan kinuatska tonalejekat tein ualeuaya taluakyan.
7 Uan tein pijpitsaujkej peuak kintojtolouaj chikome tein kitelpiayaj trigo tein tel kuali. Uan tekiuaj ijsak* uan momakak cuenta ke takochitstoya.
8 Mostika kualkan, tekiuaj semi motekipachojtoya. Yejua ika tanauatij maj kinnotsakan nochin naualmej uan tamatinij de Egipto uan kintapouij tein kikochitaka, sayoj ke amo akin uelik kiluij toni kijtosnekia.
9 Uan akin kitayilmakaya* tekiuaj kiluij: “Axkan moneki nikijtos tein amo kuali tein nikchiuak.
10 Tejuatsin tikualanik touan, yejua ika titanauatij maj techtsakuanij ichan akin kinixyekana soldados. Ompa nechtsakuatoj nejua uan akin kinixyekanaya panchiuanij.
11 Se youak titakochitakej, uan tein tikochitakej kijtosnekia sejse taman.
12 Uan ompa touan yetoya se telpoch hebreo,* akin katka itakeual akin kinixyekana soldados. Keman tiktapouijkej tein tikochitakaj, yejua techiluij tein kijtosnekia.
13 Uan mochiuak nochi kemej techiluijka: tejuatsin oksepa tinechmakak tekit tein nikpiaya uan akin panchiuaya kikoujpampilojkej”.
14 Yejua ika tekiuaj tanauatij maj kitemotij José uan niman kikuitoj kampa tsaktoya uan kiualkuilijkej. José moximak,* motapatilij uan yajki kampa yetoya tekiuaj.
15 Uan tekiuaj kiluij José: “Nitakochitak, sayoj ke amo akin ueli nechiluia toni kijtosneki. Uan niktekakiliani ke keman mitstapouiaj tein kikochitaj, tikmati toni kijtosneki”.
16 José kinankilij tekiuaj: “Nejua amo teyi nikmati tejuatsin, ta Dios mitsmatiltis tein kuali”.
17 Uan tekiuaj kiluij José: “Nikochitak ke niijkatoya tatenoj den ueyiat Nilo.
18 Uan sepasan kiskej den ueyiat chikome kuakuejmej tojtomaujkej uan kualtsitsin tein peujkej takuaj tatenoj den ueyiat Nilo.
19 Satepan, kiskej chikome kuakuejmej kokoxkatikej, sapitsotikej uan omitikej. Amo keman nikinitstoya seki kuakuejmej tel sapitsotikej itech nochi Egipto.
20 Uan kuakuejmej omitikej tein fiero moitayaj peuak kinkuaj chikome kuakuejmej tein tojtomaujkej.
21 Sayoj ke keman kintamikuajkej, moitaya majya amo teyi kikuajkaj porin kisentokayaj fiero moitayaj kemej achto. Uan niijsak.*
22 ”Satepan nikochitak se koujtsin kampa kisayaj chikome imakoujyotsitsin tein kitelpiayaj trigo tein tel kuali.
23 Satepan no moskaltijkej chikome imakoujyotsitsin trigo tein pijpitsaujkej uan kinuatska tonalejekat.
24 Uan tein pijpitsaujkej peuak kintojtolouaj chikome tein kitelpiayaj trigo tein tel kuali. Nikintapouij naualmej tein nikochitaka, sayoj ke amo akin uelik nechiluij toni kijtosnekia”.
25 José kiluij tekiuaj: “Tein tikochitak kijtosneki sayoj se taman. Dios mitsmatiltij toni kichiuati.
26 Chikome kuakuejmej tein kuali moitayaj, kijtosneki chikome xiuit, uan chikome imakoujyotsitsin trigo tein tel kuajkuali, no kijtosneki chikome xiuit. Nejin tein tikochitak kijtosneki sayoj se taman.
27 Chikome kuakuejmej omitikej tein fiero moitayaj uan kiskej satepan, kijtosneki chikome xiuit. Chikome imakoujyotsitsin trigo tein amo teyi kipiayaj uan kinuatska tonalejekat, kijtosneki ke chikome xiuit amo onkas toni se kikuas.
28 Ijkon kemej yekin nimitsiluij tejuatsin, Dios mitsmatiltij tein kichiuati.
29 ”Chikome xiuit tel taonkas itech nochi Egipto.
30 Sayoj ke satepan amo onkas toni se kikuas chikome xiuit. Uan hasta moelkauas keman tel taonkaya itech nochi Egipto. Tatamis itech nochi in tal.
31 Uan amo akin kielnamikis ke tel taonkaya achto porin tel fiero tatasojtis.
32 Ojpa tikochitak nejin porin Dios kiixtalijya ke kichiuati nochi nejin, uan amo uejkaua kichiuati.
33 ”Yejua ika, xiktemo se takat akin tamatkej uan kuali taixejekoua, uan xikixtali maj taixyekana itech nochi Egipto.
34 Niman xikchiua nejin. Uan xikinixtali okseki taixyekananij para maj kisentilikan nochi tein mochiuas chikome xiuit keman tel taonkas. Kampa kikixtiskej makuil koxtalmej maj kixelokan se.
35 Yejuan moneki kisentiliskej nochi nejin itech chikome xiuit keman tel taonkas. Uan moneki kisentiliskej tatok itech uejueyi xolalmej uan ompa kikauaskej. Nochi tein mosentilis moaxka yeski.
36 Yejua nejon tein kikuaskej tapialmej uan nochin akin nemij Egipto itech chikome xiuit keman amo teyi onkas. Ijkon amo akin mikis”.
37 Tekiuaj uan nochin itakeualuan kiuelkakkej tein José kijtoj maj mochiua.
38 Yejua ika tekiuaj kiniluij itakeualuan: “Amo tikajsiskej okse takat kemej José, akin Dios kipaleuia ika ichikaualis”.
39 Uan tekiuaj kiluij José: “Amo akin okachi tamatkej uan kuali taixejekoua kemej tejua, porin Dios mitsmatiltij nochi nejin.
40 Tejua titachias nochan. Nochin akin nemij kampa nitaixyekana senkis mitstakamatiskej. Sayoj nejua niyeski okachi niueyichiujkej porin nitekiuaj”.
41 Uan tekiuaj no kiluij José: “Nimitsixtalia xitaixyekana itech nochi Egipto”.
42 Tekiuaj momakixtilij anillo tein ika kitaliaya isello uan kimatalilij José. Satepan kitalilij linojtasal* tein tel kuali chijchiujtoya uan kikechtalilij se koskat tachijchiuj ika oro.
43 No kiluij maj tejko itech okse icarro para maj nochin kiueyitalianij uan maj chikauak kijtouanij: “¡Avrékh!”.* Ijkon tekiuaj kiixtalij José maj taixyekana itech nochi Egipto.
44 Uan tekiuaj no kiluij José: “Nejua nitekiuaj, sayoj ke nochi tein mochiuas itech nochi Egipto achto moneki mitstajtaniskej ox uelis mochiuas”.
45 Satepan, tekiuaj kipatilij itokay José uan kitokaytij Zafenat-Panéah uan kinamiktij iuan Asenat. Itat Asenat katka Potifera, akin tekitia kemej tiopixkat itech ueyi xolal On.* Uan José peuak taixyekana* itech nochi Egipto.
46 José kipiaya 30 xiujmej keman kiuikakej iuan* tekiuaj.
Satepan ke iuan tajtoj, José tachiato itech nochi Egipto.
47 Chikome xiuit tel taonkaya porin moteltachiuak.
48 Itech nejon chikome xiuit José kisentilij itech uejueyi xolalmej tein mochiuak ompa Egipto. Itech sejse ueyi xolal kisentiliaya tein mochiuaya itech talmej tein ompaka moajsiaj.
49 José kisentokak kisentilij tel miak tatok, kemej xal tein onkak itech mar. Nion kitamachiujkejok porin amo ueliaok.
50 Uan achto ke peuaskia tatasojtiskia José kinpiak ome okichpipil. Ininnan katka Asenat, isiuapil Potifera.
51 Akin tayekanaya, José kitokaytij Manasés,* porin kijtouaya: “Dios kichiuak maj nikelkaua nochi tein nikijyouiani uan nochin akin nemij ichan nopaj”.
52 Akin kitojtokaya, kitokaytij Efraín,* porin kijtouaya: “Dios kichiuak maj nikpia miak taman nikan kampa nitajyouiani”.
53 Satepan tamik chikome xiuit keman tel taonkaya ompa Egipto.
54 Uan peuak tatasojti chikome xiuit ijkon kemej kijtojka José. Uan amo onkaya toni kikuaskej itech nochin altepemej, sayoj onkaya itech nochi Egipto.
55 Keman no peuak tatasojti ompa Egipto, akin ompa nemiaj peuak kitataujtiaj tekiuaj maj kinmaka tein kikuaskej. Uan tekiuaj kiniluij: “Xikitatij José uan xikchiuakan nochi tein namechiluis”.
56 Uan kisentokaya tatasojtia itech nochi taltikpak. Uan José peuak kinnamakiltia akin nemiaj Egipto tatok tein kisentilijka, porin amo onkaya toni kikuaskej itech nochi Egipto.
57 Uan akin nemiaj itech nochi taltikpak yayaj Egipto para kikouiliskej José tein kikuaskiaj, porin itech nochi taltikpak amo onkaya toni kikuaskej.
Tajtolmelaualismej
^ Oso “kitejtemik”. Nejin mokuis itech nochi capítulo.
^ Oso “tachiak”, “ixpetanik”.
^ Oso “tachiak”, “ixpetanik”.
^ Nejin takat kinixyekanaya akin kimakayaj vino uan okseki taman tein tayiskia tekiuaj.
^ Oso “moxijximak”.
^ Oso “nitachiak”, “niixpetanik”.
^ Oso “linojtilmaj”.
^ Nejin tajtol xa kijtosneki se tanauatil para maj kitakachiuakan (kipoujkaitakan) oso maj moixpilokan iixpan José.
^ Nejin no moixmati kemej Heliópolis.
^ Oso “yajtinemi”.
^ Oso “peuak kitekitilia”.
^ Tokayit tein kijtosneki ‘akin tetalkaualtia’.
^ Tokayit tein kijtosneki ‘kipia okse achiok’.
