Génesis 42:1-38
42 Keman Jacob kimatik ke onkaya trigo ompa Egipto, kiniluij ikoneuan: “¿Keyej sayoj namoixitstokej?”.
2 Uan no kiniluij: “Nikmatik ke onkak trigo ompa Egipto. Xitemokan uan xikouatij para maj amo timayanmikikan”.
3 Yejua ika majtakti iikniuan José temokej Egipto kikouatoj trigo.
4 Sayoj ke Jacob amo kinkauak maj kiuikakan Benjamín, iikniuj José, porin kijtouaya: “Takan teisa kipanok uan mikik”.
5 Yejua ika ikoneuan Israel yajkej Egipto iniuan oksekin akin no yayaj kikouatij trigo, porin amo no teyi onkayaok hasta itech tal tein poui Canaán.
6 Uan José taixyekantoya itech nochi Egipto uan yejua kinnamakiltiaya trigo nochin akin yayaj kikouatij de nochi taltikpak. Yejua ika iikniuan José kiitatoj uan motankuaketskej iixpan uan moixpilojkej hasta talpan.
7 Keman José kinitak iikniuan niman kinixmatik, sayoj ke amo kinextij. Uan kinchikaujkailuij: “¿Kani nanualeujkej?”. Yejuan kinankilijkej: “Tiuitsej de Canaán, tikouakoj tein tikuaskej”.
8 José kinixmatik iikniuan, sayoj ke yejuan amo kiixmatkej.
9 José niman kielnamikik tein kikochitaka,* kampa kinitaka iikniuan uan kiniluij: “¡Namejuan nantapijpiakoj nikan! ¡Nankiitakoj kanika uelis nankalakiskej uan nantechteuiskej!”.
10 Sayoj ke yejuan kiluijkej: “Amo noteko. Tejuan timotekitikauan uan tikouakoj tein tikuaskej.
11 Tinochin tiiknimej uan amo tiknemilijtiuitsej tikchiuaskej tein amo kuali. Tejuan amo titapijpiakoj”.
12 José kiniluij: “¡Amo melauj! ¡Nankiitakoj kanika uelis nankalakiskej uan nantechteuiskej!”.
13 Sayoj ke yejuan tanankilijkej: “Tejuan tidocejmej noteko. Tinochin sayoj se topaj. Yejua nemi Canaán. Akin xokoyot iuan mokauak uan okse amo touanok”.*
14 Sayoj ke José kiniluij: “Nikijtojya: ‘¡Namejuan nantapijpiakoj!’.
15 Nikitati ox melauj tein nankijtouaj. Ijkon kemej yekmelauj nemi tekiuaj, namechyekiluia ke amo nankisaskej de nikan hasta maj uiki namokniuj akin xokoyot.
16 Xiktitanikan se maj kikuiti namokniuj uan sekin nikan nantsaktoskej. Ijkon tikitaskej ox melauj tein nankijtouaj. Komo amo, nikyekmatis ke nantapijpiakoj”.
17 Satepan ke kijtoj nejon, kinsentsakuak eyi tonal.
18 Keman ajsik eyi tonal, José kiniluij: “Nejua nikmojkatoka Dios, yejua ika xikchiuakan tein namechiluis uan amo namikiskej.
19 Komo amo nanechkajkayaujtokej, semej de namejuan maj tsakto uan oksekin xikinuikilikan trigo namochankauan para maj kipiakan toni kikuaskej.
20 Uan xinechualkuilikan namokniuj akin xokoyot para nikmatis ke amo nanechkajkayaujtokej uan ijkon amo namikiskej”. Yejuan ijkon kichiujkej.
21 Uan peuak moiluiaj. “Tikixtaujtokej tein tikchiuilijkej tokniuj. Tikitakej keniuj chokatoya keman techtataujtiaya maj tikiknelikan, sayoj ke amo tikchiujkej cuenta. Yejua ika axkan titajyouijtokej”.
22 Rubén kiniluij: “Nejua namechiluij ‘Amo teyi xikchiuilikan okichpil’ uan namejuan amo nanechkakkej. Axkan moneki titanankiliskej porin tikmiktijkej”.*
23 Sayoj ke yejuan amo kimatiaj ke José kinajsikamatia, porin José kinnojnotsaya kemej tajtouayaj ompa Egipto uan okse kiniluijtiaya iikniuan toni kijtosnekia itech inintajtol.
24 Uan José yajki okseko uan peuak choka. Keman oksepa kinnojnotsato, kikitskij Simeón uan kiilpij* ininixtenoj.
25 Satepan, José tanauatij maj kinpexontilianij* trigo itech koxtalmej uan maj ompa kikalakianij itomin sejse takat. No tanauatij maj kinmakanij tein kikuaskiaj itech ojti. Uan ijkon mochiuak.
26 Uan kintamamaltijkej ininburros uan yajkej.
27 Keman ajsikej kampa yaya mokauatij se youak, semej kitentapoj ikoxtal para kitamakas iburro uan kiitak ke ompa yetoya itomin.
28 Niman kiniluij iikniuan: “¡Nechkepilijkej notomin! ¡Xikitakan! ¡Nikan yetok itech nokoxtal!”. Uan nochin motelmoujtijkej hasta uiuiyokayaj, uan moiluiayaj: “¿Keyej Dios techchiuilijtok nejin?”.
29 Keman ajsikej Canaán, kampa yetoya inintat kitapouijkej nochi tein kinpanoka. Kiluijkej:
30 “Takat akin taixyekana Egipto techchikaujkanojnotsak uan techiluij ke titapijpiatoj ompa.
31 Sayoj ke tejuan tikiluijkej: ‘Amo tiknemilijtiuitsej tikchiuaskej tein amo kuali. Amo titapijpiakoj.
32 Tejuan tidocejmej uan sayoj se topaj. Se amo touanok* uan akin xokoyot iuan yetok topaj ompa Canaán’.
33 Sayoj ke nejon takat techiluij: ‘Nikmatis ke amo nanechkajkayaujtokej komo nankichiuaj tein namechiluiti. Xinechkauilikan se namokniuj. Xikinuikilikan trigo namochankauan para maj kipiakan toni kikuaskej uan xiakanya.
34 Uan xinechualkuilikan namokniuj akin xokoyot para nikmatis ke amo nanechkajkayaujtokej uan ke amo nantapijpiakoj. Sayoj ijkon namechkepilis namokniuj uan uelis nankikouaskej tein nankinekiskej nikan’”.
35 Keman sejse kikixtij tein kipiaya itech ikoxtal, kiitakej ke ompa yetoya inintomin. Keman yejuan uan inintat kiitakej tomin motelmoujtijkej.
36 Uan Jacob kijtoj: “¡Nanechinkuilijtokej nokoneuan! ¡José amo touanok! ¡Simeón amo no touanok! ¡Uan axkan nankiuikasnekij Benjamín! ¡¿Keyej nejua nikijyouia nochi nejin?!”.
37 Sayoj ke Rubén kiluij itat: “Komo amo nimitsualkuilia, uelis tikinmiktis ome nokoneuan. Xinechkauili, nejua nikyekpias uan oksepa nimitsualkuilis”.
38 Sayoj ke Jacob kinankilij: “Nokoneuj amo namouan temos, porin iikniuj momikilijya uan sayoj yejua mokaua. Komo teisa kipanoua itech ojti uan miki, axkan ke nitatajtsinya nankichiuaskiaj maj niteltayokoya hasta maj nimiki”.*
Tajtolmelaualismej
^ Oso “kitejtemik”.
^ Oso “amo nemiok”.
^ Itech hebreo, “por iesyo”.
^ Oso “kitsikoj”.
^ Oso “kitemitianij”.
^ Oso “amo nemiok”.
^ Oso “nitamiti itech Miketekoch (Seol)”. Seol kijtosneki kampa moseuijtokej mikemej. Xikonita miketekoch.
