Génesis 43:1-34
43 Itech tal tein poui Canaán, tel fiero tatasojtia.
2 Yejua ika, keman tamik trigo tein kiualkuikaj de Egipto, Israel kiniluij ikoneuan: “Oksepa xiakan xikouatij tepitsin”.
3 Uan Judá kiluij: “Nejon takat techyekiluij: ‘Amo nikneki nikan namechitas komo amo nankiualkuij namokniuj’.
4 Komo tikaua Benjamín maj touan youi, titemoskej uan tikouaskej tein tikuaskej.
5 Sayoj ke komo amo tikaua maj youi, amo tiaskej, porin nejon takat techiluij: ‘Amo nikneki nikan namechitas komo amo nankiualkuij namokniuj’”.
6 Uan Israel kintajtanij:* “¿Keyej nanechchiuilijkej nejon? ¿Keyej nankiluijkej nejon takat ke nankipiaj okse namokniuj?”.
7 Yejuan kinankilijkej: “Nejon takat techyektajtanij tiakonimej tikatkaj uan akonimej toparientes. Techtajtanij: ‘¿Nemiok namopaj? ¿Nankipiaj okse namokniuj?’. Uan tejuan tiknankilijkej nochi. Amo tikmatiaj ke techiluiskia maj tikuikakan tokniuj”.
8 Uan Judá kiteliluij itat: “Xikaua maj nikuika mookichpil, xitechkaua maj tiakan para maj amo timayanmikikan tejuan, tokoneuan nion tejua.
9 Nimitsyekiluia ke amo teyi kipanos. Nejua notajtakol yeski komo teisa kipanoua. Komo amo nimitsualkuilia, amo keman uelis nikixtauas notajtakol.
10 Sayoj ke ojpaya tiaskiaj uan timokepaskiaj komo amo nikan tiuejkaujtoskiaj”.
11 Yejua ika inintat kiniluij: “Komo amo ueliok nikchiua okse taman, xikchiuakan tein namechiluiti. Xikoxtalkalakikan tein okachi kuali tein nikan onkak uan xikuikilikan nejon takat: tepitsin chokil tein ajuiyak tein monotsa bálsamo, ládano, tepitsin nekti,* koujeuat tein chokiloj, pistachos* uan almendras.
12 Xikuikakan okse achi namotomin uan no xikuikakan tomin tein namechtalilijkej itech namokoxtal. Xa mopolojkej.
13 Xikuikakan namokniuj uan xikitatij nejon takat.
14 Maj Dios akin kipia nochi chikaualis kichiua maj nejon takat namechikneli uan maj kikajkaua okse namokniuj uan Benjamín. Uan komo moneki nikpolos okse nokoneuj, amo teyi ueli nikchiuaok”.
15 Satepan ke kikuikej nochi inintomin uan tein inintat kiniluij maj kiuikakan, kikuikej ojti uan temokej Egipto iuan Benjamín. Uan oksepa kiitatoj José.
16 Keman José kiitak ke Benjamín ualaya iniuan, nimantsin kiluij takat akin taixyekanaya ichan: “Xikinuika nejin takamej kalijtik, xikinmikti seki tapialmej uan xitakualchiua, porin nepantaj nouan takuaskej”.
17 Nejon takat niman kichiuak tein José kinauatij uan kinuikak ichan José.
18 Sayoj ke iikniuan momoujtijkej keman kinuikakej ichan José. Peujkej moiluiaj: “Techualkuikej nikan por nejon tomin tein techkepilijkej uan kitalijkej itech tokoxtaluan. ¡Axkan techkitskitij uan techtekitiltitij kemej takeualmej akin kinnamakakej, uan techinkuilitij toburros!”.
19 Yejua ika keman ajsitoj kaltenoj, kinojnotskej takat akin taixyekanaya ichan José.
20 Kiluijkej: “Tejuatsin, tiknekij timitsiluiskej teisa. Keman yekinika tiualajkaj nikan, tiualajkaj para tikouaskej trigo.
21 Sayoj ke keman timokepayajya uan tiajsikej kampa yaya timokauatij se youak, uan peuak tiktapouaj tokoxtaluan, ¡takaj totomin yetoya itech sejse tokoxtal! Ompa yetoya nochi totomin. Yejua ika tikualkuij uan tiknekij tikepaskej.
22 Uan no tikualkuij okachi tomin para tikouaskej trigo. Amo tikmatij akoni kitalij totomin itech tokoxtaluan”.
23 Uan yejua kiniluij: “Amo ximouikan. Amo teyi ximoluikan. NamoDios uan iDios namopaj kitalij nejon tomin itech namokoxtaluan. Nejua nikmati ke namejuan nantaxtaujkej porin nechmakakej namotomin”. Satepan kinualkuilij Simeón.
24 Uan nejon takat kinkalakij ichan José, kinmakak at para mometspajpakaskej uan kinualkuilij tein kikuaskiaj ininburros.
25 Kemej yejuan kimatkej ke José ejkoskia nepantaj uan iuan takuaskiaj, kiyejyektalijkej tein yaya kimakatij José.
26 Keman José kalakito ichan, yejuan kimakakej tein kiuikiliayaj uan motankuaketskej iixpan uan moixpilojkej hasta talpan.
27 Satepan José kintajtanij keniuj yetoyaj. Uan no kintajtanij: “Nanechiluijkaj ke nankipiajok namopaj uan tatajtsinya, ¿keniuj yetok? ¿Paktok?”.
28 Yejuan kinankilijkej: “Noteko, topaj kuali yetok, paktok”. Uan motankuaketskej iixpan uan moixpilojkej hasta talpan.
29 Keman kiitak iiknitsin, Benjamín, kintajtanij: “¿Yejua nejin namokniuj tein xokoyot?”. Uan kiluij Benjamín: “Maj Dios mitstatiochiui nokonetsin”.
30 Sayoj ke José amo taxikojok keman kiitak iiknitsin. Yejua ika niman kisteuak porin yaya chokatiya. Kalakito icuarto uan peuak choka.
31 Keman tepitsin moyolseuij, moixpajpakak, kisak uan kijtoj: “Xiktekakan takual”.
32 José kitekilijkej itakual itech se mesa, iikniuan itech okse mesa uan oksekin de Egipto akin ompa yetoyaj kintekilijkej takual itech okse mesa. Porin akin katkaj de Egipto amo ueliaj takuayaj iniuan akin kinixmatiaj kemej hebreos* porin tel amo kuali kiitayaj nejon.
33 Uan kiniluijkej iikniuan maj motalikan taixpan de kampa yetoya José. Akin tayekana kitalijkej kampa ipa motaliaya akin tayekana uan xokoyot kampa ipa motaliaya akin xokoyot. Uan yejuan mosenixijitayaj.
34 José tanauatiaya maj takual tein yetoya itech imesa kinuikilianij iikniuan. Sayoj ke tanauatiaya maj Benjamín kitekilianij okachi* ke iikniuan. Uan kisentokakej takuajkej uan tatayikej hasta ke kuali ixuikej.
Tajtolmelaualismej
^ Oso “kintajtoltij”.
^ Oso “miel”.
^ Nejin tamati kemej kakauat, sayoj ke kostik uan xoxoktik.
^ Oso “naui achiok”.
