Génesis 45:1-28
45 Uan José chokasnekia uan amo taxikojok, yejua ika chikauak kiniluij itakeualuan: “¡Xikisakan nanochin!”. Uan keman sayoj mokauayaj iikniuan, José kiniluij akoni katka.
2 Uan peuak chikauak choka, hasta kikakkej akin ompaka yetoyaj uan akin nemiaj ichan tekiuaj no kimatkej.
3 Uan José kiniluij iikniuan: “Nejua niJosé. ¿Yoltokok nopaj?”. Sayoj ke iikniuan amo uelik kinankilijkej porin semi kimojkaitakej.
4 Uan José kiniluij iikniuan: “Ximoualtokikan”. Uan yejuan motokijkej.
Yejua kiniluij: “Nejua niJosé, namokniuj, akin nankinamakakej uan kiualkuikej nikan Egipto.
5 Sayoj ke axkan amo teyi ximoluikan nion ximopapantikan, porin Dios achto nejua nechualkuik para maj amo timikikan.
6 Ome xiuitya tel tatasojti uan amo onkak toni se kikuas, uan makuil xiuitok amo teyi motachiuas.
7 Dios achto nejua nechualtitanik para namechmakixtis kemej amo nankinemiliayaj, uan ijkon amo nantamiixpoliuiskej.
8 Yejua ika, amo namejuan nanechualtitankej nikan, ta toTajtsin Dios. Yejua nechixtalij para maj nikpaleui tekiuaj maj kimati toni kichiuas, para maj nejua nitaixyekana ichan uan para maj no nitaixyekana itech nochi Egipto.
9 ”Yejua ika, niman xipankisakan kampa nemi nopaj uan xikiluikan: ‘Mookichpil José techiluij nejin: “Dios kichiuak maj niueyichiujkej itech nochi Egipto. Xitemo, uan niman xinechajsiki.
10 Tinemis ompa Gosén, amo uejka de kampa nejua ninemi. Ompa tietos iniuan mokoneuan uan moixuiuan. Ompa no tikinpias motapialuan uan nochi tein tikpia.
11 Nejua nimitsmakas tein tikuas tejua uan mochankauan porin makuil xiuitok tel tatasojtis. Komo amo, nanochin namotatamiliskej”ʼ.
12 Namejuan uan nokniuj Benjamín ueli nankiitaj ke yekmelauj nejua namechnojnotstok.
13 Xikiluikan nopaj ke semi niueyichiujkej nikan Egipto uan no xiktapouikan nochi tein nankiitanij. Xikuitiuetsitij nopaj”.
14 Uan José kinauaj Benjamín uan peuak choka, uan Benjamín no chokatoya keman kinauajtoya.
15 Uan no, José kinmakak se beso* nochin iikniuan, kinnauaj uan chokatiaya. Satepan, iikniuan peuak kinojnotsaj.
16 Uan akin nemiaj ichan tekiuaj kimatkej ke ualajkaj iikniuan José. Keman tekiuaj uan itakeualuan kimatkej nejon semi yolpakkej.
17 Yejua ika tekiuaj kiluij José: “Xikinilui mokniuan nejin: ‘Xikintamamaltikan namoburros, xiakan Canaán
18 uan xikinualkuikan namopaj uan namochankauan. Namechmakas tein okachi kuali tein onkak nikan Egipto uan nankikuaskej tein okachi kuali tein nikan mochiua’.
19 Uan no xikinilui nejin: ‘Xikinuikakan carros de nikan Egipto para nankinualkuiskej namokoneuan uan namosiuauan. Xikualkuikan namopaj itech se carro.
20 Maj amo namechtekipacho tein nankipiaj, porin namoaxka nochi tein okachi kuali tein onkak nikan Egipto’”.
21 Uan ijkon kichiujkej ikoneuan Israel. Uan no, José kinmakak carros ijkon kemej tekiuaj kinauatijka, uan no kinmakak tein kikuaskiaj itech ojti.
22 Nochin kinmajmakak sejse tasal* tein yankuik, sayoj ke Benjamín kimakak kemej eyi kilo uan tajko* plata uan makuil tasal tein yankuik.
23 Uan kititanilij itat majtakti burros tein kiuikayaj miak taman tein kuali tein onkaya Egipto. No kititanilij majtakti burros tein kiuikayaj trigo, pantsin uan okseki taman tein kikuaskia itech ojti.
24 José monauatij iniuan iikniuan, uan keman yajtoyajya kiniluij: “Amo ximoteuijtiakan”.
25 Uan yejuan kiskej de Egipto uan pankiskej hasta Canaán, kampa yetoya inintat, Jacob.
26 Uan kiluijkej: “¡José yoltok uan taixyekana itech nochi Egipto!”. Sayoj ke Jacob amo teyi kiniluij porin amo kinneltokilij.
27 Sayoj ke keman peuak kitapouiaj tein José kiniluijka uan keman kiitak carros tein José kititanilijka para maj kiuikakan, Jacob kiyekmatik.
28 Uan Israel kijtoj: “¡Axkan kemaj nikneltokaya! ¡Nookichpil José yoltok! ¡Moneki nias nikitatiuj achto ke nimomikilis!”.
Tajtolmelaualismej
^ Oso “kinpitsoj”, “kintenamik”.
^ Oso “tilmaj”.
^ Oso “300 siclos”. Xikonita B14.
