Génesis 47:1-31
47 Uan José kiluito tekiuaj: “Nopaj uan nokniuan ualajkej de Canaán uan kinualkuikej ininichkauan,* ininkuakuejuan uan nochi tein kipiaj. Yetokej ompa Gosén”.
2 Uan José kinuikak makuil iikniuan kampa yetoya tekiuaj.
3 Tekiuaj kintajtanij* iikniuan José: “¿Toni ika nantekitij?”. Yejuan kinankilijkej: “Noteko, tejuan tikinyekpiaj ichkamej, ijkon kemej touejkaujtatuan”.
4 Uan no kiluijkej: “Tejuan amo nikan tikayomej, sayoj ke nikan tinemikoj porin ompa Canaán tel fiero tatasojti uan amo teyi sakat para totapialuan. Noteko, timitstataujtiaj xitechkaua maj tinemikan Gosén”.
5 Tekiuaj kiluij José: “Mopaj uan mokniuan mitsajsikoj.
6 Uelis tikinmakas tein yeski tal tein tiknekis. Xikinuika mopaj uan mokniuan maj nemitij itech tal tein okachi kuali nikan Egipto. Maj nemikan ompa Gosén. Uan komo tikmati ke sekin kuali tekitij, xikinnauati maj kinyekpiakan notapialuan”.
7 Uan José kiuikak Jacob kampa yetoya tekiuaj para maj kiixmati. Uan Jacob kitiochiuak tekiuaj.
8 In tekiuaj kitajtanij Jacob: “¿Kanachi xiuit tikpia?”.
9 Jacob kinankilij: “Nikuika 130 xiujmej miakkan nimokaltalijtinemi. Semi nitajyouiani nejon xiujmej, sayoj ke nouejkaujtatuan okachi miak xiujmej mokaltalijtinenkej”.
10 Satepan, Jacob kitiochiuak tekiuaj uan yajki.
11 Yejua ika José kiuikak itat uan iikniuan maj nemikan itech tal tein okachi kuali ompa Egipto, kampa moixmatia kemej Ramesés, ijkon kemej kinauatijka tekiuaj.
12 José kinmakaya toni kikuaskej itat, iikniuan uan nochin ichankauan itat. Kinmakaya ijkon kemej kinajsiskia.
13 Uan amo onkaya toni se kikuas itech nochi Egipto uan Canaán porin tel fiero tatasojtia. Akin ompa nemiaj semi tajyouijtoyaj.
14 José kinnamakiltiaya tein kikuaskiaj akin nemiaj Egipto uan Canaán, uan tomin tein kisentiliaya kiuikaya ichan tekiuaj.
15 Satepan, akin nemiaj Egipto uan Canaán motomintamijkej. Yejua ika nochin akin nemiaj Egipto yayaj kiitatij José uan kiluiayaj: “¡Timotomintamijkejya! ¡Xitechmaka toni tikuaskej! Komo amo, timikitij”.
16 José kiniluij: “Komo amo nankipiajok tomin, xinechualkuilikan namotapialuan uan namechmakas tein nankikuaskej”.
17 Yejua ika, yejuan peuak kiuikiliaj José inintapialuan. Kiuikiliayaj caballos, ichkamej, chivos, kuakuejmej uan burros, uan yejua kinmakaya tein kikuaskej. Ijkon kichiujkej nejon xiuit.
18 Sayoj ke nejon xiuit tamik. Uan okse xiuit, yejuan peuak oksepa kiitatij José uan kiluitij: “Noteko, tiknekij timitsiluiskej ke timitsmakakejya nochi totomin uan nochi totapialuan. Sayoj tikpiaj para timitsmakaskej totaluan uan timotemakaskej tejuan.
19 Amo xitechkaua maj timikikan uan maj totaluan nenkaj ompa mokauakan. Tiknekij xitechmaka tein tikuaskej, yejua ika xitechkoua uan xitechkouili totaluan. Tiyeskij tiitakeualuan tekiuaj uan totaluan iaxka yeski. Xitechmaka xinach para maj amo timikikan uan para maj totaluan amo ijkonsan mokauakan”.
20 Uan kemej tel fiero tatasojtia, akin nemiaj Egipto kinamakakej inintaluan uan José kinkouilij nochi inintaluan para in tekiuaj. Uan nochi nejon talmej iaxkaya katka tekiuaj.
21 Uan José kiniluij akin nemiaj itech nochi Egipto maj nemitij itech uejueyi xolalmej.
22 Sayoj amo kikouak inintaluan tiopixkamej. Kemej tekiuaj kinmakaya toni kikuaskej, amo monekik kinamakaskej inintaluan.
23 Uan José kiniluij akin kiitatoj: “Axkan namechkouak uan namechkouilij namotaluan para in tekiuaj. Nikan yetok xinach para xitatokakan.
24 Keman nankitekiskejya tatok, kampa nankikixtiskej makuil koxtalmej se xikmakakan tekiuaj. Naui koxtalmej tein mokauaskej uelis oksepa nankitokaskej uan ika nantakuaskej namejuan, akin nemij namochan uan namokoneuan”.
25 Uan yejuan kiluijkej: “Tasojkamatik noteko, porin titechmakixtij. Komo tikita ke kuali yetok, tiyeskij tiitakeualuan tekiuaj”.
26 Uan José kiixtalij se tanauatil tein hasta axkan ixyetokok ompa Egipto: kampa kikixtiskej makuil koxtalmej de tatok, se maj kimakakan tekiuaj. Sayoj inintaluan tiopixkamej amo iaxkatik tekiuaj.
27 Israel nemik itech tal tein poui Gosén, ompa Egipto. Yejua uan ichankauan ompa mokaltalijkej, kinpiakej konemej uan motelmiakilijkej.
28 Jacob nemik 17 xiujmej ompa Egipto hasta keman kiajxitij 147 xiujmej.
29 Keman Israel yaya momikilitiya kinotsak iokichpil, José uan kiluij: “Komo yekmelauj tinechtasojta, nimitstataujtia xinechyekilui* ke nochipa tinechtasojtas uan ke tikchiuas tein nimitsiluiti. Nimitstataujtia amo xinechtoka nikan Egipto.
30 Keman nimomikilis, xinechkixti de Egipto uan xinechtokati kampa kintokkej nouejkaujtatuan”. Uan José kiluij: “Nikchiuas tein tinechtajtania”.
31 Sayoj ke Jacob kiluij: “Xinechyekilui ke ijkon tikchiuas”. Uan José kiyekiluij. Uan Israel moixpiloj itech icama kampa yetoya ikuatapech.
Tajtolmelaualismej
^ Oso “ininborregos”.
^ Oso “kintajtoltij”.
^ Itech hebreo, “xiktali momay nokestampa”. Ijkon kinextiayaj ke yekmelauj kichiuaskiaj tein motenkauayaj.
