Génesis 48:1-22
48 Satepan ke mochiuak nejin, kiluijkej José: “Mopaj tel tatajtsinya uan amo taxikouaok”. Yejua ika José kiitato uan kinuikak iokichpipiluan, Manasés uan Efraín.
2 Uan kiluijkej Jacob: “Mookichpil José mitsitako”. Yejua ika Israel tekit meuak uan motalij itech icama.
3 Uan Jacob kiluij José:
“Dios akin kipia nochi chikaualis monextij noixpan ompa Luz, itech tal tein poui Canaán uan nechtiochiuak.
4 Yejua nechiluij: ‘Nikchiuas xikinpia mokoneuan uan maj momiakilikan. Nikchiuas ximochiua inintat akin nemiskej itech miak altepemej. Nejin tal nikinmakas mokoneuan uan nikchiuas maj nochipa ininaxka’.
5 Uan axkan, noaxkauanya ome mookichpipiluan tein tikinpiak nikan Egipto achto ke nimitsualajsiskia. Efraín uan Manasés yeskij nokoneuan ijkon kemej Rubén uan Simeón.
6 Sayoj ke konemej tein satepan tikinpias yeskij moaxkauanya. Uan yejuan nemiskej itech tal tein ininikniuan kinkauiliskej.
7 Nejua niualaya de Padán uan iuan nietoya momaj Raquel keman momikilij ompa Canaán. Sayoj ke, kemej uejkaok techpolouaya para tiajsiskej, niktokak itech ojti tein youi Efrat, tein no monotsa Belén”.
8 Uan Israel kinitak iokichpipiluan José uan kitajtanij:* “¿Yejuan nejin mookichpipiluan?”.
9 Uan José kinankilij: “Kemaj, yejuan nejin nokoneuan, akin Dios nechinmakak nikan”. Uan itat kiluij: “¿Uelis tikinualtokis? Nikneki nikintiochiuas”.
10 Israel amo yektachiayaok porin tel tatajtsinya katka. Yejua ika José kintokij iokichpipiluan uan Israel kinmakak se beso* uan kinnauaj.
11 Satepan, Israel kiluij José: “Amo keman niknemilij ke oksepa nimitsitaskia, sayoj ke axkan Dios nechkauak maj nikinita mokoneuan”.
12 Uan José kinajchiuak ikoneuan de itankuayuan Israel uan motankuaketsak iixpan uan moixpiloj hasta talpan.
13 Uan José kintokij ome iokichpipiluan kampa yetoya Israel. Kikuik Efraín ika iyekmay uan kitalij iopochmakopa Israel. Uan kikuik Manasés ika iopochmay uan kitalij iyekmakopa Israel.
14 Sayoj ke Israel kitalij iyekmay ikuako Efraín maski katka xokoyot, uan kitalij iopochmay ikuako Manasés. Ijkon kichiuak maski kimatia ke Manasés tayekanaya.
15 Satepan kitiochiuak José uan kijtoj:
“Maj toTajtsin Dios, akin noueyitat Abrahán uan nopaj Isaac kitekitilijkej kintatiochiui nejin okichpipil.Yejua toTajtsin Dios akin nochipa nechyekpiani kemej se ichkatajpixkej hasta axkan,
16 uan kichiuani maj iángel nechmakixti para maj amo teyi nechpano.
Maj nochin nechelnamikikan nejua, noueyitat Abrahán uan nopaj Isaac por nejin okichpipil,uan maj motelmiakilikan ininkoneuan”.
17 Sayoj ke José kiitak ke itat kisentokaya kitalijtoya iyekmay ikuako Efraín uan José amo kiuelitak. Yejua ika kimakitskij itat para kimaijkuanis uan kitalis imay ikuako Manasés.
18 José kiluij itat: “Amo paj, ta akin tayekana yejua nejin. Ikuako xiktali moyekmay”.
19 Sayoj ke itat amo mokauak uan kiluij: “Kemaj nokonetsin, nikmattok. Ikoneuan no momiakiliskej uan yejua no yeski ueyichiujkej. Sayoj ke iikniuj akin xokoyot yeski okachi ueyichiujkej, uan kemej ikoneuan motelmiakiliskej hasta mochiuaskej uejueyi altepemej”.
20 Uan kisentokak kintiochiuak nejon tonal uan kijtoj:
“Maj israelitas mitsteneuakan keman kinnejnekiliskej tein kuali oksekin uan maj kijtokan:‘Maj Dios mitstatiochiui kemej Efraín uan Manasésʼ”.
Uan yejua kisentokak kitiochiuak Efraín achto ke Manasés.
21 Satepan Israel kiluij José: “Amo uejkaua nimomikiliti, sayoj ke Dios yekmelauj kisentokas namechpaleuis uan kichiuas ximokepakan kampa nemiaj namouejkaujtatuan.
22 Mokniuan nikinmakati sejse cacho tal, sayoj ke tejua nimitsmaka se cachojok. Nejon tal nikinkuilij akin kinixmatij kemej amorreos ika nomachete tein ojkan tenej* uan noarco”.*
Tajtolmelaualismej
^ Oso “kitajtoltij”.
^ Oso “kinpitsoj”, “kintenamik”.
^ Oso “noespada”.
^ Oso “tein ika niktamota flechas”.
