Génesis 50:1-26
50 Yejua ika José kinauaj itat, kichokilij uan kimakak se beso.*
2 Satepan, José kinnauatij itakeualuan, akin katkaj tapajtianij, maj kitalilianij aceite itat para maj amo niman uejueliui. Uan tapajtianij ijkon kichiuilijkej Israel.
3 Yejuan kichiujkej nejon 40 tonalmej, porin yejua nejon tonalmej tein kikuij para kintaliliskej aceite akin momikiliaj. Uan akin nemiaj Egipto kichokilijtoyaj 70 tonalmej.
4 Keman tamik tonalmej keman kichokilijtoyaj, José tajtoj iniuan akin yetoyaj ichan tekiuaj uan kiniluij: “¿Uelis nankiluiskej tekiuaj nejin?:
5 ‘Nopaj nechiluij: “Xinechyekilui ke keman nimomikilis, tinechtokas kampa nitachkuak ompa Canaán”. Nimitstataujtia, xinechkaua maj nipankisa uan maj niktokati nopaj, uan satepan nimokepas’”.
6 Uan tekiuaj tanankilij: “Xiktokati mopaj, ijkon kemej timotenkauak iuan”.
7 Uan José pankisak kitokato itat. Iuan yajkej nochin itakeualuan tekiuaj, akin taixyekanayaj ichan tekiuaj, nochin taixyekananij de Egipto,
8 uan nochin akin nemiaj ichan José, iikniuan uan akin nemiaj iuan itat. Sayoj kinkaujkej ompa Gosén pipiltsitsin, ichkamej,* chivos uan kuakuejmej.
9 No iuan yajkej akin kiuikayaj carros uan akin kinuikayaj caballos. Tel miakej katkaj.
10 Uan ajsikej Atad, itech se tal kampa kichipauayaj tatok. Atad amo uejka yetok den ueyiat Jordán. Ompa peuak chikauak tayokolchokaj, uan José kichokilijtoya itat chikome tonal.
11 Keman akin nemiaj ompa Canaán kiitakej ke tel tayokolchokatoyaj ompa Atad, kijtojkej: “Akin uitsej de Egipto tel tayokoxtokej”. Yejua ika nejon lugar, tein amo uejka yetok den ueyiat Jordán kitokaytijkej Abel-Mizraim.*
12 Ikoneuan Jacob kichiujkej nochi tein yejua kinnauatijka.
13 Yejua ika kiuikakej ompa Canaán uan kitokkej itech tepekoyok tein yetok Macpelá, amo uejka de Mamré. Abrahán kikouilijka Efrón akin katka hitita nejon tal para kitokas isiuatsin.
14 Satepan ke José kitokak itat, mokepak Egipto iniuan iikniuan uan iniuan nochin akin iuan yajkaj kitokatoj itat.
15 Satepan ke momikilij inintat, iikniuan José peuak moiluiaj: “José xa techelnamikiliaok keniuj tiktajyouiltijkej uan xa kinekis momakepas”.
16 Yejua ika kimatiltijkej José nejin: “Achto ke momikiliskia mopaj, tanauatij nejin:
17 ‘Yejua nejin tein moneki nankiluiskej José: “Nokonetsin, tel amo kuali tein mitschiuilijkej mokniuan. Sayoj ke nimitstataujtia xikintapojpolui”’. Yejua ika José, timitstataujtiaj xikintapojpolui, porin yejuan no kitekitiliaj iDios mopaj”. Keman kiluijkej nejon, José peuak choka.
18 Uan iikniuan no kiitatoj uan motankuaketskej iixpan uan kiluijkej: “¡Axkan timotakeualuan. Xitechchiuili tein tiknekis!”.
19 José kiniluij: “Amo ximouikan. Nejua amo niDios.
20 Maski namejuan nanechtajyouiltisnekiaj, Dios kikauak maj pano nejon para kichiuas teisa tein kuali uan kinmakixtis miakej. Uan yejua nejon tein kichiujtok axkan.
21 Yejua ika, amo ximouikan. Niksentokas namechmakas tein nankikuaskej namejuan uan namopipiltsitsin”. Yejua kualtsin kinnojnotsak uan ijkon kinyolseuij.
22 José uan nochin ichankauan itat kisentokakej nenkej Egipto. Uan José nemik 110 xiujmej.
23 Uan no, José kinixmatik hasta iixuiuan Efraín uan ikoneuan Makir, akin katka ikoneuj Manasés. José kinitaya kemej ikoneuan.*
24 Keman José yaya momikilitiya, kiniluij iikniuan: “Amo uejkaua nimomikiliti, sayoj ke Dios namechpaleuikiuj. Uelis nankiyekmatiskej ke yejua namechkixtis de nikan uan namechuikas itech tal tein motenkauak kimakas Abrahán, Isaac uan Jacob”.
25 Uan José no kiniluij ikoneuan Israel: “Xikyekmatikan ke Dios namechpaleuikiuj. Xinechyekiluikan ke nankiuikaskej noomiyouan”.
26 Uan José momikilij ompa Egipto keman kipiaya 110 xiujmej. Kitalilijkej aceite para maj amo niman uejueliui uan kitalijkej itech se caja.
Tajtolmelaualismej
^ Oso “kipitsoj”, “kitenamik”.
^ Oso “borregos”.
^ Tokayit tein kijtosneki ‘inintayokol akin nemij Egipto’.
^ Itech hebreo, “Yejuan yolkej itankuako José”.
