Jonás 4:1-11
4 Sayoj ke Jonás nion tepitsin kiuelitak nejon uan semi kualanik.
2 Yejua ika kitataujtij Jehová uan kiluij: “Jehová, ipa nikmatiaya keman nietoya nochan ke ijkon tikchiuaskia. Yejua ika keman yekinika tinechualtitanik, nicholojteuak Tarsis, porin nikmatia ke tejua tiyolkuali uan titeiknelia, amo niman tikualani* uan nochipa titetasojta uan amo tikneki titetatsakuiltis.
3 Yejua ika Jehová, nimitstataujtia xikaua maj nimiki porin amo nikneki niyoltosok”.
4 Jehová kitajtanij:* “¿Timoluia ke kinamiki xitelkualanto?”.
5 Satepan Jonás motalito kampa ueliskia kiuejkaitas ueyi xolal Nínive, kampa ualkisa tonaltsin. Kichijchiuak se kaltsin ika kuopajsol para amo tonaltatas uan ompa motalij para kiitas ox kintatsakuiltiskiaj akin nemiaj Nínive.
6 Kemej Jehová Dios kiitak ke Jonás tajyouijtoya, kichiuak maj moskalti se ayoj para maj imaxiujyo kipaleuiani maj amo kuatata. Uan Jonás semi kiuelitak maj moskaltiani nejon ayoj.
7 Sayoj ke mostika kualkan, Dios kichiuak maj se ijkochin* kiuatsa nejon ayoj.
8 Keman tanesik, Dios no kichiuak maj peua tonalejeka desde kampa ualkisa tonaltsin. Kemej tel tonaya, Jonás semi kuatataya uan hasta ixtayouaya. Uan kisentokaya kitajtaniaya Dios maj miki. Kijtouaya: “Amo nikneki niyoltosok, okachi kuali maj nimiki”.
9 Dios kitajtanij Jonás: “¿Timoluia ke kinamiki xitelkualanto porin uakik in ayoj?”.
Yejua kinankilij: “Kemaj, kinamiki maj nitelkualanto, hasta nikneki nimikis porin nitelkualantok”.
10 Sayoj ke Jehová kiluij: “Timoyolkokoj keman tikitak ke uakik in ayoj.* Uan amo tejua tiktokak nion tikchiuak maj moskalti, ta se youak iselti moskaltij uan mostika youak uakik.
11 Yejua ika, ¿amo no kinamiki maj nikinikneli akin nemij itech ueyi xolal Nínive uan inintapialuan? Ompa nemij panoua 120 mil uan yejuan nion kimatij toni kuali uan toni amo kuali”.
Tajtolmelaualismej
^ Oso “amo tiyolijsiui”.
^ Oso “kitajtoltij”.
^ Oso “chankueta”.
^ Oso “Tikiknelij ayoj keman tikitak ke uakik”.
