Josué 17:1-18
17 Keman kitatamotkej tetsitsin* nesik katiyejua talmej kinmakaskiaj ichankauan Manasés. Manasés katka ikoneuj José akin tayekanaya. Makir, ikoneuj Manasés akin tayekanaya, kimakakej Galaad uan Basán porin katka soldado. Makir katka itat Galaad.
2 Uan no kinmajmakakej inintal ichankauan Manasés akin ayamo kintaxejxelouiliayaj. Kinmajmakakej talmej ikoneuan Abí-Ézer, ikoneuan Hélec, ikoneuan Asriel, ikoneuan Siquem, ikoneuan Héfer uan ikoneuan Semidá. Yejuan katkaj takamej akin kinixyekanayaj ichankauan Manasés, ikoneuj José.
3 Sayoj ke Zelofehad ikoneuj Héfer amo kinpiak okichpipil ta sayoj siuapipil. Yejuan monotsayaj Mahlá, Noá, Hoglá, Milcá uan Tirzá. Itat Zelofehad katka Héfer uan iueyitat katka Galaad. Itat Galaad katka Makir uan iueyitat katka Manasés.
4 Isiuapipiluan Zelofehad kiitatoj tiopixkat Eleazar, Josué ikoneuj Nun uan taixyekananij israelitas. Yejuan kiniluijkej: “Jehová kinauatijka Moisés maj no techmakani talmej kampa kintaxejxelouiliskiaj tochankauan”. Yejua ika kinmakakej talmej kampa kintaxejxelouilijkaj inintíos, ijkon kemej Jehová tanauatijka.
5 Ichankauan Manasés kinmakakejok majtakti talmej. Achto kinxejxelouilijkajya Galaad uan Basán tein yetokej oksekopa* den ueyiat Jordán.
6 Yejuan kinmakakejok nejin talmej porin siuamej akin katkaj ichankauan Manasés no kintaxejxelouilijkej ijkon kemej kintaxejxelouilijkej takamej. Sayoj ke okseki ichankauan Manasés ininaxkaya katka Galaad.
7 Inintal ichankauan Manasés peua desde Aser uan ajsi hasta Micmetat, tein yetok taixpan de Siquem. Youi tanikopa* uan ajsi hasta inintal akin nemij En-Tapúah.
8 Ueyi xolal Tapúah ininaxka ichankauan Efraín, sayoj ke nochi in tal tein kiyoualoua ueyi xolal ininaxka ichankauan Manasés. Inintal ichankauan Manasés tami ompa Tapúah.
9 De ompa youi tanikopa* den atauit* tein yetok Caná. Kampa kintaxejxelouilijkej ichankauan Manasés yetokej seki uejueyi xolalmej tein ininaxka ichankauan Efraín. Inintal ichankauan Manasés peua ajkokopa den atauit tein yetok Caná uan tami hasta mar Mediterráneo.
10 Talmej tein yetokej tanikopa* ininaxka ichankauan Efraín, uan tein yetokej ajkokopa ininaxka ichankauan Manasés. Inintal ichankauan Manasés tami hasta in mar. Ajkokopa, talmej tein kinmakakej ichankauan Manasés ajsi hasta Aser, uan oksekopa kampa ualkisa tonaltsin ajsi hasta Isacar.
11 Seki uejueyi xolalmej tein kinmakakej ichankauan Manasés yetokej kampa kintaxejxelouilijkej ichankauan Isacar uan Aser. Ichankauan Manasés kinmakakej Bet-Seán uan Ibleam uan xolaltsitsin tein ompa pouij. No kinmakakej Dor, En-Dor, Taanac uan Meguidó uan nochin akin ompa nemij. No kinmakakej xolaltsitsin tein ompa pouij. Eyi nejon uejueyi xolalmej yetokej kampa tepeyoj.
12 Sayoj ke ichankauan Manasés amo uelik moinaxkatilijkej nejon uejueyi xolalmej porin cananeos amo kinekkej kisaskej de ompa.
13 Keman soldados israelitas miakiakej, semi kintekitiltijkej cananeos. Sayoj ke amo uelik senkis kintalkuilijkej.
14 Ichankauan José kiluijkej Josué: “Tejuan semi timiakej porin Jehová techtatiochiuijtok hasta axkan, sayoj ke amo titechmakak okachi talmej ta sayoj tein kisak keman nankitatamotkej tetsitsin, tal tein titechxejxelouilij amo ueyi uan amo techajsi”.
15 Josué kiniluij: “Komo semi namiakej uan amo namechajsi tal kampa tepeyoj tein kinxejxelouilijkej ichankauan Efraín, xiakan inintal perizitas uan inintal refaím, xikintamotakan* koujmej uan xitachipauakan para ompa uelis nanemiskej”.
16 Ikoneuan José kiluijkej: “Amo techajsis talmej tein yetokej kampa tepeyoj. Uan nochin cananeos akin nemij kampa yetok tal tamanis* kipiaj carros tein kikuij keman tateuiaj uan ininruedas kipiaj machetes tein ojkan tenej.* Uan hasta cananeos akin nemij Bet-Seán uan xolaltsitsin tein ompa pouij uan akin nemij tal tamanis Jezreel kipiaj nochi nejon”.
17 Yejua ika Josué kiniluij uejueyi kalyetonij Efraín uan Manasés, akin ichankauan José: “Semi namiakej uan semi nanchikaujkej. Amo sayoj namechmakaskej se cacho tal,
18 ta no namoaxka yeski nochi in talmej tein yetokej kampa tepeyoj. Maski koujtaj, nantachipauaskej uan ompa tamitiuj nochi tal tein namoaxka. Nankintalkuiliskej cananeos maski yejuan semi chikaujkej. Nankintaniskej maski kipiaj carros tein kikuij keman tateuiaj uan maski ininruedas kipiaj machetes tein ojkan tenej”.
Tajtolmelaualismej
^ Xikonita tetsitsin tein kitatamotayaj.
^ Nejin yetok kampa ualkisa tonaltsin.
^ Oso “ataujkopa”, “tauakalkopa”.
^ Oso “ataujkopa”, “tauakalkopa”.
^ Oso “ojpanat”.
^ Oso “ataujkopa”, “tauakalkopa”.
^ Oso “xikintenpeuakan”.
^ Oso “takomol”.
^ Oso “espadas”.
