Josué 2:1-24
2 Keman israelitas yetoyaj Sitim, Josué akin katka ikoneuj Nun kintitanik ome takamej maj tapijpiatij Canaán. Kiniluij: “Xiakan xitachiatij Canaán, uan no xitachiatij Jericó”. Nejon ome takamej yajkej uan ajsikej ichan Rahab uan ompa mokaujkej. Rahab monamakaya iniuan takamej.
2 Akin tekiuajtia Jericó kiluijkej: “Seki takamej israelitas ualajkej nejin youak para tapijpiaskej”.
3 Keman tekiuaj kikakik nejon, kintitanik seki takamej maj kiluitij Rahab: “Xikinkixti takamej akin mokaujtokej mochan, porin ualajkej tapijpiakoj Canaán”.
4 Sayoj ke Rahab kinuikak nejon ome takamej kampa ueliskia motatiskej.* Satepan kiniluij takamej akin tekiuaj kintitanik: “Kemaj, nechkalpanokoj seki takamej, sayoj ke amo nikmati kani kayomej katkaj.
5 Kisteujkej keman tapoyaujtoyaya, achto ke tatsakuaskiaj Jericó. Amo nikmati kani yajkej. Sayoj ke komo namoijsiuiliaj, nankinajsitiuij”.
6 (Maski tein melauj, yejua kintatijka* kalkuako* itampa seki linojxiuit tein ompa kiixtentoya).
7 Yejua ika, takamej akin tekiuaj kintitanka yajkej ueyiat Jordán. Yejuan kintemotoj tapijpianij kampa uelia se kimetspanauiaya ueyiat. Uan niman keman kiskej den ueyi xolal kitsakkej puerta.
8 Keman tapijpianij ayamo kochiaj, Rahab kinitato kalkuako* kampa motatijtoyaj.*
9 Uan kiniluij: “Nejua nikmati ke Jehová namechmakas nejin tal, uan tinochin semi tamechmouiliaj. Nochin akin nemij nikan tel mojkamikij.
10 Titekakilijkej ke satepan ke nankiskej de Egipto, Jehová kiuatsak mar Rojo para ueliskia nankipanauiskej. No tikakkej ke achto ke nankipanauiskiaj ueyiat Jordán,* nankinmiktijkej Sehón uan Og akin kinixyekanayaj amorreos.
11 Keman tikakkej nejon semi timoujkej, uan amo akin kineki* moteuis namouan porin namoDios Jehová taixyekana ne iluikak uan nikan taltikpak.
12 Uan axkan namechtataujtia ximotenkauakan itokaykopa Jehová ke nankinpaleuiskej* ichankauan nopaj, ijkon kemej nejua namechpaleuij.* Uan moneki nankichiuaskej teisa tein kinextis ke yekmelauj nantechpaleuiskej.
13 Xikinmakixtikan nopaj, nomaj, nokniuan uan nochin akin nemij ichan nopaj. Amo xitechmiktikan”.
14 Uan takamej israelitas kiluijkej: “¡Maj tejuan techmiktikan uan amo namejuan! Komo amo akin nankiluiaj tein tikchiuakoj, tamechpaleuiskej* uan tikchiuaskej tein timotenkaujkej keman Jehová techmakas nejin tal”.
15 Ichan Rahab mokuitoya iuan ueyi tepamit tein kiyoualouaya ueyi xolal uan yejua chanchiuaya tapani de nejon tepamit. Yejua ika itech iventana kipiloj se lazo uan ompa temokej tapijpianij.
16 No kiniluij: “Ximotatitij* eyi tonal kampa tepeyoj para maj amo namechajsikan. Keman mokepaskej akin namechtemotoj, uelisya nanyaskej kampa nanualeujkej”.
17 Takamej israelitas kiluijkej: “Tejuan tikchiuaskej tein timotenkaujkej sayoj komo tikchiua nejin:
18 keman tiejkoskejya nikan kampa nanemij, xikilpi* nejin lazo chichiltik itech nejin ventana kampa titemotij. Uan xikinsentili nikan mopaj, momaj, mokniuan uan nochin akin nemij ichan mopaj.
19 Uan komo aksa* kisa de mochan, amo totajtakolok komo kimiktiaj, ta yejua itajtakol. Sayoj ke tejuan totajtakol komo miki semej akin yetok mochan.
20 Sayoj ke komo tikiluia aksa keyej tiualajkej, amo tikchiuaskejok tein tikijtojkej”.
21 Rahab kiniluij: “Nikchiuas tein nankijtouaj”.
Satepan takamej israelitas yajkej. Uan Rahab kiilpij* lazo chichiltik itech iventana.
22 Yejuan yajkej kampa tepeyoj uan ompa mokaujkej eyi tonal hasta keman takamej akin kintemojtinemiaj mokepkej Jericó. Maski miakkan kintemojtinenkej, amo kinajsikej.
23 Satepan, tapijpianij akin motatitoj* kampa tepeyoj temokej uan kipanauijkej ueyiat Jordán. Yejuan kiitatoj Josué ikoneuj Nun uan kitapouijkej nochi tein kinpanok.
24 Tapijpianij kiluijkej Josué: “Jehová techmakakya nochi nejin tal. Nochin akin ompa nemij semi techmouiliaj”.
Tajtolmelaualismej
^ Oso “mocholtiskej”.
^ Oso “kincholtijka”.
^ Oso “kaltipan”, “kalpani”.
^ Oso “kaltipan”, “kalpani”.
^ Oso “mocholtijtoyaj”.
^ Nejin yetok kampa ualkisa tonaltsin.
^ Oso “amo akin moixeuia”. Itech hebreo, “amo akin kipia chikaualis para”.
^ Oso “nankintasojtaskej”.
^ Oso “namechtasojtak”.
^ Oso “tamechtasojtaskej”.
^ Oso “Ximocholtitij”.
^ Oso “xiktsiko”.
^ Oso “akin”, “akaj”.
^ Oso “kitsikoj”.
^ Oso “mocholtitoj”.
