Levítico 11:1-47
-
Tapialmej tein chipaujkej uan tein amo chipaujkej (1-47)
11 Uan Jehová kiniluij Moisés uan Aarón:
2 “Xikiniluikan israelitas: ‘Yejuan nejin tapialmej tein nemij talixko tein uelis nankinkuaskej.
3 Uelis nankikuaskej tein yeski tapial tein istimaxaltik, metstampaxeliujtok uan ojpa takuajkua.*
4 ”’Sayoj ke yejuan nejin tapialmej tein ojpa takuajkuaj oso istimaxaltikej tein amo uelis nankinkuaskej: camello, tein ojpa takuajkua sayoj ke amo istimaxaltik. Dios kiita ke amo chipauak.
5 Amo no uelis nankikuaskej damán,* porin ojpa takuajkua sayoj ke amo istimaxaltik. Dios kiita ke amo chipauak.
6 Amo no uelis nankikuaskej tochij, porin ojpa takuajkua sayoj ke amo istimaxaltik. Dios kiita ke amo chipauak.
7 Amo no xikuakan pitsot, porin istimaxaltik uan metstampaxeliujtok sayoj ke amo ojpa takuajkua. Dios kiita ke amo chipauak.
8 Amo xikinkuakan nejin tapialmej nion xikinkitskikan komo mikkej. Dios kinita ke amo chipaujkej uan namejuan no moneki ijkon nankinitaskej.
9 ”’Uelis nankinkuaskej nochin okuiltsitsin tein kipiaj kemej yeskia ajtapaltsitsin uan pantitikiltikej tein nemij itech mar oso ueyiat.
10 Sayoj ke nochin okuiltsitsin tein amo kipiaj ajtapaltsitsin nion pantitikiltikej, moneki namechtajyaltis. Uelis yeskij tein mosenkuitinemij itech at oso okseki okuilimej tein ompa nemij.
11 Moneki nankinitaskej kemej teisa tein tetajyaltij. Amo xikinkuakan nejin tapialmej, uan komo mikkej moneki namechtajyaltis.
12 Nochin okuiltsitsin tein nemij itech at uan amo kipiaj ajtapaltsitsin nion pantitikiltikej, moneki namechtajyaltis.
13 ”’Yejuan nejin totomej tein moneki nankinitaskej kemej teisa tein tetajyaltij uan amo nankinkuaskej: águila uan águila tein kinkitskia pescados, tsojpilot tein cafentik,
14 chichil kuixij uan nochi tataman tiltik kuixij,
15 nochi tataman cuervo,
16 avestruz, lechuza, gaviota, nochi tataman halcón,
17 tololoj* tein tsikitsin uan tein ueyi, tiltik totot tein kinkitskia pescados,
18 ueyi pato tein monotsa cisne, pelícano, tsojpilot,
19 cigüeña, nochi tataman garza, tototsin tein tatemoua kampa tapitsokan* uan tsinaka.
20 Moneki namechtajyaltis nochi tataman okuiltsitsin tein olochnemij, ajtapalejkej uan nejnemij ika naui ininmetsuan.
21 ”’De nochin okuiltsitsin tein olochnemij, ajtapalejkej uan nejnemij ika naui ininmetsuan, sayoj uelis nankinkuaskej tein kipiaj ome ininmetsuan tein ueueyakej para ajkotsikuiniskej.
22 Yejuan nejin okuiltsitsin tein uelis nankinkuaskej: tataman chapolimej tein patanij, tein ajkotsikuinij uan okseki taman chapolimej tein ueli se kinkua.
23 Moneki namechtajyaltis nochin okseki tataman okuiltsitsin tein olochnemij, ajtapalejkej uan kipiaj naui ininmetsuan.
24 Nejin okuiltsitsin uelis namechpitsotiliskej. Akin mokuiltis semej de nejin okuiltsitsin tein mikikya, amo chipauak yeski hasta keman tapoyauis.
25 Akin kiajokuis semej de nejon okuiltsitsin tein mikikya moneki kipakas itasal,* uan amo chipauak yeski hasta keman tapoyauis.
26 ”’Tapial tein istimaxaltik sayoj ke amo metstampaxeliujtok nion ojpa takuajkua, Dios kiita ke amo chipauak. Akin kikitskis semej de nejin tapialmej, amo chipauak yeski.
27 Tapialmej tein nejnemij ika naui ininmetsuan uan istiyejkej, Dios kinita ke amo chipaujkej. Akin kikitskis semej de nejon tapialmej tein mikikya, amo chipauak yeski hasta keman tapoyauis.
28 Akin kiajokuis semej de nejon tapialmej tein mikikya, moneki kipakas itasal, uan amo chipauak yeski hasta keman tapoyauis. Dios kinita ke amo chipaujkej uan namejuan no moneki ijkon nankinitaskej.
29 ”’De nochi tataman okuilimej tein olochnemij, yejuan nejin tein Dios kinita ke amo chipaujkej: kimichij tein nemi taltampa,* kimichij tein ajkotsikuini, nochi tataman okuilimej tein kinixmatij kemej lagartos,
30 geco, ueyi lagarto, salamandra tein nemi itech at, topej uan camaleón.
31 Nejin okuilimej tein olochnemij, Dios kinita ke amo chipaujkej. Akin kikitskis semej de nejin okuilimej tein mikikya, amo chipauak yeski hasta keman tapoyauis.
32 ”’Komo mikij uan uetsij itech teisa, nejon amo yeski chipauak, maski yeski tachijchiuj ika kouit, se tasal, se kuetax oso se cacho tasal tein teajuayotia. Komo uetsij itech teisa tein motelkui, moneki nankiakalakiskej uan amo chipauak yeski hasta keman tapoyauis. Satepan chipauak yeski.
33 Komo uetsij itech se sokikomit, moneki nankitapanaskej uan tein kipias nejon tapalkat amo chipauak yeski.
34 Tein yeski tapalol tein monelos iuan at tein kipias nejon komit, amo chipauak yeski. Uan tein yeski taman tein se tayi uan yetos itech nejon komit, amo no chipauak yeski.
35 Komo mikij uan uetsij itech tein yeski taman, nejon amo yeski chipauak. Maski uetsis kampa kichijchiuaj pantsin oso itech tikomit, moneki kitatapatsaskej. Amo chipaujkej uan amo uelisok nankinkuiskej.
36 Sayoj komo uetsij itech se ameyal* oso kampa kisentiliaj at, nejon at kisentokas chipauak. Sayoj ke akin kikitskis semej de nejon okuilimej tein mikikya amo yeski chipauak.
37 Komo uetsi itech seki xinach, nejon xinach kisentokas chipauak.
38 Sayoj ke komo nejon xinach kiapachojtokej uan ompa uetsiti se cacho de nejon tapial, in xinach amo yeski chipauak.
39 ”’Uan komo miki se tapial tein ueli se kikua, akin kikitskis nejon tapial amo chipauak yeski hasta keman tapoyauis.
40 Akin kikuas nejon tapial oso kiajchiuas moneki kipakas itasal, uan amo chipauak yeski hasta keman tapoyauis.
41 Nochi tataman okuiltsitsin tein olochnemij tetajyaltijkej. Amo xikinkuakan.
42 Amo xikuakan nion se okuilij tein moxoxolatsa, nion se tapial tein nejnemi ika naui imetsuan nion okuilimej tein olochnemij uan kipiaj miak ininmetsuan, porin tetajyaltijkej.
43 Amo xikuakan nion semej de nejon okuilimej tein olochnemij, para amo namopitsotiliskej uan nantetajyaltiskej.
44 Porin nejua namoDios Jehová, uan namejuan moneki nanxeliujtoskej para nejua uan nanyeskij nanchipaujkej, porin nejua senkis nichipauak. Yejua ika amo xikinkuakan okuilimej tein olochnemij talixko para amo namopitsotiliskej.
45 Porin nejua niJehová, akin namechkixtij de Egipto para nankimatiskej ke nejua niDios, uan namejuan moneki nanyeskij nanchipaujkej porin nejua senkis nichipauak.
46 ”’Yejua nejin tein moneki mochiuas iniuan tapialmej, totomej, okuilimej tein nemij itech at uan tein olochnemij talixko.
47 Ijkon nankimatiskej toni chipauak uan toni amo chipauak, uan katin tapial uelis nankikuaskej uan katin amo’”.
Tajtolmelaualismej
^ Nejin tapial kitoloua tein kikua, kikepa itenoj, kikuajkua uan oksepa kitoloua.
^ Nejin tapialtsin tamati kemej se ueyi kimichij sayoj ke amo kipia ikuitapil.
^ Oso “mojmot”.
^ Oso “abubilla”. Nejin totot tamati kemej chito.
^ Oso “itilmaj”.
^ Nejin tapialtsin tamati kemej tuza.
^ Oso “amel”.
