Levítico 15:1-33
-
Keman se takat oso se siuat kikisa teisa kampa moxixa (1-33)
15 Jehová no kiniluij Moisés uan Aarón nejin:
2 “Xikiniluikan israelitas: ‘Komo se takat kipia se kokolis* tein kichiua maj kisa teisa kemej temal kampa moxixa,* nejon kichiua maj Dios kiita ke amo chipauak.
3 Komo kisentoka kisa oso amo ueliok moxixa porin motsakuak, yejua amo chipauak.
4 ”’Cama kampa motekas uan tein yeski taman tein kikuis para motalis akin mokokoua, amo chipauak yeski.
5 Akin kimatokas* nejon cama, moneki kipakas itasal* uan maltis,* uan amo chipauak yeski hasta keman tapoyauis.
6 Akin motalis kampa motalij akin mokokoua, moneki kipakas itasal uan maltis, uan amo chipauak yeski hasta keman tapoyauis.
7 Akin mokuiltis takat akin mokokoua, moneki kipakas itasal uan maltis, uan amo chipauak yeski hasta keman tapoyauis.
8 Komo akin mokokoua kichijcha aksa,* akin kichijchakej moneki kipakas itasal uan maltis, uan amo chipauak yeski hasta keman tapoyauis.
9 Komo akin mokokoua motalia ipanko se tapial, ipejpech amo chipauak yeski.
10 Akin kimatokas tein yeski taman tein kikuik para motalis akin mokokoua, amo chipauak yeski hasta keman tapoyauis. Uan akin kimamas tein ika motalij akin mokokoua, moneki kipakas itasal uan maltis, uan amo chipauak yeski hasta keman tapoyauis.
11 Komo akin mokokoua amo momajtekijtok uan kikitskia aksa, akin kikitskiaj moneki kipakas itasal uan maltis, uan amo chipauak yeski hasta keman tapoyauis.
12 Komo akin mokokoua kimatoka se sokikomit, nejon komit moneki kitapanaskej, uan komo tachijchiuj ika kouit moneki kipajpakaskej.
13 ”’Keman amo teyi kisasok uan pajtisya takat, kipouas chikome tonal. Moneki kipakas itasal uan maltis ika at de se ameyal,* uan chipauakya yeski.
14 Itech chikueyitika tonal, moneki kiuikilis tiopixkat ome palomas oso ome palomajkonemej ikalakyan kaltsin kampa taueyichiuaj,* iixpan Jehová.
15 Tiopixkat kitemaktis totomej tein kiuikak takat. Se kitemaktis porin tajtakolej uan okse para kichichinouilis Dios. Tiopixkat kichiuas nejon para maj Jehová kiixpolo itajtakol akin mokokouaya.
16 ”’Uan komo kisa ixinachyo* se takat, moneki maltis uan amo chipauak yeski hasta keman tapoyauis.
17 Komo uetsi itech se tasal oso tein yeski taman tachijchiuj ika ipankuetaxyo se tapial, moneki kipakas uan amo chipauak yeski nejon hasta keman tapoyauis.
18 ”’Keman se takat moteka iuan se siuat uan kisa ixinachyo,* nochin omen moneki maltiskej uan amo chipaujkej yeskij hasta keman tapoyauis.
19 ”’Mejmetstika, keman se siuat estemoua, amo chipauak chikome tonal. Akin mokuiltis nejon siuat, amo chipauak yeski hasta keman tapoyauis.
20 Kampa motekas uan kampa motalis nejon siuat itech nejon chikome tonal, amo chipauak yeski.
21 Akin kimatokas* icama moneki kipakas itasal uan maltis, uan amo chipauak yeski hasta keman tapoyauis.
22 Akin kimatokas tein yeski taman tein kikuik para motalis nejon siuat, moneki kipakas itasal uan maltis, uan amo chipauak yeski hasta keman tapoyauis.
23 Akin kimatokas icama oso tein yeski taman tein kikuik para motalis, amo chipauak yeski hasta keman tapoyauis.
24 Uan komo se takat iuan moteka uan kikuiltia esti porin estemok, nejon takat amo chipauak yeski chikome tonal. Uan tein yeski cama kampa motekas nejon takat, amo no chipauak yeski.
25 ”’Komo se siuat estemoua tel miak tonalmej uan amo ijkuak monekia temos oso estemoua keman ajsi tonal sayoj ke tel uejkaua, amo chipauak yeski nochin tonalmej keman estemotos. Amo chipauak yeski ijkon kemej ipa panoua itech tonalmej keman estemoua mejmetstika.
26 Tein yeski cama kampa motekas uan tein yeski taman tein kikuis para motalis keman estemotos amo chipauak yeski. Amo chipauak yeski ijkon kemej ipa panoua itech tonalmej keman estemoua mejmetstika.
27 Akin kimatokas* nejon, amo chipauak yeski. Moneki kipakas itasal uan maltis, uan amo chipauak yeski hasta keman tapoyauis.
28 ”’Sayoj ke, keman amo estemosok moneki kipouas chikome tonal uan satepan chipauakya yeski.
29 Itech chikueyitika tonal moneki kikuis ome palomas oso ome palomajkonemej uan kiuikilis tiopixkat ikalakyan kaltsin.
30 Se paloma yeski porin tajtakolej uan okse para kichichinouilis Dios. Tiopixkat kitemaktis nejon para maj Jehová kiixpolo itajtakol siuat, porin kemej eskiska, amo chipauak katka.
31 ”’Ijkon namejuan moneki nankinpaleuiskej israelitas para maj chipaujkej. Komo yejuan amo chipaujkej, kaltsin kampa nechueyichiuaj amo no chipauak yeski uan yejua ika monekis mikiskej.
32 ”’Yejua nejin tein moneki mochiuas keman se takat kipias se kokolis* tein kichiuas maj kisa teisa kemej temal kampa moxixa,* keman kisas ixinachyo,*
33 keman se siuat estemoua mejmetstika, keman estemos tel miak tonalmej uan amo ijkuak moneki temos, uan keman se takat motekas iuan se siuat akin amo chipauak’”.
Tajtolmelaualismej
^ Oso “kokoxkayot”.
^ Oso “motapiasoua”.
^ Oso “kimachilis”.
^ Oso “itilmaj”.
^ Oso “mopakas”. Nejin mokuis itech nochi capítulo.
^ Oso “akin”, “akaj”.
^ Oso “amel”.
^ Xikonita ikaltsin Dios.
^ Oso “isemen”.
^ Oso “isemen”.
^ Oso “kimachilis”.
^ Oso “kimachilis”.
^ Oso “kokoxkayot”.
^ Oso “motapiasoua”.
^ Oso “isemen”.
