Levítico 17:1-16
17 Jehová no kiluij Moisés:
2 “Xikilui Aarón, ikoneuan uan nochin israelitas: ‘Yejua nejin tein Jehová tanauatij:
3 ”’“Maj nion se israelita kimikti se kuakouej, se ichkaueuet* tein yekin moskaltijtok oso se chivo kampa yetokej kaltsitsin* oso uejka de ompa.
4 Moneki kiuikilis Jehová in tapial uan kimaktilis ikalakyan kaltsin kampa kiueyichiuaj* Jehová para maj amo kitatsakuiltikan. Komo amo ijkon kichiua, moneki kimiktiskej porin kimiktij tapial okseko.
5 Nitanauatia nejin para maj israelitas amo kinmiktikanok inintapialuan kampa amo kaltaj, ta maj kinuikilikan tiopixkat ikalakyan kaltsin para kimaktiliskej Jehová. Moneki kimaktiliskej Jehová para iuan sentakuaskej.*
6 Uan tiopixkat kipijpisuis ininesyo tapialmej itech ialtar Jehová tein yetok ikalakyan kaltsin, uan kichichinos ininmantecayo tapialmej para maj popoka, uan Jehová semi kiajuiyakmatis.
7 Yejua ika maj amo teyi kinmaktilikanok amo kuali ejekamej* tein kinueyichiuaj.* Desde axkan nikixtalia nejin tanauatil tein moneki nankitakamatiskej namejuan uan namokoneuan akin yoltiaskej”’.
8 ”No moneki tikiniluis: ‘Komo se israelita oso se akin okseko kayot uan nemi namouan, kitemaktia se tapial para kichichinouiliskej Dios oso para okse taman,
9 uan amo kiuika ikalakyan kaltsin para ompa kimaktilis Jehová, moneki kimiktiskej.
10 ”’Komo se israelita oso se akin okseko kayot uan nemi namouan kikua esti, xikyekmatikan ke nikixtopeuas akin kikuas esti uan nikixpolos.
11 Porin nochi tein kipia esti yoltok, porin esti kichiua maj yolto uan nejua namechmakatok para xinechmaktilikan itech altar para maj nikixpolo namotajtakoluan. Kemej esti kichiua maj nochin yoltokan, esti tapaleuia maj namechtapojpolui.
12 Yejua ika nikiniluij israelitas: “Maj amo akin kikua esti, nion namejuan nion akin okseko kayomej uan nemij namouan”.
13 ”’Komo se israelita oso se akin okseko kayot kintemoti tapialmej uan kimiktia se koujtajtapial oso se totot tein ueli se kikua, moneki kitalpachos iesyo.
14 Porin esti kichiua maj nochin yoltokan, porin ininnemilis yetok itech ininesyo. Yejua ika, nikiniluij israelitas: “Amo xikuakan esti, porin esti kichiua maj nochin yoltokan. Akin kikuas moneki kimiktiskej”.
15 Komo se israelita oso se akin okseko kayot, kiajsi uan kikua se tapial miket oso se tein kikokototsak se tekuani, moneki kipakas itasal* uan maltis,* uan amo chipauak yeski hasta keman tapoyauis. Satepan chipauakya yeski.
16 Sayoj ke, komo amo kipaka itasal nion maltia, kitatsakuiltiskej’”.
Tajtolmelaualismej
^ Oso “borrego”.
^ Nejin kaltsitsin chijchiujtoyaj ika tasal (tilmaj).
^ Xikonita ikaltsin Dios.
^ Itech hebreo, “chivos”. Akin kinueyichiuayaj xa kinemiliayaj ke nejon amokuali ejekamej katkaj tsonpajpachtikej uan tamatiaj kemej chivos.
^ Itech hebreo, “tein iniuan auilnemij”.
^ Oso “itilmaj”.
^ Oso “mopakas”.
