Levítico 22:1-33
22 Jehová oksepa iuan tajtoj Moisés uan kiluij:
2 “Xikinilui Aarón uan ikoneuan maj kuali kiitakan keniuj kikuij tein israelitas nechxelouiliaj uan nechmaktiliaj. Ijkon amo kichiuaskej maj amo kuali noka tajtokan. Nejua niJehová.
3 Xikinilui: ‘Komo semej namokoneuan amo chipauak uan kikui tein israelitas kixelouiliaj uan kimaktiliaj Jehová, moneki kimiktiskej. Nejua niJehová.
4 Nion semej ikoneuan Aarón uelis kikuas tein Dios kixeloj hasta maj chipauakya. Amo chipauak yeski komo kipia pitsotik kokolis* tein monotsa lepra, se kokolis tein kichiua maj kisa teisa kemej temal kampa moxixa,* komo kikitskia se akin mopitsotilij por se miket, komo kisa ixinachyo,*
5 komo kikitskia semej okuiltsitsin tein olochnemij tein Dios kiita ke amo chipauak oso komo kikitskia se akin amo chipauak.
6 Akin kikitskis tein amo chipauak, yejua amo chipauak yeski hasta keman tapoyauis uan amo uelis kikuas tein Dios kixeloj hasta maj malti.*
7 Keman pankalakisya tonaltsin, chipauakya yeski, uan uelis kikuasya tein Dios kixeloj porin ipa yejua tein kikua.
8 Maj amo no kikua se tapial miket tein kiajsik oso tein se tekuani kikokototsak, porin nejon kichiuas maj amo chipauak. Nejua niJehová.
9 ”’Yejuan moneki kichiuaskej tein nikinnauatia. Komo amo kichiuaj yeski se tajtakol, uan mikiskej porin amo kikuikej kemej kinamiki tein nechxelouiliaj. Nejua niJehová, akin nikinxelojtok.
10 ”’Amo akin yeski* uelis kikuas tein Dios kixeloj, nion akin okseko kayot uan mokaujtok ichan tiopixkat nion se tetekitilijkej.
11 Sayoj ke komo se tiopixkat kikoua aksa,* yejua kemaj uelis kikuas tein kikua tiopixkat. Takeualmej akin yolij ichan no uelis kikuaskej.
12 Komo isiuapil se tiopixkat monamiktia iuan se akin amo tiopixkat, nejon siuapil amo uelis kikuas tein israelitas kixelouilijkej uan kimaktilijkej Dios.
13 Komo isiuapil se tiopixkat momikilia itakatsin oso itakauj kikaua, amo kinpia ikoneuan uan oksepa nemiti iuan itat, uelis kikuas tein itat kikua. Sayoj ke amo akin yeski* uelis kikuas.
14 ”’Komo aksa kikua tein Dios kixeloj uan nion kimatik, moneki kikepilis tiopixkat tein kikuaj uan kitemakas tepitsinok.*
15 Yejua ika tiopixkamej moneki kikuiskej kemej kinamiki tein israelitas kixelouiliaj Jehová uan kimaktiliaj.
16 Maj amo no kinkauakan maj kikuakan tein Dios kixeloj. Komo kikuaskiaj, motajtakolmakaskiaj uan kintatsakuiltiskiaj. Nejua niJehová, akin nikinxelojtok’”.
17 Jehová no kiluij Moisés:
18 “Xikinilui Aarón uan ikoneuan uan nochin israelitas: ‘Keman se takat israelita oso amo israelita uan nemi Israel kineki kichichinouilis Jehová se tapial, porin motenkauak teisa oso sayoj porin kineki kitayokolis,
19 moneki kitemaktis se kuakuejueuet, se ichkaueuet* tein yekin moskaltijtok oso se chivo. Nejin tapialmej moneki kuali yetoskej para maj Dios kiyolpakti.
20 Amo xikmaktilikan tapialmej tein amo kuajkualmej, porin amo namechpaleuis xikyolpaktikan Dios.
21 ”’Akin kimaktilis Jehová se tapial para iuan takuas* porin motenkauak teisa oso sayoj porin kineki kitayokolis, moneki yeski se kuakouej, se ichkat oso se chivo tein kuali yetos komo kineki kiyolpaktis Dios. Maj amo kipia nion teyi tein amo kuali.
22 Maj amo kimaktilikan Dios se tapial tein amo tachia, tein metspostektok, tein tatekil, tein kokoti, tein kipia sarna oso okse taman kokolis itech ipankuetaxyo. Amo xikuikilikan Jehová nion se tapial kemej nejin nion xikmaktilikan Jehová itech altar.
23 Komo sayoj nankinekij nankitayokoliskej, uelis nankitemakaskej se kuakouej oso se ichkat tein kipias se imets tein okachi ueyak oso okachi tokotstik. Sayoj ke komo nankitemakatij porin namotenkaujkej teisa, amo uelis ijkon nankitemakaskej.
24 Amo xikmaktilikan Jehová nion se tapial tein takokol ikestsalan, tein kitapitsinilijkej ikestsalan oso kicaparojkej. Amo xiktemaktikan nejon tapialmej kampa nanemij.
25 Uan komo se akin okseko kayot kiuika se tapial ijkon, amo xikuilikan para nankimaktiliskej namoDios, porin nejon tapialmej kokolisyojkej uan amo kuajkualmej. Amo namechpaleuis xikyolpaktikan Dios’”.
26 Jehová oksepa iuan tajtoj Moisés uan kiluij:
27 “Keman yolis se kuakouej, se ichkat oso se chivo moneki yetos iuan inan chikome tonal, sayoj ke itech chikueyitika tonal uelis kitemaktiskejya uan kichichinouiliskej Jehová.
28 Amo xikmiktikan itech sayoj se tonal se kuakouej uan ikoneuj oso se ichkat uan ikoneuj.
29 ”Komo nankimaktiliaj Jehová se tapial para nankitasojkamatiliskej, moneki nankimaktiliskej kemej kiyolpaktis.
30 Moneki nankikuaskej nejon tonal. Amo xikauakan nion teyi para mostika. Nejua niJehová.
31 ”Moneki nankichiuaskej tein namechnauatia. Nejua niJehová.
32 Amo xikchiuakan maj amo kuali noka tajtokan; nochin israelitas moneki kielnamikiskej ke sekis nichipauak. Nejua niJehová, akin namechxelojtok,
33 akin namechkixtij de Egipto para nankimatiskej ke nejua niDios. Nejua niJehová”.
Tajtolmelaualismej
^ Oso “kokoxkayot”.
^ Oso “motapiasoua”.
^ Oso “isemen”.
^ Oso “mopaka”.
^ Nejin kijtosneki se takat akin amo ichankauj Aarón.
^ Oso “akin”, “akaj”.
^ Nejin kijtosneki se takat akin amo ichankauj Aarón.
^ Oso “veinte por ciento”. Nejin kijtosneki ke komo tein kikuaj ipatiuj makuil platajtomin, moneki kitemakas se platajtominok.
^ Oso “borrego”.
