Apocalipsis 10:1-11
10 Nikitak okse chikauak ángel tein ualpantemouaya de ne iluikak uan takentiualaya ika* se mixti, uan kikuayoualouaya se arcoíris. Iixko katka kemej tonaltsin uan imetsuan katkaj kemej uejueyi kalikximej tein moitayaj kemej tit.*
2 Maaktoya se amatajkuiloltsin* tein kiixmelaujkaj. Pantaksak ika* iyekmets itech ueyiat uan ika iopochmets pantaksak itech tal.
3 Uan chikauak tsajtsik kemej ijkuak nanalka se tekuani. Uan keman tsajtsik, tajtojkej chikome tatikuinilot.
4 Keman nejon chikome tatikuinilot tajtojkej, nejua yaya nikijkuilotiya tein kijtojkej, sayoj ke nikakik ke aksa* ualtajtoj ne iluikak uan kijtouaya: “Xikeua* tein kijtojkej chikome tatikuinilot uan amo xikijkuilo”.
5 Ángel tein nikitak ke ijkatoya itech ueyiat uan itech tal, kiajokuik iyekmay ne iluikak
6 uan moyektenkauak itokaykopa akin nemi nochipaya uan amo keman miki, akin kichijchiuak iluikak uan tein ompa onkak, tal uan tein nikan onkak, uan ueyiat uan tein ompa onkak. Uan kijtoj: “Amo monekisok timochiaskej,
7 ta itech tonalmej keman chikometika ángel peuas kipitsas itrompeta, mochiuasya tein Dios amo kitematiltijtoya.* Yejua nejin kuali tanauatilmej* tein kinmatiltij tanauatianij* akin kitekitiliaj”.
8 Uan nikakik ke aksa ualtajtouaya ne iluikak uan oksepa nechnojnotsaya. Nechiluij: “Xikuiti amatajkuilol* tein ixtapotok tein maaktok ángel tein ijkatok itech ueyiat uan itech tal”.
9 Nejua nikajsito ángel uan nikiluij maj nechmaka amatajkuiloltsin. Uan yejua nechnankilij: “Xikui uan xikua. Tikyekos tsopek kemej nekti, sayoj ke mitspoxchichilis”.
10 Yejua ika nikuik amatajkuiloltsin tein maaktoya ángel uan nikuaj. Nikyekoj ke katka tsopek kemej nekti, sayoj ke keman niktoloj nipoxchichiyak.
11 Uan nechiluijkej: “Moneki oksepa tikteixmatiltis tein kinpanos xolalmej, altepemej, akin tajtouaj tataman tajtolmej uan miakej tekiuanij”.
Tajtolmelaualismej
^ Oso “kiyoualojtiualaya”.
^ Oso “tekol”.
^ Itech griego, “amatatetekuinoltsin”. Xikonita amatatetekuinol.
^ Oso “Kitalij”.
^ Oso “akin”, “akaj”.
^ Oso “Xikyektali”.
^ Xikonita tein Dios amo kitematiltijtoya.
^ Oso “tajtolmej”.
^ Xikonita tanauatijkej.
^ Itech griego, “amatatetekuinol”.
