Apocalipsis 4:1-11
4 Satepan nikitak ke tatapotoya* ne iluikak, uan akin achto nechnojnotsak motenkakia kemej se trompeta. Nechiluij: “Xipankisa nikan, nimitsnextiliti tein moneki mochiuas”.
2 Satepan, ichikaualis Dios peuak notech tekiti. Uan nikitak se ueyi silla ne iluikak, uan aksa* ompa tokotsyetoya.
3 Akin ompa tokotsyetoya mimilinia kemej tetsin tein monotsa jaspe uan kemej se chichiltik tetsin tein monotsa sardio, uan ueyi silla youaliujtoya ika se arcoíris tein tamatia kemej se xoxoktik tetsin tein monotsa esmeralda.
4 Ueyi silla kiyoualojtoyaj 24 uejueyi sillas, uan itech nejon uejueyi sillas tojtokotsyetoyaj 24 tayekananij. Takentoyaj ika istak tasal uan ininkuako kipiayaj se corona tachijchiuj ika oro.
5 Itech ueyi silla ualtapepetania, mokakia ke tajtouayaj uan tatitikuinia; uan iixpan ueyi silla xotatoyaj chikome uejueyi candilmej, tein kiixnextiaj chikome chikaualismej tein ualeuaj imako Dios.
6 Iixpan ueyi silla moitaya teisa kemej se ueyiat tein tamatia kemej teskat.
Tatajkoyampa, kampa yetoya ueyi silla uan inajnakastan, yetoyaj naui ángeles* tein kipiayaj tel miak ininixtololouan ininixpampa uan ininikampa.
7 Yekinika ángel tamatia kemej se tekuani, ojpatika ángel tamatia kemej se kuakouej, expatika ángel iixko tamatia kemej iixko se takat uan naujpatika ángel tamatia kemej se ueyi totot* tein patantok.
8 Sejse ángel kipiaya chikuasen iajtapaluan tein kipiayaj miak ixtololomej kalampakopa uan taijtikkopa. Uan youalintonal kijtojtokej: “Yektik, yektik, yektik Jehová* Dios, akin kipia nochi chikaualis, akin axkan nemi, akin achto ipa nemia uan akin ualas”.
9 Nochipa keman ángeles kiueyitaliaj, kitakachiuaj* uan kitasojkamatiliaj akin tokotsyetok itech ueyi silla, akin nemi nochipaya uan amo keman miki,
10 nochin 24 tayekananij motankuaketsaj iixpan akin tokotsyetok itech ueyi silla uan kiueyichiuaj akin nemi nochipaya uan amo keman miki. Kitaliaj inincorona iixpan ueyi silla, uan kijtouaj:
11 “ToDios Jehová* akin semi tichikauak, tejua mitsnamiki maj mitsueyitalikan uan maj mitsueyichiuakan, porin tejua tikchijchiuak nochi, uan nochi onkak porin ijkon tiknekik”.
Tajtolmelaualismej
^ Oso “tapotoya se puerta”.
^ Oso “akin”, “akaj”.
^ Oso “querubines”. Querubines seki ángeles tein kipiaj ueyi tanauatil.
^ Oso “águila”.
^ Oso “kipoujkaitaj”.
