Efesios 1:1-23
1 Nejua Pablo, niitatitanil Cristo Jesús porin Dios ijkon kinekik, namechtitanilia nejin amatajkuilol namejuan akin nanyetokej Éfeso, namejuan akin Dios namechxeloj* uan amo nankikauaj Cristo Jesús.
2 Maj toTajtsin Dios uan toTekotsin Jesucristo namechmakakan tatiochiualis tein amo technamiki uan maj namechpaleuikan kuali ximouikakan iuan Dios.
3 Maj moueyitali iDios uan iTajtsin toTekotsin Jesucristo porin ne iluikak techmakani nochi tataman tatiochiualismej ika ichikaualis porin tipouij iuan Cristo.
4 Dios techijitak* achto ke yoliskiaj akin nemij nikan taltikpak para iuan tipouiskej,* para maj tichipaujkej iixpan, maj amo tikpiakan tein amo kuali uan maj titetasojtakan.
5 Achto techijitak para techselis kemej ikoneuan itechkopa Jesucristo, ijkon kemej kiyolpaktia uan kineki,
6 para maj tikueyitalikan Dios porin itechkopa itasojKonetsin semi technextilij iueyi tatiochiualis tein amo technamiki.
7 Yejua taxtauak ika iesyo para techmakixtis, kemaj, para Dios techtapojpoluilis totajtakoluan porin technextilia itatiochiualis tein amo technamiki.
8 Dios semi technextilij nejin tatiochiualis tein amo technamiki uan no techpaleuij maj semi titamattokan uan maj titalnamiktokan.*
9 Kichiuak nejon keman techixmatiltij tein kineki, tein amo kitematiltijtoya.* Ijkon kemej kiuelitak, yejua kiixejekoj
10 kiixtalis keniuj mochiuas miak taman keman ajsis tonalmej tein ixyetokej, para kisentilis nochi imako Cristo, tein onkak ne iluikak uan tein onkak nikan taltikpak. Kemaj, maj nochi yeto imako Cristo.
11 Tejuan iuan tipouij uan Dios techixtalij maj iuan tikselikan tein motenkauak techmakas. Yejua achto techijitak* ijkon kemej kiixtalij, porin kichiua nochi ijkon kemej kiixtalia uan kemej kineki,
12 para maj totechkopa tejuan akin yekinika titakuaujtamatkej iuan Cristo, kiueyitalikan Dios porin yejua semi ueyi.
13 Sayoj ke namejuan no iuan nantakuaujtamatkej satepan ke nankikakkej tamachtilis tein melauak. Nejin yejua kuali tanauatilmej* tein kijtoua ke Dios namechmakixtijtok. Satepan ke namejuan nantaneltokakej, Dios itechkopa Cristo namechneskayotij ika ichikaualis tein motenkauak namechmakas,
14 tein kiyeknextia* ke techmakas nochi tein motenkauak. Ijkon tein iaxka amo yetosok temako porin Dios taxtauak, uan nejon kichiuas maj semi kiueyitalikan.
15 Yejua ika, nejua no desde ke nikmatik ke namejuan nantakuaujtamatij iuan toTekotsin Jesús uan ke nankintasojtaj nochin akin Dios moinxelouilij,*
16 niktasojkamatilijtok Dios porin ijkon nankichiuaj. Niksentoka namechelnamiki keman nikchiua netataujtil
17 para maj iDios toTekotsin Jesucristo, toueyi Tajtsin, namechpaleui xitamattokan uan xikajsikamatikan tein yejua kitematiltia, uan ijkon kuali xikixmatikan.
18 Dios kemej yeskia kitapoj namoyolo para xikitakan uan xikixmatikan tein peuak nankichiaj keman Dios namechnotsak, uan para xikixmatikan uejueyi tatiochiualismej tein motenkauak kinmakas akin moinxelouilij*
19 uan xikixmatikan iueyi chikaualis tein technextilia akin titaneltokaj. Iueyi chikaualis moitak
20 keman kichiuak maj Cristo oksepa nemi* uan kitalij iyekmakopa ne iluikak,
21 okachi ajko ke nochi tataman taixyekanalis, tanauatil, chikaualis, nochi tataman tekiuanij uan akin yeski akin ueyichiujkej, amo sayoj itech nejin tonalmej,* ta no tein onkas satepan.
22 Dios no kitalij nochi imetstampa Cristo uan kiixtalij maj kiixyekana nochi* itech nechikol.
23 Nechikol yejua inakayo Cristo, tein yejua kipexontia,* uan kichiua maj nochi ajsito uan maj amo teyi poliui.
Tajtolmelaualismej
^ Oso “nanchipaujkej iixpan Dios”.
^ Oso “techixpejpenak”.
^ Nejin kijtosneki iuan Cristo.
^ Oso “kuali titaixejekokan”.
^ Xikonita tein Dios amo kitematiltijtoya.
^ Oso “techixpejpenak”.
^ Oso “tajtolmej”.
^ Oso “uan yejua yekinika taxtauil tein kinextia”.
^ Oso “chipaujkej iixpan Dios”.
^ Oso “chipaujkej iixpan”.
^ Itech griego, “kiajokuik Cristo”.
^ Xikonita tonalmej; tein mochiujtok.
^ Oso “kemej tsontekon”.
^ Oso “kitemitia”.
