Efesios 4:1-32
4 Nejua Pablo akin nitsaktok porin niktojtoka toTekotsin, namechtataujtia xinemikan ijkon kemej kinnamiki nemiskej akin Dios kinnotsak:
2 nochipa xiyolyemankej, xiyolnejmachmej uan amo xiyolijsiuikan; ximoxikokan se iuan okse porin namotasojtaj.
3 Dios namechsentilij ika ichikaualis. Yejua ika semi ximochikauakan kuali namouikaskej para amo nanxexeliujtoskej.
4 Onkak sayoj se nechikol uan ichikaualis Dios sayoj se. No onkak sayoj se taman tein peuak tikchiaj keman Dios technotsak.
5 Onkak sayoj se toTekotsin, sayoj se tamachtilis tein tinochin tikneltokaj uan sayoj se taman kemej timoauiaj.
6 Tinochin sayoj se toTajtsin Dios, akin kintamiixyekantok nochin. Yejua kikui nochi para kichiuas miak taman uan ichikaualis tekiti itech nochi.
7 Tisejsemej tikselianij itatiochiualis Dios tein amo technamiki, uan yejua Cristo akin techmajmakak nejin tatiochiualis.
8 Porin Tajkuilolamatsin kijtoua: “Keman yejua pankisak, kinkixtij akin tsaktoyaj uan kintemakateuj kemej tatiochiualismej”.
9 Sayoj ke ¿toni kijtosneki tajtol “pankisak”? Ke achto, yejua ualpantemoka nikan taltikpak.
10 Akin ualpantemoka, no yejua akin pankisak okachi uejkapan ke iluikak para maj itechkopa nochi motamichiua.
11 Uan kintemakak sekin kemej tatitanilmej, sekin kemej tanauatianij,* sekin kemej akin kiteixmatiltiaj kuali tanauatilmej,* sekin akin kinyekpiaj tokniuan* uan kemej tamachtianij.
12 Kintemakak para kinpaleuiskej maj moyektalikan* akin Dios moinxelouilij,* para kintekitiliskej oksekin uan para kichiuaskej maj moskalti inakayo Cristo
13 hasta maj tinochin tisenyetokan itech nochi tein tikneltokaj uan maj kuali tikixmatikan iKoneuj Dios, hasta maj timoskaltikan kemej se akin ueyiya uan titamatikan kemej Cristo itech nochi.
14 Yejua ika, maj amo tipiltamatikanok, porin akin kineltoka tein tamachtiaj akin kimatij keniuj tekajkayauaskej, yeskij kemej se barco tein ejekat uan at kiuiuika nikan uan nepa.
15 Sayoj ke tejuan, moneki tikijtoskej tein melauak uan titetasojtaskej, uan itech nochi maj tiknextikan ke okachi titamattiouij* kemej Cristo, akin techixyekana.*
16 Itechkopa Cristo, nochi tein moajsi itech inakayo kuali senyetokej uan mosenpaleuiaj. Keman sejse kiyekchiua tekit tein kipia, tapaleuia maj nochi kuali moskalti uan maj motasojtakan se iuan okse.
17 Yejua ika namechiluia uan namechtataujtia itokaykopa toTekotsin, amo xiksentokakan xinemikan kemej akin amo taneltokaj, porin amo tapaleuia tein kinemiliaj.
18 Inintanemilil kemej yeskia moajsi kampa tayouayan uan amo kikauaj maj Dios kichiua maj nemikan porin amo kinekij kiixmatiskej uan porin yoltakuaujkej.
19 Kemej senkis amo teyi ika mopinaujmatijok, motemakaj kichiuaskej tein tetajyaltia uan amo ixpinauaj* uan kichiujtinemij nochi taman tein pitsotik uan amo keman ixuij.
20 Sayoj ke namejuan namomachtijkejya uan nankimatij ke Cristo amo ijkon kichiuak.
21 Jesús tamachtij tein melauak, uan komo nankikakkej uan namechmachtij, kuali nankiixmatij nochi nejin.
22 Namejuan namechmachtijkej ke moneki nankipataskej kemej achto nankatkaj, uan amo nankichiuaskejok tein achto nankichiuayaj. Porin kemej achto nankatkaj okachi moijtakojtiuj uan namechixkajkayauaya tein amo kuali tein achto nankinejnekiaj.
23 Moneki nankisentokaskej nankipatatoskej kemej nantanemiliaj*
24 uan moneki nanpeuaskej nanemiskej* ijkon kemej Dios kineki. Uan ijkon nankichiuaskej tein yekmelauj kuali yetok uan nankitakamatiskej Dios ika nochi namoyolo.
25 Yejua ika, axkan ke amo nantakajkayauajok nion tepitsin, ximoiluikan tein melauak se iuan okse, porin tinochin tisenpouij.
26 Keman nankualaniskej, amo xitajtakokan; amo xikualantokan nochin tonal.*
27 Nion tepitsin xiktakauilikan Amokuali.
28 Akin tachteki maj amo tachtekiok, ta maj chikauak tekiti uan maj kichiua se kuali tekit para kipias tein kimakas akin kipolos.
29 Amo xikijtokan tajtolmej tein pitsotikej,* ta nochi tein nankijtoskej maj kinyolchikaua oksekin ijkon kemej monekis uan maj kinpaleui akin namechkakij.
30 Uan amo no xiktayokoltijtokan Dios porin nankiixnamikij ichikaualis* tein ika namechneskayotij para namechmakixtis keman ejkos tonal porin namoka taxtauak.
31 Nion tepitsin xiyolkualantinemikan nion xitetauelitakan, nion xitauelmiktinemikan, nion xitetsatsajtsilikan, nion xikijtokan tein teyolkokos,* uan amo no xikchiuakanok nion tepitsin tein amo kuali.
32 Okachi kuali, xikualtakamej se iuan okse, ximoiknelikan uan ximotapojpoluikan ika nochi namoyolo, ijkon kemej Dios namechtapojpoluij ika nochi iyolo itechkopa Cristo.
Tajtolmelaualismej
^ Xikonita tanauatijkej.
^ Oso “tajtolmej”.
^ Itech griego, “ichkatajpianij”. Nejin kijtosneki akin kinyekpia tokniuan kemej se akin kinyekpia iichkauan (iborregos).
^ Oso “para kinmachtis”.
^ Oso “chipaujkej iixpan Dios”.
^ Oso “itech nochi maj timoskaltikan”.
^ Oso “totsontekon”.
^ Tajtol griego, asélgueia. Xikonita akin kichiuaj tein tetajyaltia.
^ Oso “chikaualis tein kitopeua namotanemilil”.
^ Oso “uan ximoyankuilikan ijkon kemej namotaliliskiaj se yankuik tasal”.
^ Oso “hasta keman pankalakis tonaltsin”.
^ Oso “tein teyolkokouaj”. Itech griego, “palaktikej”.
^ Itech griego, “Amo xiktayokoltijtokan ichikaualis Dios”.
^ Oso “nion xiteuijuikaltikan (xitatejtelchiuakan)”.
