Hebreos 7:1-28
7 Melquisedec tekiuajtia Salem uan tekitia kemej tiopixkat iixpan Dios akin Okachi Ueyichiujkej. Yejua kinamikito Abrahán keman mokepak satepan ke kinmijmiktij tekiuanij; yejua kitiochiuak Abrahán
2 uan Abrahán kimakak* tepitsin* de nochi tein kitanito. Yekinika, itokay Melquisedec kijtosneki “tekiuaj akin yolmelauak”; yejua no tekiuajtia Salem, tein kijtosneki, “tekiuaj akin semi tetatiochiuia”.
3 Amo kanaj ijkuiliujtok akoni katka ipopaj, imomaj, iuejkaujtatuan nion kemanian yolik nion kemanian momikilij, sayoj ke kemej kichiujkej maj tamati kemej iKoneuj Dios, kisentoka tekiti kemej tiopixkat nochipaya.
4 Xikitakan keniuj katka semi ueyichiujkej nejin takat. Yejua ika touejkaujtat Abrahán kimakak tepitsin* de nochi tein kitanito, tein okachi kuali katka.
5 ITanauatil Moisés kijtoua ke ikoneuan Leví akin kinixtaliaj kemej tiopixkamej, moneki kintajtaniskej diezmo ininikniuan, maski yejuan no ikoneuan Abrahán.
6 Sayoj ke Melquisedec, akin amo pouia iniuan ichankauan Leví, kikuik tein Abrahán kimakak uan no kitiochiuak Abrahán, akin Dios motenkauak ke kitatiochiuiskia.
7 Uan akin tetiochiua okachi ueyichiujkej ke akin kitiochiuaj, uan amo akin uelis kijtos ke amo ijkon.
8 Uan no, akin kinmakaj diezmo uelij momikiliaj, sayoj ke okse takat akin tamati kemej Melquisedec, Tajkuilolamatsin kijtoua ke yoltok.
9 Uan ueliskia tikijtoskej ke hasta Leví, akin kimakaj diezmo, kitemakakya diezmo itechkopa Abrahán,
10 porin Leví ayamo yolia kemej ikoneuj iuejkaujtat Abrahán keman Melquisedec kinamikito.
11 Itech iTanauatil Moisés tein kinmakakej israelitas moixtalij maj tiopixkamej ichankauan Leví. Komo tekit tein kichiuayaj nejon tiopixkamej tapaleuiskia maj amo se tajtakolejok, ¿monekiskiaok okse tiopixkat kemej Melquisedec? ¿Amo tapaleuiskia maj sayoj yeto se tiopixkat kemej Aarón?
12 Porin kemej tein kichiuayaj tiopixkamej mopatatokya, no moneki mopatas iTanauatil Moisés.
13 Porin takat akin ika titajtojtokej* pouik iniuan ichankauan okse, uan nion se akin ompa poui tekitini itech altar.
14 Uan tikyekmatij ke toTekotsin pouia iniuan ichankauan Judá, uan Moisés amo kijtoj ke ichankauan Judá yeskiaj tiopixkamej.
15 Uan okachiok moyekita keman nesi okse tiopixkat kemej Melquisedec.
16 Yejua tekiti kemej tiopixkat, amo porin poui iniuan ininchankauan tiopixkamej ijkon kemej kijtoua iTanauatil Moisés, ta porin kipia chikaualis tein kichiua maj yolto uan maj amo ueli ixpoliui.
17 Porin itech se tajkuilol kijtoua: “Tejua titiopixkat kemej Melquisedec, uan ijkon titekitis nochipaya”.
18 Yejua ika, tanauatil tein achto techmakakej amo kipiaok ipatiuj porin amo tapaleuiaok uan amo kualtia.
19 Porin iTanauatil Moisés amo motemakak para kitamiixpolos tajtakol, sayoj ke Dios kichiuak maj tikchiakan tein okachi kuali, uan ika nejon ueli timotokiaj iuan.
20 Uan no, Dios moyektenkauak keman kitalij Jesús kemej tiopixkat,
21 (porin Dios amo teyi moyektenkauani keman seki takamej mochiuanij tiopixkamej, sayoj ke keman nejin takat mochiuak tiopixkat, Dios moyektenkauak keman kijtoj: “Nejua Jehová* nimoyektenkaua uan amo nikpatas tein niknemilia: ‘Tejua nochipa tiyeski titiopixkat’”),
22 yejua ika, Dios kitemakak Jesús kemej se taman tein ika kinextiskia ke kichiuaskia okse taman tein okachi kuali ijkon kemej motenkauak.
23 Uan no, kemej tiopixkamej momikiliayaj amo ueliaj kisentokayaj ika nejon tekit, yejua ika monekia maj miakej tiopixkamej moixpapatatiakan.
24 Sayoj ke, kemej yejua nemi nochipaya, amo moneki maj kiixpatakan.
25 Yejua ika, Jesús no kimati keniuj senkis kinmakixtis akin itechkopa motokiaj iuan Dios, porin nochipa yoltok uan kintajtouia.
26 Porin moneki tikpiaskej se tayekankatiopixkat kemej yejua: akin amo tekaua, akin amo kichiua tein amo kuali, akin yolchipauak, akin amo tajtakolej uan moajsi okachi ajko ke iluikak.
27 Yejua amo kemej okseki tayekankatiopixkamej, porin amo moneki mojmostaj kimaktilis Dios tein kipaleuis maj kitapojpoluilikan itajtakoluan uan no inintajtakoluan oksekin, porin yejua motemaktij sayoj sepa uan nejon tapaleuia nochipaya.
28 Porin akin mochiuaj tayekankatiopixkamej ijkon kemej kijtoua iTanauatil Moisés, tajtakolejkej, sayoj ke satepan ke Dios techmakak nejon Tanauatil, moyektenkauak ke kiixtaliskia iKoneuj kemej tayekankatiopixkat, akin ajsitok kitamichiuak nochi tein Dios kineki maj mochiua uan ijkon yeski nochipaya.
