Hechos 11:1-30
11 Uan tatitanilmej uan tokniuan akin yetoyaj Judea kimatkej ke akin amo katkaj judíos no kineltokayajya itajtol Dios.
2 Yejua ika, keman Pedro pankisak Jerusalén, peujkej iuan motajtolteuiaj akin kinekiaj maj motekikan* takamej akin amo judíos.
3 Kiluiayaj: “Tikalakik ininchan takamej akin amo kintekinij uan iniuan titamajseuak”.
4 Uan Pedro peuak kinmelauilia nochi tein panok. Kiniluij:
5 “Nejua nikchiujtoya netataujtil itech ueyi xolal Jope, uan sepasan nitajtachiak. Nikitak se taman tein tamatia kemej se ueyi linojtasal tein naujkan ilpitiualaya* uan ualpantemouaya, uan motsakuiliko kampa nejua nietoya.
6 Nikyekitak uan itech nejon ueyi tasal nikinitak tapialmej tein kipiaj naui ininmetsuan, koujtajtapialmej, tapialmej tein moxoxolatsaj uan totomej.
7 No nikakik ke nechiluijkej: ‘¡Ximoketsa Pedro, xitamikti uan xitamajseua!’.
8 Sayoj ke nejua niknankilij: ‘Amo noTekotsin, amo ueli nikchiua nejon. Amo keman nimotenakiani teisa tein amo chipauak oso tein pitsotik’.
9 Uan akin ualtajtoj ne iluikak oksepa nechiluij: ‘Amo xikijtook ke pitsotik tein Dios kichipauakya’.
10 Nejin expa mochiuak, uan nochi oksepa kiuikakej ne iluikak.
11 Nejon hora, eyi takamej akin ualeuayaj Cesarea akin kintitankaj maj nechtemotij, ajsikej kampa timokaujtoyaj.
12 Dios ika ichikaualis nechiluij maj iniuan niouj uan maj amo niknenemilijto. No nouan yajkej nejin chikuasen tokniuan, uan tikalakkej ichan nejon takat.
13 ”Yejua techtapouij ke kiitaka se ángel ichan uan kiluijka: ‘Xikintitani seki takamej Jope maj kikuitij Simón, akin moixmati kemej Pedro,
14 uan yejua mitsiluis keniuj timomakixtis tejua uan akin nemij mochan’.
15 Sayoj ke keman nejua peuak nitajtoua, Dios kinmakak ichikaualis, ijkon kemej tejuan yekinika techmakak.
16 Ijkuak, nikelnamikik tein toTekotsin techiluiaya: ‘Juan teauij ika at, sayoj ke namejuan namechauiskej ika ichikaualis Dios’.
17 Yejua ika, komo Dios kintayokolijtoya tein techtayokolij tejuan, akin titaneltokakej itech toTekotsin Jesucristo, ¿toni nichiujkej nejua para nikixnamikis Dios?”.*
18 Keman kikakkej nochi nejin, yejuan amo teyi kijtojkejok uan kiueyitalijkej Dios. Kijtojkej: “¡Takaj Dios no kineki maj akin amo judíos moyolpatakan para maj nemikan!”.
19 Satepan ke kimiktijkej Esteban, no peujkej kintajyouiltiaj okseki tokniuan. Yejua ika akin momoyaujkaj* ajsikej hasta Fenicia, Chipre uan Antioquía. Uan sayoj judíos kinmatiltiayaj itajtol Dios.
20 Sayoj ke, iniuan no moajsiaj seki takamej akin kayomej Chipre uan Cirene akin yajkej Antioquía uan peujkej kinnojnotsaj akin tajtouayaj griego, uan kinmatiltijkej kuali tanauatilmej* tein ika tajtoua toTekotsin Jesús.
21 Tein melauj, Jehová* iniuan yetoya uan tel miakej peujkej taneltokaj uan mochiujkej imomachtijkauan toTekotsin.
22 Nejin kimatkej tokniuan ompa Jerusalén, uan yejuan kititankej Bernabé maj youi Antioquía.
23 Keman yejua ajsik uan kiitak keniuj Dios semi kintatiochiuij, semi yolpakik uan kinyolchikauak nochin maj kisentokakan kitakamatikan toTekotsin ika nochi ininyolo,
24 porin Bernabé katka se takat yolkuali akin kipiaya ichikaualis Dios uan semi takuaujtamatia. Uan tel miakej peuak taneltokaj itech toTekotsin.
25 Uan yejua yajki Tarso kitemoto Saulo hasta ke kiajsik.
26 Keman kiajsik, kiuikak Antioquía. Uan se xiuit mosentilijtoyaj iniuan tokniuan uan kinmachtijkej tel miakej. Ompa Antioquía, imomachtijkauan Jesús peujkej kinixmatij kemej akin kichiuaj kemej Cristo porin Dios ijkon kinekik.
27 Nejon tonalmej, seki tanauatianij* kiskej Jerusalén uan temokej Antioquía.
28 Semej, akin monotsaya Ágabo, ichikaualis Dios kichiuak maj kijto ke amo uejkaua amo onkaskia toni kikuaskej itech nochi taltikpak, uan nejon mochiuak keman Claudio tekiuajtitoya.
29 Yejua ika imomachtijkauan Jesús motenkaujkej kisentiliskej miak taman ijkon kemej ueliskiaj uan kintitaniliskej tokniuan akin nemiaj Judea.
30 Uan ijkon kichiujkej. Kiniluijkej Bernabé uan Saulo maj kinuikilikan tayekananij nochi nejon.
Tajtolmelaualismej
^ Oso “maj mochiuilikan circuncisión”. Xikonita circuncisión.
^ Oso “tsikaujtiualaya”.
^ Oso “nitatsajtsakuilis itech iojtsin Dios”.
^ Oso “moxinijkaj”.
^ Oso “tajtolmej”.
^ Xikonita tanauatijkej.
