Hechos 17:1-34
17 Uan panokej Anfípolis uan Apolonia uan ajsikej Tesalónica, kampa yetoya se kali kampa taueyichiuaj judíos.
2 Uan kemej ipa kichiuaya, Pablo kalakik uan eyi semanas itech tonal sábado keman moseuiaj kinmachtij uan kinpaleuij maj kiajsikamatikan itajtol Dios.
3 Kinmelauiliaya uan kinnextiliaya ika Tajkuilolamatsin ke monekia maj Cristo tajyouiani uan maj oksepa nemi.* Kiniluiaya: “Jesús yejua Cristo akin ika namechnojnotstok”.
4 Yejua ika sekin peujkej taneltokaj uan mosentilijkej iniuan Pablo uan Silas. No ijkon kichiujkej tel miakej griegos akin kiueyichiuayaj Dios, uan no miakej siuamej akin ueyichiuanimej.
5 Sayoj ke judíos, akin semi kualantoyaj, kinsentilijkej seki takamej akin amo yolkualmej akin tatsiujkanentinemiaj itech plaza uan peujkej takuejmolchiuaj itech ueyi xolal. Uan chikaujkakalakitoj ichan Jasón kintemojtiayaj Pablo uan Silas para kintemaktiskej iniuan akin ompa mosentilijkaj.
6 Kemej amo kinajsikej, kintitilatstiajkej Jasón uan seki tokniuan ininixpan tekiuanij itech ueyi xolal, uan chikauak kijtouayaj: “Takamej akin takuejmolchiujtokej itech nochi taltikpak no yetokej nikan,
7 uan Jasón kinpixtok ichan. Nochin nejin takamej kiixnamikij itanauatiluan Tekiuaj* uan kijtojtinemij ke yetok okse tekiuaj: Jesús”.
8 Keman akin ompa yetoyaj uan tekiuanij itech ueyi xolal kikakkej nejin, momoujtijkej,
9 yejua ika kintajtanijkej Jasón uan oksekin maj taxtauakan, uan kinkaujkej maj yakan.
10 Nejon youak, tokniuan kintitankej Pablo uan Silas hasta Berea. Keman ajsikej, yajkej kampa taueyichiuaj judíos.
11 Sayoj ke akin nemiaj Berea okachi kinekiaj momachtiskej ke akin nemiaj Tesalónica, porin kikakkej itajtol Dios ika nochi ininyolo, uan mojmostaj kiyektemouayaj itech Tajkuilolamatsin ox melauak katka tein kiniluijkaj.
12 Yejua ika miakej peujkej taneltokaj. Uan no miakej siuamej griegas akin semi kuali kinitayaj uan seki takamej no taneltokakej.
13 Sayoj ke keman judíos akin nemiaj Tesalónica kimatkej ke Pablo no kiteixmatiltijtoya itajtol Dios ompa Berea, yajkej ompa para kintakualantaliliskej uan kintakuejmolchiuiliskej.
14 Nimantsin, tokniuan kititankej Pablo maj youi ueyiatenojkopa, sayoj ke Silas uan Timoteo ompa mokaujkej.
15 Akin iuan yayaj Pablo, kiuikakej hasta Atenas. Keman mokepkej kinnauatijkej Silas uan Timoteo maj nimantsin kiitatij Pablo.
16 Uan keman Pablo kinchixtoya* ompa Atenas, yejua semi yolkualanik keman kiitak ke itech ueyi xolal onkayaj tel miakej tatadiosmej.*
17 Yejua ika, kampa taueyichiuayaj kinmachtij uan kinpaleuij judíos uan oksekin akin kiueyichiuayaj Dios maj kiajsikamatikan Tajkuilolamatsin. Uan mojmostaj itech plaza kinajsikamatiltiaya akin ompa yetoyaj.
18 Sayoj ke seki tamatinij* peujkej iuan motajtolteuiaj. Sekin tajtaniaj: “¿Toni kijtosneki nejin takat akin sayoj kikinaka?”.* Oksekin kijtouayaj: “Nesi kinteixmatiltijtok dioses akin okseko kayomej”. Kijtouayaj nejin porin kitematiltijtoya kuali tanauatilmej* tein ika tajtoua Jesús uan ke mikemej oksepa nemiskej.
19 Yejua ika kikitskijkej uan kiuikakej Areópago.* Kijtouayaj: “¿Uelis tikmatiskej toni nejon yankuik tamachtilis tein ika titajtoua?
20 Porin ika titajtojtok tein amo keman tikaktoyaj uan tiknekij tikmatiskej toni kijtosneki”.
21 Tein melauj, nochin akin kayomej Atenas uan analtekos akin ompa yetoyaj,* keman amo teyi kichiuayaj, sayoj kitetapouiayaj oso kikakiaj teisa tein yankuik.
22 Uan Pablo moketsak itech Areópago uan kijtoj:
“Takamej akin nankayomej Atenas, nesi ke namejuan okachi nankinmojkatokaj dioses, amo kemej oksekin.
23 Keman ninejnentoya uan nikyekitstiaya tein nankiueyichiuaj, no nikajsik se altar kampa ijkuiliujtok nejin: ‘Ialtar se Dios akin amo tikixmatij’. Nejua ika namechnojnotstok nejon akin namejuan nankiueyichiuaj maski amo nankiixmatij.
24 Dios akin kichijchiuak taltikpak uan nochi tein onkak nikan, amo nemi itech templos tein kimachijchiujkej, ta yejua iaxka iluikak uan taltikpak.
25 Amo no moneki maj tikpaleuikan porin amo teyi kipoloua, porin yejua kichiua maj tinochin tiyoltokan, maj timijyotikan uan techmaka nochi.
26 Itechkopa sayoj se takat techchijchiuak tinochin para maj tinemikan itech nochi taltikpak, uan kiixtalij tonalmej keman mochiuas seki taman uan no kiixtalij kani tinemiskiaj,
27 para maj nochin kitemokan Dios. Komo mochikauaj kitemoskej, uelis kiajsiskej porin tein melauj amo uejka yetok.
28 Porin yejua kichiua maj tiyoltokan, maj timoolinikan uan maj tinemikan. Kemej kijtouanij semej namotajkuilojkauan: ‘Porin tejuan no tiikoneuan’.*
29 ”Yejua ika, kemej tiikoneuan* Dios, maj amo tiknemilikan ke Dios tamati kemej se tatadios* tachijchiuj ika oro, plata oso tet, oso kemej teisa tein aksa* kimachijchiuak kemej kinemilij ke tamati.
30 Tein melauj, Dios kiixpanauij nejon tonalmej keman amo kiixmatiaj, sayoj ke axkan itech nochi xolalmej kiniluijtok nochin maj moyolpatakan.
31 Porin kiixtalijya se tonal keman kiitas tein kinnamiki kiseliskej akin nemij nikan taltikpak kemej monekis. Kichiuas nejon itechkopa se takat akin yejua kiixtalij, uan kemej kichiuak maj oksepa nemi nochin uelis kiyekmatiskej ke nejon tonal yekmelauj ejkos”.
32 Keman kikakilijkej ke kijtojtoya ke mikemej oksepa nemiskej, sekin peujkej kiuetskiliaj uan oksekin kijtojkej: “Timitskakiskej okse tonal”.
33 Yejua ika Pablo yajki,
34 sayoj ke seki takamej yajkej iuan uan peujkej taneltokaj, kemej Dionisio akin katka semej jueces ompa Areópago, uan se siuatsin akin monotsaya Dámaris, uan oksekin.
Tajtolmelaualismej
^ Itech griego, “moajokui”.
^ Itech griego, “César”.
^ Oso “kinchatoya”.
^ Oso “tiotsitsin”.
^ Akin kitojtokayaj Epicuro uan Zenón.
^ Oso “eliuis tajtoua”.
^ Oso “tajtolmej”.
^ Oso “takalpanojtoyaj”.
^ Oso “itech tiualeuaj”.
^ Oso “itech tiualeuaj”.
^ Oso “tiotsin”.
^ Oso “akin”, “akaj”.
