Hechos 24:1-27
24 Makuil tonal satepan, tayekankatiopixkat Ananías temok iniuan seki taixyekananij judíos uan se tetajtouijkej akin itokay Tértulo, uan yejuan kiluijkej tekiuaj keyej kiteluiliayaj Pablo.
2 Keman kinotskej Tértulo, yejua peuak kijtoua:
“Tejuatsin Félix, timitstasojkamatiliaj porin tikchiujtok maj kualtsin tinemikan, uan kemej kuali titaixejekoua, tikyekchiujtok tein okachi tapaleuia itech nejin altepet.
3 Nochipa uan kampa yeski, semi tiktasojkamatij nochi nejin.
4 Sayoj ke kemej amo nikneki nimitsyolajxitis, nimitstataujtia xikualtakat uan xitechkaki tepitsin.
5 Tikitakejya ke nejin takat takuejmolchiua. Kichiua maj itech nochi taltikpak judíos taixnamikikan uan kinixyekana akin kitojtokaj Jesús akin kayot Nazaret.
6 No kitemoj kipitsotilis templo, yejua ika tikitskijkej.
7 *
8 Keman tejua tiktatsintokis, tikyekitas ke melauak nochi tein tejuan ika tikteluiliaj”.
9 Uan judíos no peujkej kiteluiliaj uan kijtouayaj ke melauak katka nochi tein Tértulo kijtojtoya.
10 Tekiuaj kiixnextilij Pablo maj tajtouani. Uan yejua tanankilij:
“Nejua kuali nikmati ke miak xiujmejya tijuez itech nejin altepet. Yejua ika, ika miak pakilis nimotenpaleuia.
11 Yekin kichiua 12 tonalmej nipankisak Jerusalén nikueyichiuato Dios. Komo tikneki tikmatis ox melauak, uelis titajtanis.
12 Yejuan amo nechitakej maj nimotajtolteuijto iuan aksa* itech templo, nion maj nikchiua maj takuejmolchiuakan kampa taueyichiuaj judíos oso itech ueyi xolal.
13 Amo no uelis kijtoskej ke melauak tein axkan nechpantijtokej.
14 Sayoj ke, kemaj nimitsyekiluia ke nejua ninemi ijkon kemej tamachtiaj itech tein yejuan kiluiaj yankuik taneltokalis. Niktekitilijtok ininDios nouejkaujtatuan, porin nikneltoka nochi tein ijkuiliujtok itech iTanauatil Moisés uan tein kijkuilojkej Tanauatianij.*
15 Uan no nikchia tein nejin takamej kichiaj, ke Dios kichiuas maj oksepa nemikan akin yolmelaujkej uan akin amo yolmelaujkej.
16 Yejua ika, nochipa nimochikaua maj amo teyi nechyolkuejmolo iixpan Dios uan ininixpan oksekin.
17 Satepan ke panok miak xiujmej nikinualkuilij tomin nojudíosikniuan uan niktemaktiko iixpan Dios tapialmej.
18 Nikchiujtoya nejon itech templo keman nechajsikej. Nejua nimochipaujkaya ijkon kemej kijtoua iTanauatil Moisés uan amo nietoya iniuan miakej nion nitakuejmolchiujtoya. Sayoj ke ompa yetoyaj seki judíos akin kayomej itech tal tein poui Asia.
19 Yejuan monekiskia yetoskej nikan moixpan para nechteluiliskej, komo nikchiuak teisa tein amo kuali.
20 Oso maj nejin takamej kijtokan toni tein amo kuali nikchiuak keman nietoya ininixpan Uejueyi Tamelauanij.*
21 Xa uelis kijtoskej sayoj se taman. Keman nietoya ininixpan chikauak nikijtoj: ‘¡Axkan nankiixejekojtokej tein nanechchiuilitij porin nikneltoka ke oksepa nemiskej akin momikilijkejya!’”.
22 Félix kuali kiixmatia iOjtsin toTekotsin. Yejua kijtoj ke okse tonal mosentokaskia, uan kiniluij nochin: “Nikixejekos tein kinamiki keman temos tayekankasoldado* Lisias”.
23 Uan kinauatij akin kinixyekanaya 100 soldados maj kitsakuani Pablo, sayoj ke maj kikauani maj kichiuani seki taman, uan maj itasojikniuan kipaleuitij.
24 Seki tonalmej satepan ejkok Félix iuan isiuatsin, Drusila akin katka judía, uan tanauatij maj kinotsatij Pablo uan yejua kimelauilij toni moneki se kichiuas para se takuaujtamatis iuan Cristo Jesús.
25 Sayoj ke keman Pablo peuak kijtoua keniuj se yeknemis, keniuj se motsakuilis, uan ika tajtoua tonal keman Dios kiixtalis tein tikseliskej, Félix momoujtij uan kiluij: “Yekintsin uelis tiasya. Oksepa nimitsnotsas keman niuelis”.
26 Uan no kichiaya maj Pablo kimakani tomin. Yejua ika okachi miakpa tanauatiaya maj kinotsatij uan iuan tajtouaya.
27 Panok ome xiuit uan Porcio Festo kiixpatak Félix. Sayoj ke Felix kikauak Pablo maj tsakto porin kinekia maj judíos kuali kiitanij.
Tajtolmelaualismej
^ Nejin versículo moajsi itech seki Biblias, sayoj ke itech miak uejkauj amatajkuilolmej itech tajtol griego amo yetok.
^ Oso “akin”, “akaj”.
^ Xikonita tanauatijkej.
^ Nejin takat kinixyekanaya mil soldados.
