Juan 3:1-36
3 Moajsia se fariseo akin monotsaya Nicodemo, yejua katka se inintaixyekankauj judíos.
2 Yejua kiitato Jesús keman youak katka uan kiluij: “Tamachtijkej,* tikmatij ke Dios mitsualtitanik xitamachtiki, porin amo akin ueli kichiua milagros tein tejua tikchiua komo Dios amo kipaleuia”.
3 Jesús kinankilij: “Yekmelauj nimitsyekiluia, ke komo amo oksepa se yoli,* amo ueli se kiita iTaixyekanalis Dios”.
4 Nicodemo kiluij: “¿Keniuj uelis oksepa se yolis keman se xiuejya?* Amo uelis oksepa se mokalakis iijtik se inan uan oksepa se yolis, ¿melauj?”.
5 Jesús kinankilij: “Yekmelauj nimitsyekiluia ke komo amo se yoli itechkopa at uan itechkopa ichikaualis Dios, amo uelis se kalakis itech iTaixyekanalis.
6 Akin yolik itechkopa se takat uan se siuat, yejua poui nikan taltikpak, uan akin yolik itechkopa ichikaualis Dios, poui ne iluikak.
7 Amo xikmojkakaki porin nimitsiluij ‘Namejuan moneki oksepa nanyoliskej’.
8 Ejekat youi kampa kineki, uan maski ueli tikaki, amo tikmati kani ualeua nion kani youi. Ijkon panoua iuan akin yoli itechkopa ichikaualis Dios”.
9 Uan Nicodemo kitajtanij:* “¿Keniuj uelis mochiuas nejon?”.
10 Jesús kinankilij: “¿Tejua titamachtia nikan Israel uan amo tikmati nejin?
11 Yekmelauj nimitsyekiluia ke ika titajtouaj tein tikmatij uan tein tikitanij, sayoj ke namejuan amo nankineltokaj tein tikijtouaj.
12 Nejua ika namechnojnotsani tein ueli nankiitaj nikan taltikpak uan maski ijkon amo nanechneltokiliaj, ¿keniuj nankineltokaskej komo ika namechnojnotsa tein onkak ne iluikak?
13 Amo akin pankisani ne iluikak, ta sayoj akin ualpantemok de ompa: akin yolik kemej takat.
14 Uan ijkon kemej Moisés kiajokuik kouat itech taluakyan, ijkon moneki kiajokuiskej akin yolik kemej takat
15 para maj nemi nochipaya akin itech taneltokas.
16 ”Porin Dios semi kintasojtak akin nemij nikan taltikpak, yejua ika kitemakak iKoneuj akin yojtsin uan ijkon akin itech takuaujtamatis amo ixpoliuis, ta nemis nochipaya.
17 Porin Dios amo kiualtitanik iKoneuj para maj kiixtaliki ke moneki kintatsakuiltiskej akin nemij nikan taltikpak, ta para maj yejuan momakixtikan itechkopa.
18 Akin itech takuaujtamati amo kitatsakuiltiskej. Akin amo itech takuaujtamati kiixtalijkejya ke kitatsakuiltiskej, porin amo takuaujtamati itech* iKoneuj Dios akin yojtsin.
19 Tanex ualaj nikan taltikpak, sayoj ke miakej kiixtopeujkej tanex uan okachi kiuelitakej tayouayanilot porin kichiuayaj tein amo kuali, yejua ika kiixtaliskej tein kinnamiki kiseliskej.
20 Porin akin kichiua tein amo kuali, kitauelita tanex uan amo youi kampa tatanestok, para maj amo monexti tein amo kuali tein kichiujtinemi.
21 Sayoj ke akin kichiua tein melauak, youi kampa tatanestok, para maj moyekita ke kichiua tein Dios kineki”.
22 Satepan, Jesús ajsik iniuan imomachtijkauan itech xolaltsitsin tein pouij Judea, uan ompa mokauak seki tonalmej iniuan uan teauijtoya.
23 Sayoj ke Juan no teauijtoya ompa Enón, Salimkopa, porin ompa semi onkaya at, uan miakej ualayaj moauikij;
24 porin Juan ayamo kitsakuayaj.
25 Uan itatojtokakauan Juan motajtolteuijkej iuan se judío porin tataman kemej kiitayaj keniuj uelis se mochipauas iixpan Dios.
26 Yejua ika, kiluitoj Juan: “Tamachtijkej,* takat akin mouan yetoya oksekopa den ueyiat Jordán, akin tejua tikteixmatiltij, teauijtok uan nochin iuan yajtokej”.
27 Juan tanankilij: “Amo akaj uelis kiselis teisa komo amo Dios kimaka.
28 Namoixtenoj nikijtoj ‘Nejua amo niCristo, ta nechtitankej maj niouj iixpan’.
29 Akin kipia novia yejua novio. Sayoj ke itasojikniuj novio keman iuan yetok uan kitenkaki novio, semi yolpaki. Yejua ika, axkan senkis niyolpaki.
30 Itekiuj Cristo momiakilijtias, sayoj ke notekiuj kaxantias”.
31 Akin ualeua ne ajko okachi ueyichiujkej ke nochin. Akin poui nikan taltikpak, ika tajtoua tein onkak nikan taltikpak porin poui nikan. Akin ualeua ne iluikak okachi ueyichiujkej ke nochin.
32 Uan ika tajtoua tein kiitani uan tein kikakini, sayoj ke amo akin kineltokilia.
33 Akin kineltoka tein yejua kiteixmatiltia, kiyeknextia ke Dios kijtoua tein melauak.
34 Porin akin Dios kiualtitanik, kijtoua tein Dios kijtoua, porin toTajtsin amo tsotsokat keman kitemaka ichikaualis.
35 ToTajtsin kitasojta iKoneuj uan kimaktilij nochi.
36 Akin takuaujtamatis iuan iKoneuj Dios nemis nochipaya, sayoj ke akin amo kitakamatis iKoneuj Dios amo nemis, ta Dios kisentokas iuan kualantos.
Tajtolmelaualismej
^ Itech griego, “Rabí”.
^ Oso xa “se yoli ne iluikak”.
^ Oso “tatajya”, “tatotsinya”.
^ Oso “kitajtoltij”.
^ Itech griego, “itech itokay”.
^ Itech griego, “Rabí”.
