Lucas 10:1-42
10 Satepan ke mochiuak nejin, toTekotsin kinijitak* okseki 70 uan kintitanik ojomen maj tayekantiakan itech nochin uejueyi xolalmej uan xolaltsitsin kampa yejua yaskia.
2 Uan kiniluij: “Yekmelauj onkak miak tatok tein moneki mosentilis, sayoj ke tekitinij amo miakej. Yejua ika xiktataujtikan akin iaxka tatok maj kintitani tekitinij maj kisentilikan itatok.
3 ¡Xiakan! Namechtitantok kemej ichkamej* kampa yetokej koujtajitskuimej.
4 Amo xikuikakan tomin nion namomorral nion namotekakuan, uan amo akin xiktajpalokan* itech ojti.
5 Itech kali kampa nankalakiskej, achto xikijtokan: ‘Maj namechtatiochiuikan* itech nejin kali’.
6 Uan komo ompa yetok se akin kitemoua yolseujkanemis, nejon tatiochiualis* tein nankinejnekiliaj iuan mokauas. Sayoj ke komo amo akin, nejon tatiochiualis mokepas namouan.
7 Yejua ika ximokauakan itech nejon kali uan xikuakan uan xitayikan tein namechmakaskej, porin akin tekiti motanilia itaxtauil. Amo xikalpapatatinemikan.
8 ”Uan no, itech ueyi xolal kampa nanajsiskej uan namechseliskej, xikuakan tein namechmakaskej,
9 uan xikinpajtikan akin mokokouaj ompa uan xikiniluikan: ‘ITaixyekanalis Dios namechajsikoya’.
10 Sayoj ke itech ueyi xolal kampa nanajsiskej uan amo namechseliskej, xikisakan itech uejueyi ojmej uan xikijtokan:
11 ‘Para nankimatiskej ke nankichiujkej tein amo kuali, timometstsetselouaj para maj uetsi hasta talnex tein onkak itech namoueyi xolal. Sayoj ke xikmatikan nejin: iTaixyekanalis Dios moualtokijya’.
12 Namechiluia ke itech nejon tonal,* akin nemij itech nejon ueyi xolal okachi kintatsakuiltiskej ke Sodoma.
13 ”¡Nanteikneltijkej akin nanemij Corazín uan Betsaida! Porin komo milagros tein mochiujkej itech namoxolal mochiuaskiaj ompa Tiro uan Sidón, ne kemanya moyolpataskiaj uan motaliliskiaj tasal tein teajuayotia uan motaliskiaj itech koujnex.
14 Yejua ika, okachi namechtatsakuiltiskej ke akin nemij Tiro uan Sidón.
15 Uan namejuan akin nanemij Capernaúm, ¿xe namechpankixtiskej hasta iluikak? ¡Amo, ta nantemoskej hasta Miketekoch!*
16 ”Akin namechkaki namejuan, no nechkaki nejua, uan akin namechixtopeua namejuan, no nechixtopeua nejua. Uan no, akin nechixtopeua nejua, no kiixtopeua akin nechualtitanik”.
17 Uan keman mokepkej nejon 70, semi yolpakiaj uan kiluijkej: “ToTekotsin, hasta amokuali ejekamej techtakamatij keman tikuij motokay”.
18 Uan yejua kiniluij: “Nikita Satanás ualpanuetsikoya kemej se tikouat.*
19 Xikakikan, namechmakak tanauatil para ipan nantajtaksaskej* kouamej uan escorpiones, uan para nankixijxikoskej nochi chikaualis tein kipia akin teixnamiki. Uan nion teyi namechxokolis.
20 Sayoj ke amo xiyolpakikan porin amokuali ejekamej namechtakamatij, ta xiyolpakikan porin namotokay moijkuilojya ne iluikak”.
21 Itech nejon hora ichikaualis Dios kichiuak maj semi yolpaki uan kijtoj: “Nimitsueyitalia senteixtenoj noTajtsin, akin titaixyekana iluikak uan taltikpak, porin kuali tikintatilia* tamatinij nochi nejin uan tikinmatiltia akin kemej yeskia konemej. Kemaj noTajtsin, porin tikitak ke okachi kuali maj ijkon mochiua”.
22 No kijtoj: “NoTajtsin nechmaktilij nochi. Sayoj noTajtsin kimati niakoni.* Uan sayoj nejua nikmati akoni noTajtsin uan akin nejua niknekis nikixmatiltis”.
23 Uan keman yetoyaj ininselti kiniluij: “Yolpakij akin kiitaj tein namejuan nankiitstokej.
24 Porin namechiluia ke miakej tanauatianij* uan tekiuanij kinekiaj kiitaskej tein namejuan nankiitstokej, sayoj ke amo kiitakej, uan kinekiaj kikakiskej tein namejuan nankikaktokej, sayoj ke amo kikakkej”.
25 Uan se takat akin kuali kiixmatia iTanauatil Moisés moketsak porin kinekia kiyejyekos uan kitajtanij:* “Tamachtijkej, ¿toni moneki nikchiuas uan ijkon uelis ninemis nochipaya?”.
26 Yejua kiluij: “¿Toni ijkuiliujtok itech iTanauatil Moisés? ¿Keniuj tikajsikamati?”.
27 Nejon takat kinankilij: “‘Xiktasojta moDios Jehová* ika nochi moyolo, ika nochi monemilis, ika nochi mochikaualis uan ika nochi motanemilil’ uan ‘xiktasojta moknitsin kemej tejua timotasojta’”.
28 Jesús kiluij: “Kuali titanankilij; xiksentoka xikchiua nejon uan tinemis nochipaya”.
29 Sayoj ke, kemej takat kinekia kinextis ke tein kinemiliaya kuali yetoya, kitajtanij Jesús: “Uan ¿akoni moneki niktasojtas?”.
30 Jesús kinankilij: “Se takat temouaya de Jerusalén hasta Jericó, uan itech ojti kitachtekijkej uan kikuilijkej hasta itasal uan kimagakej* hasta kimiktijtoyajya, uan yajkej.
31 Uan nejon hora, se tiopixkat no temouaya itech nejon ojti; sayoj ke keman kiitak tayoualoj* uan kipanauijtikisak.
32 No ijkon, keman se levita ompaka panok uan kiitak, no tayoualoj* oksekopa.
33 Sayoj ke se takat kayot Samaria akin ompaka panouaya ajsik kampa yetoya takat, uan keman kiitak semi kiyoliknelij.
34 Yejua ika kiajsito, kitekilij aceite uan vino kampa kikojkokojkej, uan kitetsilouilij* ika tasal, kitejkoltij* itech itapial, kiuikak kampa mokalotiaj* uan ompa kiyekpiak.
35 Mostika, kikixtij ome denario,* kimakak akin iaxka kali kampa mokalotiaj uan kiluij: ‘Xikyekpia, uan komo amo mitsajsik nejin tomin, nimitskepilis keman nimokepas’.
36 ¿Akoni tiknemilia ke kitasojtak akin kitachtekijkej?”.
37 Yejua kinankilij: “Akin kiiknelij uan kipaleuij”. Uan Jesús kiluij: “Xiouj uan no ijkon xikchiuati”.
38 Keman kisentokakej ojtokakej, Jesús ajsik itech se xolal. Ompa se siuatsin akin monotsaya Marta, kiluij maj mokaua ichan.
39 Uan yejua kipiaya se iikniuj akin monotsaya María, akin motalij iuan toTekotsin uan kikaktoya tein kijtojtoya.
40 Sayoj ke Marta semi kichiujtoya ichiualis. Yejua ika motokij uan kiluij: “NoTekotsin, ¿amo tikita ke nokniuj nechkauak noselti maj nikchiua nochi? Xikilui maj nechpaleuiki”.
41 ToTekotsin kinankilij: “Marta, Marta, timokuejmolojtok uan miak taman mitstekipachojtok,
42 sayoj ke amo moneki tikchiuaskej miak taman, ta xa sayoj se. Sayoj ke María kijitak* tein okachi kuali uan amo kikuiliskej”.
Tajtolmelaualismej
^ Oso “kinixtalij”.
^ Oso “borregos”.
^ Oso “amo akin xiknauakan keman nankitajpaloskej”.
^ Oso “Xiyolseujtokan”.
^ Oso “yolseuilis”.
^ Nejin kijtosneki Tonal keman Dios taixejekos.
^ Oso “Hades”, kampa moseuijtokej mikemej. Xikonita miketekoch.
^ Oso “tapetanilot”.
^ Oso “nankintejteliksaskej”, “nankintsoniksaskej”.
^ Oso “tikincholtilia”.
^ Itech griego, “akoni iKoneuj”.
^ Xikonita tanauatijkej.
^ Oso “kitajtoltij”.
^ Oso “kiuitekkej”.
^ Oso “kitakoluij”.
^ Oso “kitakoluij”.
^ Oso “kikemilouilij”.
^ Oso “kipankixtij”.
^ Oso “motepalkauaj”.
^ Oso “kiixpejpenak”.
