Lucas 15:1-32
15 Uan nochin akin kisentiliaj impuesto uan tajtakolchiuanij kiyoualouayaj para kikakiskej.
2 Fariseos uan tajkuilouanij moichtakailuiayaj: “Nejin takat mouika iniuan tajtakolchiuanij uan takua iniuan”.
3 Uan yejua kintapouij nejin:
4 “Komo namejuan nankipiaj 100 ichkamej* uan nankipolouaj se, ¿amo nankinkauaj 99 ne ixtauat uan nankitemotij tein poliuik hasta nankiajsiskej?
5 Keman nankiajsij, namokechpanoltiliaj uan semi nanyolpakij.
6 Uan keman nanajsij namochan, nankinnotsaj namotasojikniuan uan namovecinos uan nankiniluiaj: ‘¡Xiyolpakikan nouan, porin nikajsik noichkatsin tein poliujka!’.
7 Namechiluia ke no ijkon akin nemij ne iluikak yolpakiskej komo moajsij 99 yolmelaujkej akin amo moneki moyolpataskej, sayoj ke okachi yolpakiskej komo se tajtakolchiujkej moyolpata.
8 ”Oso komo se siuatsin kipia majtakti platajtomin* uan kipoloua se, ¿melauj ke kixotaltia se candil uan tachpana ichan uan kuali kitemoua hasta kiajsi?
9 Uan keman kiajsi kinnotsa itasojikniuan uan ivecinas uan kiniluia: ‘¡Xiyolpakikan nouan, porin nikajsik tomin tein nikpolojka!’.
10 Namechiluia ke no ijkon iangeluan Dios yolpakij keman se tajtakolchiujkej moyolpata”.
11 Uan kijtoj: “Se takat kinpiaya ome iokichpipiluan.
12 Uan akin xokoyot kiluij itat: ‘Paj, xinechmaka tein yeski noaxka’. Yejua ika tetat kinxejxelouilij ome ikoneuan tein iaxka.
13 Panokej seki tonalmej uan akin xokoyot motamitakuijkuilij uan yajki uejka itech se ueyi altepet kampa kiauilchiuak tein iaxka porin eliuis nemik.
14 Keman kitamij nochi itomin, itech nejon ueyi altepet semi tatasojtik, uan amo kipiayaok tein kikuas.
15 Hasta peuak kitekitilia se akin ompa kayot, uan yejua kititanik italpan maj kinyekpiati pitsomej.
16 Uan kemej semi mayanaya, kitelnekia kikuas tein tamati kemej chalauij* tein kikuajtoyaj pitsomej, sayoj ke amo akin kimakaya nion teyi.
17 ”Keman oksepa peuak yektanemilia, kijtoj: ‘¡Itakeualuan nopaj kitelpiaj tein kikuaskej. Uan nejua nikan nimayanmiktok!
18 Nimokepas ichan nopaj uan nikiluis: “Paj, nitajtakoj iixpan Dios uan moixpan.
19 Amo nechnamikiok xinechita kemej mookichpil, ta xinechita kemej semej motakeualuan”’.
20 Yejua ika yajki uan mokepak ichan itat. Keman ajsitiayaya, itat kiuejkaitak uan semi kiueyiyoliknelij. Tsikuinteuak kinamikito, kinauaj uan kimakak se beso* porin semi kitasojtaya.
21 Uan okichpil kiluij: ‘Paj, nitajtakoj iixpan Dios uan moixpan. Amo nechnamikiok xinechita kemej mookichpil’.
22 Sayoj ke itat kinnauatij itakeualuan: ‘Xikuitiuetsitij se taken tein ueyak tein okachi kuali uan xiktakentikan. Xikmatalilikan se anillo uan xiktekaktikan.
23 Uan no, xikualkuikan kuakuejkonet tein okachi tomauak uan xikmiktikan para maj titatakuakan uan maj tiiluitikan porin mokepakya nokonetsin,
24 porin nookichpiltsin momikilijkaya uan oksepa nemi, poliujtoya uan mokepakya’. Uan peujkej iluitij.
25 ”Iokichpil akin tayekanaya yetoya italpan. Keman mokepak uan ajsitiayaya ichan kikakik ke tatsotsontoyaj uan mijtotijtoyaj.
26 Yejua ika kinotsak semej takeualmej uan kitajtanij* toni mochiujtoya.
27 Yejua kinankilij: ‘Mokniuj mokepak uan paktok. Yejua ika mopaj iluichiujtok uan kimiktij kuakuejkonet tein okachi tomauak’.
28 Sayoj ke okichpil akin tayekanaya kualanik uan amo kinekik kalakis. Uan itat kisak uan peuak kitataujtia maj kalaki.
29 Yejua kinankilij itat: ‘Xikita, nochi nejin xiujmej nimitstekitiliani kemej se takeual uan nochipa nikchiuak tein tinechnauatiaya. Sayoj ke tejua amo keman tinechmakak se chivojkonet para maj niiluiti iniuan notasojikniuan.
30 Uan niman keman ejkok ne mookichpil akin kiauilchiuak nochi tein moaxka iniuan siuaauilneminij, tikmiktilij kuakuejkonet tein okachi tomauak’.
31 Uan itat kiluij: ‘Nokonetsin, tejua nochipa tietoni nouan, uan nochi tein nikpia moaxka.
32 Sayoj ke monekia tiiluichiuaskej uan tiyolpakiskej, porin mokniuj momikilijkaya uan oksepa nemik. Poliujtoya uan mokepakya’”.
Tajtolmelaualismej
^ Oso “borregos”.
^ Itech griego, “dracma”. Se dracma katka tomin tein aksa kitania kemej itech se tonal tekit.
^ Oso “uaxin”, “exot”.
^ Oso “kipitsoj”, “kitenamik”.
^ Oso “kitajtoltij”.
