Lucas 16:1-31
16 Uan no kiniluij imomachtijkauan: “Se takat tominpixkej kiluijkej ke itayekankatakeual amo kuali kikuitoya tein iaxka.
2 Yejua ika kinotsak uan kiluij: ‘Tein niktekakilia ke tikchiujtok amo kuali yetok. Xiouj uan xikamatali keniuj tikuik notomin, porin amo nimitskauasok xitaixyekana nochan’.
3 Uan tayekankatakeual moyoliluij: ‘¿Toni nikchiuati axkan ke noteko amo nechkauasok maj nitaixyekana ikalijtik? Amo nichikauak para nitachkuas uan nipinaua nitajtantinemis tomin.
4 Nikmatikya tein nikchiuati para maj oksekin nechselikan ininchan keman amo nikpiasok nejin tekit’.
5 Uan kinnotstiajki sejse akin kitauikiliayaj iteko. Kitajtanij* se: ‘¿Kanachi tiktauikilia noteko?’.
6 Yejua kinankilij: ‘Niktauikilia 100 tamachiuj* aceite’. Tayekankatakeual kiluij: ‘Nikan ijkuiliujtok tein titauika. Ijsiujka, ximotali uan xikijkuilo 50’.
7 Uan kitajtanij okse akin tauikaya: ‘Uan tejua, ¿kanachi titauika?’. Yejua kinankilij: ‘Nitauika 100 uejueyi tamachiuj* trigo’. Tayekankatakeual kinankilij: ‘Nikan ijkuiliujtok tein titauika. Xikijkuilo 80’.
8 Uan iteko kimojkaitak tayekankatakeual akin kichiuak tein amo kuali yetok, porin ika tein kichiuak kinextij ke tamattoya. Porin akin nemij itech nejin tonalmej* okachi tamattokej ke itekitikauan Dios.*
9 ”No namechiluia: xikuikan tomin tein onkak nikan taltikpak* para kuali namouikaskej iniuan oksekin, ijkon keman nochi nejin tamis, yejuan namechseliskej kampa nanemiskej nochipaya.
10 Akin takuaujtamach itech tein amo semi moneki, no takuaujtamach itech tein okachi moneki. Uan akin amo takuaujtamach itech tein amo semi moneki, amo no takuaujtamach itech tein okachi moneki.
11 Yejua ika, komo namejuan amo kuali nankikuij tomin tein onkak nikan taltikpak, ¿akoni namechkauilis xikyekpiakan tein yekmelauj kipia ipatiuj?
12 Uan komo amo kuali nankikuij tein iaxka okse, ¿akoni namechmakas tein moneki yeski namoaxka?
13 Nion se takeual uelis kintekitilis ome tekomej, porin kitauelitas uan kiixtopeuas se, oso kitasojtas uan kipaleuis okse. Namejuan amo uelis nankitekitiliskej Dios uan Tomin”.*
14 Fariseos akin kitayekanaltiayaj motomintiskej kikaktoyaj nochi nejin, uan moixmojtsolouayaj.
15 Uan yejua kiniluij: “Namejuan nankinextiaj ke nanyolmelaujkej ininixpan oksekin, sayoj ke Dios namechyolojixmati. Porin tein nikan taltikpak kiitaj ke kipia miak ipatiuj, Dios kiita ke tetajyaltij.
16 ”ITanauatil Moisés uan tein kijkuilojkej Tanauatianij* moteixmatiltijkej hasta keman Juan peuak tanojnotsa. Desde ijkuak, moteixmatiltia kuali tanauatilmej* tein ika tajtoua iTaixyekanalis Dios, uan nochin semi mochikauaj kalakiskej ompa.
17 Tein melauj, iluikak uan taltikpak uelis ixpoliuiskej, sayoj ke amo ixpoliuis nion se rayita tein kipia se letra itech iTanauatil Moisés hasta maj nochi mochiua.
18 ”Akin monamiktijya uan kikaua isiuatsin uan monamiktia iuan okse, auilnemi; uan takat akin monamiktia iuan se siuatsin akin monamiktijkaya uan kikaujkej, auilnemi.
19 ”Se takat tominpixkej motakentiaya ika tasal tein semi patiyoj, uan ika nochi tein kipiaya mojmostaj moyolpaktiaya.
20 Sayoj ke ikaltenoj nejon tominpixkej kikauayaj se takat pobre akin monotsaya Lázaro akin kitamikuika kokomej,
21 uan kitelnekia kikuas teisa tein panuetsia de imesa tominpixkej. Hasta ualayaj itskuimej uan kipajpalouiliayaj ikokouan.
22 Uan se tonal, nejon takat pobre momikilij uan ángeles kiuikakej uan kitalijkej iuan* Abrahán.
”Takat tominpixkej no momikilij uan kitokkej.
23 Uan itech Miketekoch* kampa semi tajyouijtoya ajkotachiak uan kiuejkaitak Abrahán, uan Lázaro yetoya iuan.*
24 Yejua ika kinotsak uan kiluij: ‘Nopaj Abrahán, xinechikneli uan xiktitani Lázaro para maj tepitsin momajpilajaki itech at uan maj nechnenepiltalili tsikitsin atsin porin semi nitajyouijtok itech nejin tit’.*
25 Sayoj ke Abrahán kinankilij: ‘Nokonetsin, xikelnamiki ke tejua timoyolpaktij ika miak taman tein kuali keman tinemia, sayoj ke Lázaro semi tajyouij. Axkan nikan kiyolseuijtokej Lázaro, sayoj ke tejua titajyouijtok.
26 Uan no, techxeloua se ueyi ostok* tein uejkatan, yejua ika akin kinekiskej panoskej kampa nanyetokej, amo ueliskej, uan akin kinekiskej ualpanoskej kampa tietokej, amo no ueliskej’.
27 Uan takat tominpixkej kiluij: ‘Nopaj Abrahán, komo ijkon, nimitstajtania xiktitani Lázaro ichan nopaj
28 porin nikinpia makuil nokniuan. Maj kinnejmachtiti, ijkon yejuan amo no kalakiskej nikan kampa semi se tajyouia’.
29 Sayoj ke Abrahán kiluij: ‘Kipixtokej tein kijkuiloj Moisés uan Tanauatianij, maj kichiuakan tein ompa ijkuiliujtok’.
30 Uan yejua kijtoj: ‘¡Nopaj Abrahán, yejuan amo kinkakiskej! Sayoj ke komo se akin momikilijya uan oksepa nemi youi kampa yejuan, moyolpataskej’.
31 Sayoj ke Abrahán kinankilij: ‘Komo amo kitakamatij tein kijkuiloj Moisés uan Tanauatianij, amo no kikakiskej se akin momikilijya uan oksepa nemi’”.
Tajtolmelaualismej
^ Oso “Kitajtoltij”.
^ Oso “batos”. Se bato katka 22 litros.
^ Oso “coros”. Se coro katka kemej 170 kilos.
^ Xikonita tonalmej; tein mochiujtok.
^ Itech griego, “ikoneuan tanex”.
^ Oso “tomin tein amo kuali yetok”.
^ Oso “no nankitemojtinemiskej namotomintiskej”.
^ Xikonita tanauatijkej.
^ Oso “tajtolmej”.
^ Itech griego, “iyolixko”.
^ Oso “Hades”, kampa moseuijtokej mikemej. Xikonita miketekoch.
^ Itech griego, “iyolixko”.
^ Oso “tekol”.
^ Oso “tekoch”. Xikonita ueyi ostok.
