Mateo 28:1-20
28 Keman panok tonal sábado keman moseuiaj, mostika keman tanestiualaya,* María Magdalena uan okse María tachiatoj miketekoch.
2 Chikauak talolinka porin iángel Jehová* ualpantemoka de ne iluikak uan kiajchiujka tet; uan axkan itech tokotsyetoya.
3 Ángel milinia kemej keman tapepetani uan itasal katka pochiktik kemej sekti.
4 Tein melauj, tajpianij peuak uiuiyokaj porin semi momoujtijkej, uan tamisepoujkej.
5 Ángel kiniluij siuatsitsin: “Amo ximouikan; nikmattok ke nankitemouaj Jesús akin kikoujpampilojkej.
6 Amo nikan yetok, porin oksepa nemi,* ijkon kemej kijtojka. Xiualakan uan xikitakan kampa uetstoya.
7 Uan axkan nimantsin xikiniluitij imomachtijkauan: ‘Oksepa nemi* uan yajtok Galilea; ompa nankiitaskej’. Yejua nejin tein namechiluiko”.
8 Yejua ika nimantsin tsikuinteujkej kiniluitoj imomachtijkauan. Siuatsitsin mouiaj sayoj ke no semi yolpakiaj.
9 Uan Jesús iniuan monamikik itech ojti uan kintajpaloj. Siuatsitsin motokijkej, motankuaketskej* uan moixpilojkej hasta talpan, uan kimetsnauajkej.
10 Uan Jesús kiniluij: “Amo ximouikan. Xikinnauatitij nokniuan maj yakan Galilea; ompa nechitaskej”.
11 Keman siuatsitsin ojtokatoyaj, seki tajpianij yajkej ueyi xolal kintapouitoj uejueyi tiopixkamej nochi tein panoka.
12 Yejua ika uejueyi tiopixkamej mosentilijkej iniuan taixyekananij judíos para kiitaskej tein kichiuaskiaj uan kinmakakej soldados miak platajtomin
13 uan kiniluijkej: “Xikijtokan: ‘Youak ualajkej itatojtokakauan Jesús uan kiichtekkej inakayo keman tejuan tikochtoyaj’.
14 Uan komo kimati Pilato, tejuan tiknojnotsaskej. Namejuan amo ximotekipachokan”.
15 Yejua ika kikuikej platajtomin uan kichiujkej tein kiniluijkaj. Uan hasta axkan yejua nejon tein judíos kisentokaj kitetapouiaj.
16 Uan 11 imomachtijkauan Jesús yajkej Galilea, itech tepet kampa Jesús kiniluijka ke moitaskiaj.
17 Keman kiitakej, motankuaketskej iixpan.* Sayoj ke sekin amo kiyekneltokakej ke yejua katka.
18 Jesús motokij uan kiniluij: “Nechmaktilijkej nochi tanauatil ne iluikak uan nikan taltikpak.
19 Yejua ika xiakan uan xikinmachtikan akin nemij itech nochi taltikpak para maj nechtojtokakan. Xikinauikan itokaykopa toTajtsin, iKoneuj uan ichikaualis Dios.
20 Xikinmachtikan maj kitakamatikan nochi tein namechnauatij. Uan xikelnamikikan: nejua nochipa nietos namouan hasta keman tantiasya tein mochiujtok itech taltikpak”.*
Tajtolmelaualismej
^ Itech griego, “itech tonal keman peua semana”, tein para judíos katka domingo.
^ Itech griego, “moajokuik”.
^ Itech griego, “Moajokuik”.
^ Oso “kitakachiujkej”.
^ Oso “kitakachiujkej”.
^ Xikonita tonalmej; tein mochiujtok.
