Mateo 4:1-25
4 Satepan, Dios ika ichikaualis kiyekanak Jesús maj youi taluakyan, uan ompa in Amokuali kitemoj maj Jesús motajtakolmakani.*
2 Satepan ke amo takuaj 40 tonalmej,* Jesús mayanak.
3 Uan in Amokuali kitemoj maj motajtakolmakani uan kiluij: “Komo tiikoneuj Dios, xikinilui nejin temej maj mokepakan takual”.*
4 Sayoj ke Jesús kinankilij: “Ijkuiliujtok: ‘Amo sayoj ika takual* moneki se yoltos, ta ika nochi tein kijtoua Jehová’”.*
5 Uan in Amokuali kiuikak hasta Jerusalén, kitejkoltij kampa okachi uejkapan itech templo
6 uan kiluij: “Komo tiikoneuj Dios, ximopantamota, porin ijkuiliujtok: ‘Kinnauatis iangeluan maj mitspaleuikan’, uan ‘Mitsmachiaskej uan mitsuikaskej para amo timometskokos ika se tet’”.
7 Jesús kinankilij: “Sayoj ke no ijkuiliujtok: ‘Amo xikyejyeko moDios Jehová’”.*
8 Uan in Amokuali no kiuikak itech se tepet tein semi ueyi uan kinextilij nochin uejueyi altepemej uan nochi tein kipiaj.
9 Uan kiluij: “Nimitsmakas nochi nejin komo timotankuaketsa noixpan uan sayoj sepa tinechueyichiua”.
10 Jesús kinankilij: “¡Xiouj Satanás! Porin ijkuiliujtok: ‘Xikueyichiua moDios Jehová,* uan sayoj yejua xiktekitili’”.
11 Uan in Amokuali yajki, uan seki ángeles kipaleuikoj Jesús.
12 Keman Jesús kimatik ke Juan kitsakkej, yajki Galilea.
13 Kisak de Nazaret uan mokaltalito Capernaúm, se ueyi xolal tein moajsi ueyiatenoj, itech talmej tein pouij Zabulón uan Neftalí.
14 Nejin panok para maj mochiuani tein Dios kijtojka itechkopa tanauatijkej* Isaías:
15 “¡Galilea kampa nemij akin amo judíos, akin nemij Zabulón uan Neftalí, itech ojti tein ajsiti ueyiat, oksekopa den ueyiat Jordán!
16 Akin nemiaj tayouayanijtik kiitakej se ueyi tanex; se tanex kintauilij akin nemiaj kampa in mikilis tayekauilijtok”.
17 Desde nejon tonal, Jesús peuak kiteixmatiltia nejin: “Ximoyolpatakan, porin iTaixyekanalis Dios tein moajsi iluikak ejkotokya”.
18 Keman nejnentoya ueyiatenoj Galilea, kinitak ome iknimej akin kinkitskiayaj pescados.* Yejuan kitamottoyaj se atarraya* itech ueyiat. Se katka Simón, akin kiluiaj Pedro, uan okse Andrés.
19 Uan kiniluij: “Xinechtojtokakan uan nejua namechnextilis keniuj nankintemoskej akin nechtojtokaskej ijkon kemej nankintemouaj pescados”.
20 Yejuan nimantsin kikaujkej ininatarrayas uan kitojtokakej.
21 Tepitsin nepaka, kinitak okseki ome iknimej: Santiago uan Juan, ikoneuan Zebedeo. Yetoyaj iuan inintat itech barco kiyekchijchiujtoyaj atarrayas. Jesús kinnotsak
22 uan yejuan nimantsin kikaujteujkej barco uan inintat, uan kitojtokakej.
23 Itech nochi Galilea, Jesús tamachtijtinemik kampa taueyichiuaj judíos uan kiteixmatiltijtinemik kuali tanauatilmej* tein ika tajtoua iTaixyekanalis Dios. Uan kinpajtiaya nochin akin kipiayaj tataman kokolis* uan akin tajyouijtoyaj.
24 Uan itech nochi Siria momatik nochi tein kichiuaya. Kiualkuiliayaj nochin akin mokokouayaj uan semi tajyouijtoyaj, akin kipiayaj amokuali ejekamej, akin kinkuia ataques* uan akin amo ueliaj nejnemiaj. Uan yejua kinpajtiaya.
25 Yejua ika kitojtokayaj tel miakej akin kayomej Galilea, Decápolis,* Jerusalén, Judea uan oksekopa den ueyiat Jordán.
Tajtolmelaualismej
^ Oso “kiyejyekoj”.
^ Itech griego, “40 tonalmej uan 40 youalmej”.
^ Itech griego, “pantsin”.
^ Itech griego, “pantsin”.
^ Xikonita tanauatijkej.
^ Oso “amichimej”.
^ Oso “matat”.
^ Oso “tajtolmej”.
^ Oso “kokoxkayot”.
^ Oso “epilepsia”, “akin mijmikiaj”.
^ Oso “talmej kampa pouiaj majtakti xolalmej”.
