Romanos 11:1-36
11 Yejua ika, nejua nitajtani: ¿xe Dios kiixtopeuak ixolal? ¡Amo! Nejua no niisraelita, nipoui iniuan ikoneuan Abrahán, iniuan ichankauan Benjamín.
2 Dios amo kiixtopeuak ixolal, tein achto kijitak.* ¿Amo nankiixmatij Tajkuilolamatsin kampa kijtoua tein Elías kiluij Dios tein amo kinuelitilij israelitas?
3 “Jehová,* kinmiktijkejya motanauatijkauan* uan kinxitinijkej moaltares; sayoj nejua nimokaua uan axkan kitemouaj nechmiktiskej”.
4 Sayoj ke, ¿toni kinankilij Dios? “Moajsijok chikome mil takamej akin nechtekitiliaj uan amo motankuaketsanij iixpan Baal”.
5 No ijkon, itech nejin tonalmej moajsij sekin akin Dios kinijitak porin kinnextilij itatiochiualis tein amo technamiki.
6 Nejin kijtosneki ke amo kinijitak porin kichiujkej tein kuali, ta porin kinnextilij itatiochiualis tein amo technamiki. Komo yejuan mochikauaskiaj para maj kinijita, amo yeskiaok ika itatiochiualis tein amo technamiki.
7 Komo ijkon, ¿toni tikijtoskej? Israelitas amo kipiakej tein semi kinekiaj, sayoj ke akin Dios kinijitak* kemaj kipiakej. Oksekin yoltakuauayakej,
8 ijkon kemej ijkuiliujtok: “Hasta axkan, Dios kichiujtok maj yetokan kemej akin kuali kochtokej para maj amo tachiakan uan maj amo takakikan”.
9 David no kijtoua: “Maj iluimej tein kipiaj mochiuakan* kemej se trampa para maj uetsikan uan maj kintatsakuiltikan.
10 Maj ixpojpoliuikan para maj amo tachiakan. Uan xikchiua maj nochipa mopanchijkolokan”.
11 Yejua ika nitajtani: ¿xe keman yejuan uetskej ompa mokaujkej? ¡Amo! Sayoj ke kemej yejuan amo kitakamatkej tanauatil, akin amo judíos ueli momakixtiaj, uan nejin kinkualantia.
12 Uan kemej amo tatakamatkej, tapaleuia maj oksekin ueli kintatiochiuikan. Uan kemej judíos amo semi miakejok, nejon tapaleuia maj akin amo judíos kintatiochiuikan. ¡Okachi miak tatiochiualismej onkas keman kintamisentiliskej!
13 Axkan namechnojnotsa namejuan akin amo nanjudíos. Kemej nechtitankej iniuan akin amo judíos, semi nikpatiuita tekit tein Dios nechmakak.
14 Uan no nikchia maj ueli nikchiua maj nojudíosikniuan chauatikan* para maj sekin makisakan.
15 Porin kemej judíos kinixtopeujkej, tapaleuia maj oksekin oksepa kuali mouikakan iuan Dios. Komo Dios axkan oksepa kinseliskia seki judíos, kemej yeskia oksepa nemiskiaj.
16 Uan no, komo tepitsin tixti tein yekinika se kitemaktia iaxka Dios, no iaxka nochi tixti. Uan komo inaluayo kouit yejua tein okachi kuali,* no ijkon imakoujyo.
17 Sayoj ke, Dios kitekilij seki imakoujyo yekmelauj olivojkouit, uan tejua ke tikoujtajolivo mitspepechoj itech imakoujyo tein yekmelauj olivojkouit uan no mitspaleuia inaluayo. Yejua ika,
18 amo xiknemili ke tejua okachi tiueyichiujkej ke okseki imakoujyo olivojkouit. Uan komo tiknemilia ke okachi tiueyichiujkej, xikelnamiki ke tejua amo tikmamajtok inaluayo, ta inaluayo mitsmamajtok tejua.
19 Nansekimej uelis nankijtoskej: “Kitekilijkej seki imakoujyo olivojkouit para maj nejua nikalaki”.
20 ¡Melauak nejon! Yejuan kinmatekkej porin amo takuaujtamatkej, sayoj ke tejua itech tietokok porin titakuaujtamati. Yejua ika amo ximoueyimati,* ta ximoyekpia.
21 Porin komo Dios amo kitapojpoluij tein yekmelauj imakoujyo, tejua amo no mitstapojpoluis.
22 Uelis tikitas ke Dios kualtakat uan tetatsakuiltia. Yejua kintatsakuiltij akin uetskej porin amo takuaujtamatkej, sayoj ke yeski kualtakat mouan, sayoj komo tiksentoka tikchiua tein tajtani para tikyolpaktis. Komo amo, tejua no mitsmatekiskej.
23 Uan komo judíos peua takuaujtamatij, oksepa kinpepechoskej itech olivojkouit porin Dios ueli oksepa kinpepechoua.
24 Porin komo tejua tipouia itech se koujtajolivoj uan mitstekkej, uan mitspepechojkej itech se yekmelauj olivojkouit tein kitokkej, maski amo ijkon mochiua, ¡okachi amo ouij maj oksepa kipepechokan imakoujyo se olivojkouit kampa ipa pouia!
25 Nokniuan, nikneki xikixmatikan nejin tein Dios amo kitematiltijtoya,* para amo xiknemilikan ke semi nantamattokej: seki israelitas yoltakuauayakej, uan ijkon kisentokaskej hasta keman kintamisentiliskej nochin akin amo judíos akin Dios kinijitak,*
26 uan ijkon nochin israelitas makisaskej. Ijkon kemej ijkuiliujtok: “Temakixtijkej ualeuas de Sion uan kichiuas maj ikoneuan Jacob amo kichiuakanok tein amo kuali.
27 Uan yejua nejin tein nimotenkaua iniuan, keman nikixpolos inintajtakoluan”.
28 Tein melauj, seki judíos kiixnamikij kuali tanauatilmej,* uan nejin namechpaleuia. Sayoj ke kemej Dios motenkauak iniuan ininuejkaujtatuan, kinijitak* sekin para maj kuali iuan mouikakan.
29 Porin Dios amo kiyolkokos tein kitetayokoliani, nion kiyolkokos porin kinnotsak sekin.
30 Namejuan seki tonalmej amo nankitakamatkej Dios, sayoj ke axkan namechiknelijtok porin judíos amo tatakamatkej.
31 No ijkon, axkan judíos amo tatakamatij, uan yejua ika Dios namechiknelijtok. Sayoj ke no uelis kiniknelis judíos, kemej namejuan.
32 Porin Dios kinita kemej yeskia tsaktokej porin amo tatakamatij, para uelis kiniknelis nochin.
33 ¡Itatiochiualisuan Dios, itamatilis uan itaixmatilis amo ueli motamachiua! ¡Amo ueli senkis se kiajsikamatis tein kiixtalia nion ueli se kimati tein kichiua!
34 Porin “¿akoni ueli kiixmati itanemililuan Jehová?* ¿Oso akoni uelis kiluis tein moneki kichiuas?”.
35 Oso, “¿akoni achto kimakak teisa Dios para maj yejua kikepili?”
36 Porin nochi ualeua imako, uan yejua kichiua maj kisentoka onka, uan nochi tein onkak para yejua. Yejua kinamiki maj kiueyitalikan nochipaya. Maj ijkon mochiua.*
Tajtolmelaualismej
^ Oso “kiixpejpenak”.
^ Xikonita tanauatijkej.
^ Oso “kinixpejpenak”.
^ Itech griego, “Maj ininmesa mochiua”.
^ Oso “namechnexikoluikan”.
^ Oso “yektik”.
^ Oso “amo ximoueyineki”.
^ Xikonita tein Dios amo kitematiltijtoya.
^ Oso “kinixpejpenak”.
^ Oso “tajtolmej”.
^ Oso “kinixpejpenak”.
^ Oso “Amén”.
