Romanos 16:1-27
16 Namechiluia kuali xikselikan toknitsin Febe, se siuatsin akin tapaleuia itech nechikol tein yetok Cencreas,
2 Xikselikan ika pakilis itokaykopa Cristo kemej kinnamiki kinseliskej akin Dios moinxelouilij* uan xikpaleuikan itech tein kipolos, porin Febe no kinpaleuij* miakej tokniuan, uan hasta nejua no nechpaleuij.
3 Xinechintajpalouilikan Prisca uan Áquila, notekitikaikniuan akin pouij iuan Cristo Jesús.
4 Yejuan motemakakej nechpaleuiskej maski ueliskia mikiskej uan nejua uan nochin tokniuan akin amo judíos tikintasojkamatiliaj.
5 No xinechintajpalouilikan tokniuan akin mosentiliaj ininchan. Xinechtajpalouilikan noknitsin Epéneto akin niktasojta, yejua semej akin yekinika mochiuak imomachtijkauj Cristo ompa Asia.
6 Xinechtajpalouilikan María, akin chikauak tekitini para namechpaleuis.
7 Xinechintajpalouilikan nochankauan Andrónico uan Junias, akin nouan tsaktoyaj. Tatitanilmej kuali kinixmatij uan mochiujkej imomachtijkauan Cristo okachi achto ke nejua.
8 Xinechtajpalouilikan Ampliato, noknitsin akin niktasojta, yejua no imomachtijkauj toTekotsin.
9 Xinechtajpalouilikan Urbano, totekitikaikniuj akin no poui iuan Cristo, uan noknitsin Estaquis akin niktasojta.
10 Xinechtajpalouilikan Apeles, akin kiyolpaktia Cristo. Xinechintajpalouilikan akin nemij ichan Aristóbulo.
11 Xinechtajpalouilikan nochankauj Herodión. Xinechintajpalouilikan akin nemij ichan Narciso akin kitojtokaj toTekotsin.
12 Xinechintajpalouilikan Trifena uan Trifosa, siuamej akin chikauak kitekitilijtokej toTekotsin. Xinechtajpalouilikan toknitsin Pérsida akin tiktasojtaj, porin yejua chikauak kitekitilijtok toTekotsin.
13 Xinechtajpalouilikan Rufo, akin toTekotsin kijitak,* uan no xinechtajpalouilikan inan, akin nikita kemej nomaj.
14 Xinechintajpalouilikan Asíncrito, Flegonte, Hermes, Patrobas, Hermas uan tokniuan akin iniuan yetokej.
15 Xinechintajpalouilikan Filólogo uan Julia, Nereo uan iikniuj siuat, uan Olimpas uan nochin tokniuan* akin iniuan yetokej.
16 Ximotajpalokan se iuan okse ika se beso* kemej yeskia naniknimej. Nochin tokniuan akin kitojtokaj Cristo namechtajpalouaj.
17 Nokniuan, namechtataujtia xikinyekitakan akonimej taxexelouaj uan kichiuaj maj oksekin amo takuaujtamatikanok, porin nejon kiixnamiki tein namomachtianij. Amo iniuan ximouikakan.
18 Porin yejuan amo yetokej imako toTekotsin Cristo, ta imako inintanejnekilis.* Yejuan kualtsin kinnojnotsaj uan kinueyitaliaj akin nimantsin nochi kineltokaj uan ijkon kinkajkayauaj.
19 Sayoj ke nochin kimatij ke nantatakamatij, uan semi nechyolpaktia nejon. Sayoj ke nikneki kuali xitanemilikan uan xikchiuakan tein kuali, uan amo xikixmatikan tein amo kuali.
20 Amo uejkaua, Dios akin teyolseuia kixamanis* Satanás namometstampa. Maj toTekotsin Jesús namechmaka itatiochiualis tein amo technamiki.
21 Notekitikaikniuj Timoteo namechtajpaloua. No namechtajpalouaj nochankauan Lucio, Jasón uan Sosípatro.
22 Nejua, Tercio, akin nikijkuiloj nejin amat, namechtajpaloua itokaykopa toTekotsin.
23 Gayo, akin nechtakauilia ichan uan akin kinkaua nochin tokniuan maj mosentilikan ichan, namechtajpaloua. Erasto, akin kisentilia tomin itech ueyi xolal, uan iikniuj, Cuarto, namechtajpalouaj.
24 *
25 Dios uelis namechchikauas ika kuali tanauatilmej* tein nikteixmatiltia uan tamachtilis tein ika tajtoua Jesucristo. Nejin kuali tanauatilmej kimelauaj tein tel miak xiujmej Dios amo kitematiltijtoya.*
26 Sayoj ke axkan techixmatiltijkejya, uan tein kijkuilojkej tanauatianij* no techpaleuia maj tikixmatikan. ToDios akin nochipa nemi tanauatij maj moteixmatilti iniuan akin amo judíos para maj iuan takuaujtamatikan uan maj kitakamatikan.
27 Dios, akin sayoj yejua tamatkej, kinamiki maj kiueyitalikan nochipaya itechkopa Jesucristo. Maj ijkon mochiua.*
Tajtolmelaualismej
^ Oso “chipaujkej iixpan Dios”.
^ Oso “kintajtouij”.
^ Oso “kiixpejpenak”.
^ Oso “akin Dios moinxelouilij”.
^ Oso “uan ximopitsokan”, “uan ximotenamikikan”.
^ Oso “ininpox”.
^ Oso “kikuechos”.
^ Nejin versículo moajsi itech seki Biblias, sayoj ke itech miak uejkauj amatajkuilolmej itech tajtol griego amo yetok.
^ Oso “tajtolmej”.
^ Xikonita tein Dios amo kitematiltijtoya.
^ Xikonita tanauatijkej.
^ Oso “Amén”.
