Romanos 2:1-29
2 Yejua ika, amo kuali yetok xikinijijto oksekin, tiyeski akin tiyeski.* Porin keman tikinijijtoua oksekin tiknextia ke mitsnamiki maj mitstatsakuiltikan porin tikchiua tein yejuan kichiuaj.
2 Tikmatij ke Dios kiixtalia maj kintatsakuiltikan akin kichiuaj nejon, uan tein kiixtalia kuali yetok.*
3 Sayoj ke, tejua akin tikinijijtoua oksekin porin kichiuaj tein tejua no tikchiua, ¿tiknemilia ke timomakixtis keman Dios tetatsakuiltis?
4 ¿Amo tikmati ke yejua semi yolkuali mouan, ke mitsxikojtok* uan ke amo yolijsiui? ¿Xe amo tikita ke Dios yolkuali uan kitemojtok mitspaleuis ximoyolpata?
5 Sayoj ke, kemej tiyoltakuauak uan amo tikneki timoyolpatas, xikyekmati ke Dios mitstatsakuiltis itech tonal keman kinextis iueyi kualanyo. Nejon tonal kiixtalis kemej moneki tein kinnamiki kiseliskej akin nemij nikan taltikpak.
6 Uan yejua kintatsakuiltis akin kichiuaj tein amo kuali uan kintatiochiuis akin kichiuaj tein kuali:
7 kichiuas maj nemikan nochipaya uan maj ininnakayo amo uejueliui akin kitemojtokej maj kinueyitalikan uan kisentokaj kichiuaj tein kuali.
8 Sayoj ke, Dios kintatsakuiltis uan kinnextilis iueyi kualanyo akin kiuelitaj takuejmolchiuaskej uan amo kitakamatij tein melauak.
9 Nochin akin kichiuaj tein amo kuali, yeskij judíos oso griegos, tajyouiskej.
10 Sayoj ke, nochin akin kichiuaj tein kuali, Dios kinueyitalis uan yolseuiskej porin kuali mouikaj iuan, achto judíos uan no griegos.
11 Porin Dios amo techichikotasojta.*
12 Nochin akin tajtakolchiuaj uan amo kiixmatij iTanauatil Moisés, momikiliskej maski amo kiixmatkej nejon tanauatil. Sayoj ke, akin tajtakolchiuaj maski kiixmatij iTanauatil Moisés, moixtalis tein kinnamiki kiseliskej kemej kijtoua nejon tanauatil.
13 Dios amo kinita ke yolmelaujkej akin sayoj kikakij iTanauatil Moisés, ta Dios kinitas ke yolmelaujkej sayoj akin kichiuaj tein kijtoua Tanauatil.
14 Porin akin amo judíos amo kipiaj iTanauatil Moisés, sayoj ke kichiuaj tein kijtoua nejon tanauatil. Maski yejuan amo kiixmatij nejon tanauatil, kipiaj itech ininyolo.
15 Tein kichiuaj kinextia ke tanauatil ijkuiliujtok itech ininyolo, uan inintalnamikilis* no kinextia ke kuali oso amo kuali tein kichiuaj. Keman kichiuaj tein amo kuali moyolkokouaj, uan keman kichiuaj tein kuali amo moyolkokouaj.
16 Nejin tein nikijtojtok mochiuas itech tonal keman Dios itechkopa Cristo Jesús kiitas tein kiichtakanemiliaj uan kiichtakachiuaj akin nemij nikan taltikpak uan ika nejon kiixtalis tein kinnamiki kiseliskej. Nochi nejin mochiuas ijkon kemej kijtouaj kuali tanauatilmej* tein nikteixmatiltia.
17 Nansekimej nankijtouaj ke nanjudíos, ke nantakuaujtamatij itech iTanauatil Moisés, uan nanyolpakij porin kuali namouikaj iuan Dios.
18 Nankiixmatij tein Dios kineki uan ueli nankimatij toni okachi tayekantok porin namechmachtijkej Tanauatil.
19 Nankinemiliaj ke uelis nankinixyekanaskej akin amo tachiaj uan nankintauiliskej akin yetokej tayouayanijtik.
20 Nankinemiliaj ke uelis nankinyektanemililtiskej akin amo yektanemiliaj uan nankinmachtiskej pipilkonemej porin nankiajsikamatij tamachtilis tein okachi tayekantok uan tamachtilis tein melauak tein moajsi itech Tanauatil.
21 Komo ijkon, tejua akin tikmachtia okse, ¿keyej amo no timomachtia? Tejua akin tikiniluijtinemi oksekin “Amo xitachteki”, ¿titachteki?
22 Tejua akin tikijtoua “Amo xiauilnemi”, ¿tiauilnemi? Tejua akin tikijtoua ke tikintauelita tatadiosmej,* ¿titachteki itech tiopamej?
23 Tejua akin tiyolpaki porin tikixmati itanauatil Dios, ¿keyej tiktapanauilia iTanauatil Moisés uan amo tikueyitalia Dios?
24 Porin ijkon kemej ijkuiliujtok, “namejuan nankichiuaj maj itech okseki altepemej amo kuali ika tajtokan* itokay Dios”.
25 Tein melauj, sayoj komo tiktakamati iTanauatil Moisés kuali yetok maj mitstekikan.* Keman amo tiktakamati, kemej yeskia amo keman mitstekiskiaj.
26 Yejua ika, komo se takat akin amo kitekinij kichiua tein kijtoua iTanauatil Moisés, Dios kiitas kemej yeskia kitekkejya, ¿melauj?
27 Tejua mitstekkejya uan mitsmachtijkej tein ijkuiliujtok itech Tanauatil, sayoj ke amo tiktakamati. Uan keman se takat akin amo kitekinij kitakamati Tanauatil, kinextia ke tiktapanauilijtok.
28 Se yekmelauj judío amo yejua akin kijtoua ke judío, uan amo tayekantok se motekis* itech se inakayo,
29 ta se akin yekmelauj judío yejua akin kitakamati Dios ika nochi iyolo, uan ichikaualis Dios kemej yeskia kiteki iyolo, amo porin kitakamati iTanauatil Moisés. Dios kiueyitalia nejon takat, uan amo oksekin.
Tajtolmelaualismej
^ Oso “amo importa tiakoni”.
^ Oso “melauak”.
^ Oso “mitsijyouijtok”.
^ Oso “amo techichikouia”.
^ Oso “inintanemilil”.
^ Oso “tajtolmej”.
^ Oso “tiotsitsin”.
^ Oso “kiuijuikaltikan (kitejtelchiuakan)”.
^ Oso “mitschiuilikan circuncisión”. Xikonita circuncisión.
^ Oso “mochiuilis circuncisión”.
